Претседателката Гордана Сиљановска-Давковa денеска оствари прва работна средба со гувернерот на Народната банка, Трајко Славески, на којашто се разговараше за актуелните економски и монетарни состојби во земјата и важноста на стабилна и независна централна банка за долгорочниот економски развој.

Претседателката Сиљановска-Давкова беше информирана за монетарната политика, стабилноста на девизниот курс, инфлациските текови и состојбите во банкарскиот систем.

Таа ја истакна важноста на унапредувањето на меѓуинституционалната соработка и координацијата на економските политики со цел одржување на макроекономската стабилност и поттикнување на инвестициите и растот.

Гувернерот Славески ја нагласи определбата на Народната банка за проактивно следење на глобалните и домашните економски движења и приспособување на политиките со цел зачувување на стабилноста и довербата во финансискиот систем.

На средбата беше заклучено дека одржувањето на стабилните и претпазливи политики и конструктивниот дијалог меѓу институциите се основа за натамошен економски напредок на државата.

Ова е уште една неправда врз Македонија – не се работи за Бугарите во Уставот, туку за идентитетот и јазикот, а Бугарија е разголена пред Европа, рече премиерот Христијан Мицкоски откако Европскиот парламент го усвои извештајот за Македонија, а во кој не се споменува македонски јазик и идентитет.

„Денешниот ден не е ништо поразличен од оние претходно, од неуспешното, но исклучително важно како идентитска одредница Илинденско востание, од пркосот и трагите на идејата на Солунските атентатори, од маршевите на партизаните, од нивните упатувања на сремскиот фронт наместо да ги бранат своите огништа, овој ден е ист како и многу други. По својата суштина. Сетете се само на низата неправди во современа Mакедонија, по референдумот, промената на знамето, референцата ФИРОМ, блокирањето кон НАТО, промената на името, насилничките упади, преврати, конфликти, болната транзиција, позитивните извештаи за напредокот на земјава кон ЕУ кои остануваа да зјаат во амбисот на безизлезноста и немаа никакво значење ниту епилог, овој ден е ист таков“, рече Мицкоски.

Тој кажа дека денешниот ден ќе биде своја автентична одредница сама по себе си, на еден нов пркос, на една генерација која свесна за проблемите со неправдите на својот народ, ги идентификуваше, ги именуваше, и ги соголи и одлучи да се бори со нив пожестоко и силно.

Мицкоски вели дека Македонија е блокирана во европскиот пат од Бугарија и дека таа блокада ниту почнала денеска, ниту ќе заврши денеска.

„Но за да ја разбереме таа блокада, мора најпрво да сфатиме дека таа блокада не почна денес, ниту ќе заврши денес. Таа блокада е почната уште во 1990та година кога бугарската држава, во моменти на ембарга, беспарица, страшни војни во поранешна Jугославија, како и проблематизирање на нашата држава од страна на Грција, се случи еден гест од Бугарија, признавање на посебноста на нашата држава, но со една ограда дека не се признава јазикот и народот. Јазикот е основа на нацијата во сите теории и оттука Бугарија ја призна државата, но не го призна постоењето на нашата нација“, рече Мицкоски.

Нашите политичари и лидери, додаде тој, уште тогаш требаше да видат дека нашиот источен сосед има сосема поинаква агенда.

„Скептиците ќе речат кому му е гајле што се разголени Бугарите кога успеаја во намерите, а европските политичари пред да го направат оној предлог биле свесни за тоа, за задните намери на Бугарија. Точно е тоа. Ние тоа го знаевме. Но, јас ќе одговорам, конечно и не треба никому да му биде гајле, туку треба нам да ни е грижа да види светот, да видат народите од светот, со какви предизвици и неправди се соочуваме како држава и народ во 21виот век, и да оставиме трага за вистината зад една битка на една генерација. Ова е нашиот крушевски манифест со кој конечно мора ние самите да се мобилизираме да ги збиеме редовите и да ги мобилизираме сите пријатели и сојузници, затоа што ова е борба за фундаментални, основни човекови права и вредности. И ние сме на вистинската страна од историјата. А Бугарија видовме низ историјата дека знае и да ја утне вистинската страна“, рече Мицкоски.

Исто така, додаде тој, со жалење можам да кажам дека на површина излегоа и сите оние кои свесен сум дека се потеа додека измислуваа при наши средби изговори за наводни реформи кои треба да се донесат, и за наводно бугарско малцинство кое треба да влезе во уставот, за техникалии бегајќи од суштината.

„Сите тие се и беа свесни за вистината. Сепак тоа се политичари од врвен калибар, за разлика од Бујар, Артан, Ковачевски, Маричич, Венко и сите останати. И тие совршено знаеја што е позадината на овие барања, а поврзани со последниот предлог и со нашата интеграција во ЕУ. Да исполниме услови кои ги нема за никого. Сите знаеја, но сега само ги соочивме со нив на еден наједноставен начин“, рече Мицкоски.

Тој кажа дека бугарското малцинство не е проблем.

