(Видео) Протест против молкот на власта за Кочоска – СДСМ нема да учествува на седница, ниту во Клубот на пратеничките

Во пресрет на 8 Март, Меѓународниот ден на жената, ја изразуваме нашата почит и благодарност кон сите жени што се бореле и кои и денес се борат за еднакви права и подобра положба во општеството.
Собранието на Република Северна Македонија токму во оваа насока веќе трета година по ред одржува пленарна седница посветена на прашањата за родовата еднаквост, иницијатива што почна во 2022 година кога парламентарното мнозинство беше предводено од СДСМ, истакна денеска Јована Тренчевска, пратеничка на СДСМ.

„Да се зборува за родова еднаквост, за заложби и достигнувања, додека само пред неколку дена од собраниската говорница беше изречена тешка навреда и дискриминација кон жените – е крајно лицемерно и срамно. Министерката за финансии, Гордана Кочоска, со своите навредливи и понижувачки зборови, покажа крајно непочитување кон жените во општеството. Она што е уште позагрижувачко е што не следуваше никаква реакција ниту од неа, ниту од Собранието, ниту од Клубот на пратеничките.
Потпретседателката на Собранието, Весна Бендевска, која ја водеше седницата, остана нема, го премолче скандалот“, вели Тренчевска.

Овој молк, како што рече, е еднакво загрижувачки како и навредите што беа изречени.

Според неа, пратеничките од ВМРО-ДПМНЕ во Клубот на пратеничките спречија институционална реакција и осуда на дискриминацијата.

„Иако првично се согласија дури и со ублажени формулации, добија наредба од партијата и истиот ден се повлекоа. Наместо да одлучуваат жените што се избрани тука во Собранието, пратеничките на ДПМНЕ дозволија Мицкоски да одлучува за нив. Кога молчиш пред навредите, пред дискриминацијата, тоа значи дека ги поддржуваш. Денешната седница треба да биде простор за дебата за правата и положбата на жените, но како да учествуваме во дискусии кога оние што требаше да реагираат – молчат“, праша Тренчевска.

Нагласи дека нема да учествуваат во, како што кажа, лицемерни процеси и да прифаќаат молк пред неправдите.

Најави дека пратеничката група на СДСМ и коалицијата нема да учествува на пленарната седница посветена на 8 Март. Отсуството е протест против неправдата, дискриминацијата и премолчувањето на навредите кон жените.

„Дополнително, пратеничките од СДСМ и коалицијата нема да учествуваат во работата на Клубот на пратеничките и Комисијата за еднакви можности во Собранието сè додека не видиме конкретна акција и осуда на навредливите изјави. Нема да запреме со реакциите сè додека таа не ја поднесе оставката или не биде разрешена. 8 Март не е само ден за честитки – туку ден за акција. Борбата продолжува“, нагласи Тренчевска.