Судењето против Раде Трајковски-Штекли и уште девет лица обвинети за трговија со дрога, доцни поради негова хоспитализација.

Трајковски бил пренесен на Клиниката за неврологија поради здравствени проблеми, соопшти судијата Илија Трпков. Во известувањето е наведено дека Трајковски утрово бил неконтактибилен и дезоринетиран.

Обвинетите се товарат за организирана трговија со кокаин и марихуана на територијата на Скопје. Судскиот процес ќе почне по 11 часот, доколку Трајковски биде спроведен во судот.

Министерот за надворешни работи и надворешна трговија, Тимчо Муцунски, вчера и денес престојува во повеќедневна посета на Лондон, Обединетото Кралство.

Во рамки на посетата, денес ќе оствари средба со државниот секретар за надворешни работи, Комонвелт и развој на Обединетото Кралство на Велика Британија и Северна Ирска, Дејвид Лами.

По средбата, предвидено е да биде потпишана Заедничка декларација за стратешко партнерство помеѓу Република Северна Македонија и Обединетото Кралство на Велика Британија и Северна Ирска.

Оваа декларација има за цел да ги зајакне стратешките билатерални односи меѓу двете земји, вклучително и соработката во областа на надворешната политика, безбедноста и одбраната, особено во рамките на НАТО, правдата и внатрешните работи, борбата против тешкиот и организираниот криминал, справувањето со корупцијата и незаконските финансиски текови, како и економскиот раст.

Целта на посетата е интензивирање на севкупните билатерални односи преку зајакнување на политичкиот дијалог и продлабочување на економската соработка меѓу двете земји.

„И големата лага дека ќе ги затворат казината и обложувалниците излезе на површина. За година ипол ги зголемија казината и обложувалниците, а сега, со закон, ВЛЕН и официјално стана кум на коцката“, велат од ДУИ.

„Измамниците од ВЛЕН со години трубеа дека ќе ги затворат казината и обложувалниците заедно со онлајн коцкањето, за на крај да завршат токму таму каде што ние секогаш укажувавме дека припаѓаат, во прегратките на индустријата на игрите на среќа.

Не можеше да биде поинаку кога главни спонзори на нивната кампања и на нивните партии се токму од индустријата на коцкање.

Членови на ВЛЕН се сопственици на казина и обложувалници и се спонзори на законот што ја штити и ја легализира нивната индустрија.

Ниту едно казино не се затвора, ниту една обложувалница не се затвора, онлајн коцкањето цвета во времето на вазалите од ВЛЕН.

Законот што го предложи Европскиот фронт за целосно затворање на игрите на среќа, ВЛЕН и ВМРО го одбија. Денес усвоија уште послаб закон од оној што го блокираа во претходниот парламентарен состав, во служба на нивните газди од коцкарската индустрија.

Секој нивен збор е лага, секое нивно ветување е измама, секое нивно дело е неуспех! Одговорноста доаѓа наскоро!“, се наведува во соопштението на ДУИ.