Претседателот Стево Пендаровски, по повод големиот христијански празник Богојавление – Водици, упати честитка до поглаварот на Македонската православна црква – Охридска архиепископија, г.г. Стефан и до сите православни христијани.

„Богојавление нè потсетува на значењето на светата тајна на крштевањето како еден од столбовите на христијанската вера. Преку овој чин на ново, духовно раѓање се потврдува смислата на суштествувањето на секој верник. Да не дозволиме во постојаната борба со материјалните предизвици нашите животни врвици да останат без идејна и морална крепост и да продолжиме да се стремиме кон зачувување на духовните вредности“, се наведува во честитката на претседателот.

Пендаровски на членовите на Светиот архиерејски синод и на сите православни верници им посакува празникот да го минат во мир, радост и среќа.

„На Водици кога се осветуваат водите, посакувам најискрено во срцата на сите верници да се вселат мирот, хармонијата, љубовта и милосрдието кои ќе ги споделуваме со сите наши сограѓани придонесувајќи за наша лична и добробит на целата заедница“, истакнува претседателот.

Времето во државава утрово е умерено до значително облачно со магла во одделни котлини, информираат од управата за хидрометеоролошки работи.

Во текот на денот ќе биде променливо облачно, а во западните делови на повисоките места и на планините ќе има услови за повремен снег. По одделни котлини ќе има појава на магла. Ќе дува слаб до умерен северен ветер.

Максималната температура ќе се движи во интервалот од 0 до 7 Целзиусови степени.

Во Скопје, магливо и тивко. Максималната температура ќе достигне до 3 степени.

Поради манифестациите што ќе се одржат по повод верскиот празник Водици, сообраќајната полиција при СВР Скопје ќе воведе посебен режим на сообраќај на одредени улици во централното градско подрачје, како и во општините Ѓорче Петров, Аеродром и населбата Хром.

Како што информираат од МВР, во периодот од 10:00 часот па до завршувањето на настаните по повод Водици, во центарот на Скопје за сообраќај ќе бидат затворени улиците Филип Втори Македонски до булеварот Гоце Делчев и кеј 13 Ноември до булеварот Кочо Рацин.

Во општината Ѓорче Петров од 10:00 часот црковната литија ќе се движи почнувајќи од црквата „Свети Петар и Павле“, десно по булеварот Партизански одреди, десно по улицата Ѓорче Петров, лево по улицата Васил Чакаларов, како и од црквата „Свети Пантелејмон“ по улицата Демир Трајко и лево по улицата Васил Чакаларов до Железничкиот мост на реката Вардар.

Во општина Аеродром од 10:00 часот за сообраќај ќе биде затворен локалниот пат кон сeло Лисиче.

МВР апелира до граѓаните да ги почитуваат наредбите што ги издаваат полициските службеници.