Македонија
(Видео) Пуштен во употреба патот Градско – Дреново, доцни оти една година биле повлечени и вработените и механизацијата на „Страбаг“

Со врнежи снег утрово свечено во употреба беше пуштен експресниот пат Градско-Дреново, долг 15,5 киломтери. За свеченоста, исто како и прд десет дена во Страцин, се собраа министри, директори, градоначалници, амбасадори и голем број граѓани.
Директорот на Јавното претпријатие за држави патишта, Коце Трајановски, потсети дека подготовките и плановите за овој експресен пат почнале во 2012 година со планови и проектирање, а договорот со првиот изведувач бил склучен во 2017.
„Во 2017 година е склучен договор со ’Терена скави’ од Италија меѓутоа со оглед на слабата реализација за само 3 години, по 30 и неколку проценти реализација, раскинат е договорот и во 2021 година е избрана фирмата ’Страбаг’ за изградба на оваа делница. До јуни 2024 година изграден е голем процент од овој пат, односно некаде од 80 отсто. Ја користам приликата да им се заблагодарам на сите оние кои учествуваа од идеја се до реализација на овие 80 отсто од овој експресен пат. Во јуни 2024 година морам да истакнам дека патот не беше завршен. По мојот избор за директор контстатиравме дека ’Страбаг’ една година беше повлечен од оваа делница поради нерешени финансиски проблеми и нерешени градежни и други технички проблеми. Скоро една година беа повлечени и вработените и механизацијата од оваа делница. Имаше тотален застој“, рече директорот Трајановски.
Проблемите ги надминале во септември кога повторно почнале градежните активности за довршување на останатите 20 отсто од експресниот пат за што Трајановски изрази низа благодарности на Владата , премиерот, министрите и градежниците.
Заедно со Градско – Дреново, во употреба беше пуштен и еден километар од патот Дреново – Фариш. Трајановски најави дека останатите девет километри од овој пат не се пуштени во употреба сега од безбедносни причини.
„Морам да кажам дека овој пат во голем процент исто така беше завршен меѓутоа од безбедносни причини со оглед на тоа што косините не беа добри и поради тоа што има карпести делови кои надвиснуваат на патот ќе се одложи неговото пуштање. Се надевам дека за неколку месеци ќе бидеме исто вака во голем број собрани да го пуштиме и овој пат и со тоа конечно ова тесно грло, овој опасен пат кој има многу црни точки да биде пат кој доликува на Македонија“, рече Трајановски.

„Ова е градба за македонските граѓани, не е политичка градба, нема ниеден од политичарите да ја стави во џеб и да си ја носи дома“, рече Мицкоски
Премиерот Христијан Мицскоски, слично како и на пуштањето на патот Крива Паланка-Страцин, во говорот уверуваше дека патот не е политичка градба и оти ниеден политичар нема да си го стави в џеб и да си го носи дома туку е на граѓаните, но сепак ја искористи приликата и од бината им се заблагодари на опозициските партии кои седум години, додека беа власт, не го довршија патот, па морала оваа Влада да го заврши.
На свеченоста беше и амбасадорот на Европската Унија, Михалис Рокас, грчки дипломат кој на македонски јазик присутните ги поздрави со „Добар ден и среќна Нова година“. Патот Градско – Дреново рече дека претставува критичен дел од трансевропската мрежа која не поврзува како соседи и како партнери и дека не е само асфалт и бетон туку темел за напредокот на регионалната кохезија и заедничкиот прогрес.
За неколку дена од денес премиерот Мицкоски најави уште една свеченост – пуштање во употреба на првиот дел од пругата Куманово – Бељаковце.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гаши со честитка до Курти: Овој резултат ја претставува довербата на граѓаните во однос на визијата за развојот и безбедноста на Косово

Претседателот на Собранието, Африм Гаши упати честитка до Албин Курти, за изборите во Косово.
„Изборите во Косово сведочат за зрелоста на народот на Косово, а изборниот процес ја покажува сериозната заложба на институциите за транспарентност и демократија.
Искрени честитки до мојот пријател, Албин Курти, за достоинствената победа на Движењето Самоопределување на парламентарните избори во Косово! Овој резултат ја претставува довербата на граѓаните во однос на неговата визија за развојот и безбедноста на Косово, како и нивната благодарност за неговиот успешен мандат на чело на владата.
Исто така, честитки за граѓаните на Косово! Се надевам дека нивниот глас ќе придонесе за унапредување на социјалната заштита, како и за европската иднина на државата. Северна Македонија останува посветена на продлабочување на соработката, а нашите пријателски односи остануваат непоколебливи“, се вели во честитката на Гаши.
Македонија
ВМРО-ДПМНЕ: Додека елитата на СДС се богатеше, над пола милион граѓани донесоа на прагот на сиромаштија со по 150 денари на ден

