Портпаролот на Независниот синдикат на полицијата, Дејан Саздов, обвини дека раководството на Министерството за внатрешни работи врши мобинг врз членовите на синдикатот и останати припадници на полицијата. Саздов вели дека станува збор за незаконски распределувања преку кои раководството се пресметува со оние кои се спротиставуваат на незаконското работење.

„Како синдикат сметавме дека власта лекциите за примерно и законито однесување ги научи и навистина ќе се почуствуваат позитивните промени, но од тоа ништо не се случи. Наместо промени, кон синдикатот продолжија притисоците и заканите за преместувања кои голем дел од нашите претставници ги осетија на својот грб, како и притисоци врз највисоките структури на НСП и срамна дискредитација на истите. Се уште се водат неосновани постапки против наши претставници со притисоци од страна на највисоките структури. Исто така и притисоците за отчленување на членови од НСП не престануваат. Нашите претставници се соочуваат со невиден мобинг, почнувајќи од незаконски распределувања за внесување страв до безмилосен напад на професионалниот интегритет. Се демонстрираше моќ и способност за конструкции и фингирање на лоши слики ставајќи им етикети на професионалците кои ќе се спротистават на незаконското работење“, вели Саздов.

Мотивирани од, како што велат неправдата која им е нанесена, членовите на НСП се обратиле до Народниот правобранител, внатрешната контрола на МВР и Комисијата за управна постапка. Сите овие институции утврдиле неправилности во постапката за прераспределување по што Основниот суд 2 на 10 април оваа година донел пресуда со која се поништуваат решенијата на МВР за прераспределување и се бара вработените да бидат вратени на старите позиции.

Како што велат од НСП, оваа одлука на судот сè уште не е испочитувана иако раководството на министерството за внатрешни работи имало рок од 8 дена да ја изврши судската одлука.

Од синдикатот бараат премиерот, Зоран Заев, да „замете“ и во МВР со цел правдата да биде задоволена, а зборот оддржан. Тие исто така се надеваат дека трудовиот инспекторат и Јавното обвинителство ќе се позанимава со овие прераспределување во полицијата.

„Од премиерот бараме по доставување на доказите за незаконското работење на раковдството на МВР, метлата да заигра и правдата да биде задоволена, а дадениот збор одржан. Одговорноста во највисокото раководство мора да ја има. Гласот да допре до сите надлежни институции посебно до Трудовиот инспекторат и Јавното обвинителство. Да се спроведе ревизија и истрага на сите досегашни решенија за прераспределување и унапредување во МВР донесени од страна на актуелното раководство“, велат од Независниот синдикат на полицијата.

Македонската економија пропаѓа, потфрла планираното полнење на буџетот со даноци, за пет месеци годинава недостасуваат, односно има буџетска дупка од 3 милијарди денари. Тоа значи нема да има пари за пензии, за администрација, за услуги кон граѓаните, за болници, за училишта, а власта не се откажува од луксузот и од лошите економски политики, обвини портпаролот на ВМРО-ДПМНЕ, Наум Стоилковски.

„УЈП при собирање на данокот има три милијарди денари дупка, три милијарди денари помалку пари во буџетот за граѓаните, три милијарди денари помалку од планираното на економскиот тим, на економското цунами – Заев, Анѓушев, Тевдовски. УЈП и Владата немаат одговор на што се должи толкаво потфрлање, дупка во полнењето на буџетот на име на собрани даноци во висина од 50 милиони евра, што е пак вовед во нов економски иден шок наскоро, нови потреси во државата, нови отежнувања на животот на граѓаните кои тонат во сиромаштија“, рече тој.

Стоилковски кажа дека потфрлањето на Владата и на УЈП, 50 милиони евра разлика од планираното и реализираното даночење е показател дека спротивно на лагите на Заев, на Тевдовски и на Анѓушев, економијата не цвета, а Македонија не блеска, дека платите реално не растат, економската активност е намалена и дека нема нови вистински инвестиции.

Движењето АВАЗ ќе поднесе два амандмани за предлог-законот за одржување на попис на населението во 2020 година.

„Сакаме да ја информираме јавноста, пред сè Бошњаците, дека во предлог-законот стои погрешна номинација на босанскиот јазик, како единствен стандардизиран јазик на Бошњаците. Со цел да биде корегирана направената грешка подготвивме два амандмани кои ќе бидат поднесени од нашиот пратеник Зеќир Рамчиловиќ кога законот ќе дојде во второ читање. Истите ќе бидат поддржани од парламентарното мнозинство и од опозицијата што само докажува дека се работи за ненамерна грешка, но и опомена дека институциите треба да бидат повнимателни“, велат од АВАЗ.

Во врска со ова, велат од таму, реагираа повеќе поединци и невладини организации на соодветен начин, додека некои поединци, дури и политички партии или не ги знаат процедyрите или прават ефтин популизам.