„И еве сега, и тоа им е на тацна и затоа не сакам никого, никогаш и никој да ми спомнува дека бугарското малцинство е проблем. Тие неколку стотина луѓе кои се чуствувале како бугари, дали биле во Уставот или не биле не се никаков проблем. Уште утре можеме да ги внесеме. Но суштината е многу подлабока од тоа. И тоа сосема јасно се виде со овие чекори кои ги превзема нашиот источен сосед низ европските ходници. Но, ќе остане запишано и за век и векови запомнето дека европскиот извештај со македонски идентитет и македонски јазик помина на АФЕТ, на комитетот за надворешна политика при европскиот парламент и денеска пред да се донесе оној срамен амандман, се најде на масата на сите европратеници коишто гласаа во рамките на Европскиот парламент. За прв пат во независна Македонија“, рече Мицкоски.

Премиерот кажа дека нема да отстапи од македонските национални интереси и тоа е завет кој ВМРО го има во својот код.

„Сакам да потенцирам и нашиот народ да биде на чисто дека нема да дозволиме да се случи ново предавство! Нема да дозволиме да се отстапи од македонските национални интереси и тоа е завет кој ВМРО го има во својот код. Јас сум само моментален функционер и претседател на оваа партија, кој превзел одговорност да служи на својот народ и да ги решава проблемите, да го подобри животот на неговите сограѓани. Работам ден и ноќ за да ја реализирам таа цел. Не е воопшто лесно. Напротив, мака мачиме да излеземе од заврзламите и компликациите во кои е втурната нашата држава, и да ги обновиме институциите и да ги создадеме овие темели на промените. Има добри индикатори, кои ни влеваат оптимизам, сеуште е многу рано народот тоа да го почувствува и свесен сум, но со работа и резултати, но пред се со одговорен искрен и чесен однос, вака со кажување на вистината и работите какви што се, јас сум оптимист дека за Македонија доаѓаат подобри времиња“, рече Мицкоски.

По повод неодамнешната одлука на Владата за одземање на спортската сала „Наум Наумовски Борче“, која досега беше во владение на Општина Карпош, денеска пред медиумите со своја реакција излезе градоначалникот Стевчо Јакимовски, кој остро го осуди овој потег на извршната власт.

„На седми јули во понеделникот, во време на годишни одмори во 15:33 часот, ни стигна порака од министерот за спорт и млади, дека со одлука на Влада која е донесена на 17 јуни, се одзема од локалната самоуправа спортската сала ,,Наум Наумовски-Борче”, или како што граѓаните популарно ја знаат „Партизан“, и истата се дава во владение на Министерството за спорт и млади. Општина Карпош се противи на оваа одлука, а во таа насока денеска и Советот донесе одлука во која што сите советнички групи, значи и Социјалдемократскиот сојуз и независните советници, како и Левица и ГРОМ, гласаа против одземањето на оваа спортска сала и бараат да се искористат сите правни средства за ова да се спречи. Нормално, против беше само советничката група на ВМРО-ДПМНЕ за која што не ни очекувавме да ја поддржи одлуката, бидејќи тие не мислат за граѓаните туку мислат само за својата партија и за своето раководство“, посочи Јакимовски.

Првиот човек на Општината објасни дека спортската сала и е предадена во владение на локалната самоуправа во декември 2023 година, каде веднаш по примопредавањето се констатирани бројни недостатоци.

Тој обелодени дека откако го доставил дописот до надлежните, оттаму не добил никаков одговор од нив, по што телефонски разговарал со министерот Борко Ристевски и го замолил да дојде за заедно да направат обиколка на спортската сала и да се договорат во која насока да интервенираат.

-„Сакав да утврдиме доколку се согласува да ги покрие трошоците за реквизити и за останати потребни услови за користење, во ред, доколку не, тогаш да преземе Општината. Тој се согласи и рече дека ќе дојде, па по извесно време повторно го побарав не одговараше, па уште два пати го побарав пак не одговараше. На 25-ти ноември му праќаме допис за истите недостатоци, а во исто време Општина Карпош буџетира средства од буџетот на Карпош за набавка на реквизити. Набавивме мрежа за одбојка, рип-столи, отскочни даски, греди, поставивме клупи, и се она што е потребно за да функционира една спортска сала и ја ставивме во фукнција. Ученичките спортски игри се одвиваа токму тука од крајот на март до крајот на мај и во исто време распишавме и конкурс за сите спортски клубови и поединци кои се заинтересирани за користење на оваа спортска сала“, рече Јакимовски.

Тој напомена дека според неговите проценки Општина Карпош на годишно ниво треба да издвојува околу 100.000 евра, за овој култен објект да функционира.

Градоначалникот на Карпош ги повика сите сограѓани вечерва од 19:30 часот да се придружат на мирниот протест пред спортската сала „Партизан“ за да го искажат својот револт од оваа како што самиот вели, небулозна одлука на Владата, каде без никаква комуникација со локалната самоуправа донесува одлука, што е спротивна на интересите на граѓаните на Општина Карпош.