„СДС изгубени во времето и просторот. Тешката економска состојба и пустошот којшто го оставија за седумгодишното владеење, не се средува за осум месеци. Но тоа што можеше да се поправи за толку кратко време е веќе средено. Како на пример запрен е слободниот пад на економијата која што беше вртоглав како последица на лошите економски политики на СДС. Откако се запре слободниот пад се премина на заживување на економијата, така што во третиот квартал се забележа раст на БДП од 3%, а исто таков раст или дури повисок се очекува и во четвртиот“, велат од ВМРО-ДПМНЕ.
„Развојот на економијата и растот на БДП ќе продолжи и годинава а тоа го потврдува и Народна банка која предвидува раст од 3,3 отсто. Благодарение на соодветните економски политики коишто Владата на ВМРО-ДПМНЕ ги презема успеа да ја намали и инфлацијата на ниво од 3.5%, која што во време на владеење на СДС беше двоцифрена. Посветеноста и напорната работа на владата на ВМРО-ДПМНЕ, предводена од премиерот Мицкоски веќе дава резултати и со самото преземање на одговорноста да ја води државата премина на реализирање на стратегиите осмислени за време на опозиција. Како никогаш до сега минатата година ја завршивме со историски најмногу странски инвестиции кои се очекува да бидат околу милијарда евра кои ќе го зголемат бројот на вработени“, посочуваат од партијата.
Како што велат, за само некој месец на чело на Владата, ВМРО-ДПМНЕ зголеми плати и пензии кои ќе продолжат да растат и во текот на годинава, па се до крај на четири годишниот мандат.
„Активно се преземаа мерки за намалување на цените на прехранбените производи, така што, само за време на последната новогодишна мерка, се намалија цените на над 1000 производи. А, СДС се тие коишто ги зголемија цените зголемувајќи го ДДВ на прехранбените производи од 5% на 10%. СДС исто така не треба да заборави на сиромаштијата која ја предизвика за време на нивното владеење, така што за време на нивното владеење над пола милион граѓани беа на прагот на сиромаштија кои денот го поминуваа со по 150 денари на ден. Додека СДС на власт работеше за богатење на нивната елита, делејќи им тендери во четири очи, ВМРО-ДПМНЕ посветено работи за да овозможи подобар и одржлив животен стандард за сите граѓани преку раст и развој на економијата“, завршуваат од ВМРО-ДПМНЕ.
Скопје
Стојкоски: Првата училишна спортска сала во Хром станува реалност

Општина Ѓорче Петров продолжува со успешно реализирање на проектот за изградба на првата училишна спортска сала во населба Хром. Денес, на терен, се поставуваат челичните решетки од кровната конструкција, што претставува еден од клучните чекори во завршувањето на овој долгочекуван објект, велат од општината.
„Ветувањето дадено пред жителите на Хром, денес е во процес на реализација“, изјави градоначалникот на општина Ѓорче Петров, Александар Стојкоски.
„За првпат во историјата на оваа населба, учениците ќе добијат услови за спортски активности во модерна и опремена сала, која досега им беше недостапна.
Проектот за изградба на спортската сала ќе обезбеди не само простории за физичко образование, туку и гардеробери, санитарии и хортикултурно уредување на околниот простор. Со вкупна инвестиција од 19.730.131,00 денари со ДДВ“, соопшти општината.
„До сега, околу 40% од работите се успешно реализирани, вклучувајќи завршени темели и армирано-бетонски греди, што овозможи поставување на кровната конструкција. Овој проект е само еден во низата на значајни инвестиции на општина Ѓорче Петров, кои ја потврдуваат посветеноста на градоначалникот Стојкоски во подобрувањето на условите за живот и образование во општината“, се вели во соопштението.
Покрај изградбата на спортската сала, Стојкоски најави дека во подготовка е и проектот за доградба на училиштето, кој ќе обезбеди услови за едносменска настава – уште една важна иницијатива која ќе ја подобри образовната инфраструктура.
„Продолжуваме да работиме за иднината на нашите деца. Секоја инвестиција во образованието е инвестиција во подобра иднина за целата заедница“, додаде тој.
Со оваа инвестиција, Хром не само што добива спортска сала, туку и дополнителни можности за напредок во образованието на децата, се наведува во соопштението на општина Ѓорче Петров.