„Предлог-законот за установите за средно образование на верските заедници, што очигледно ВМРО-ДПМНЕ го турка со цел да исполни желба на својот политички партнер, е противуставен. Додворувањето на владејачката коалиција ВМРО-ДПМНЕ – ВЛЕН на најголемите верски заедници, МПЦ и ИВЗ, оди директно спротивно на уставниот поредок и принципот на одвоеност на верата од државата“, кажа Кристина Костова, потпретседателка на СДСМ.

„Обидот на ВМРО-ДПМНЕ да ги интегрира верските училишта во јавниот образовен систем претставува директно кршење на уставноста и на принципот на секуларност кој е длабоко загрозен од ваквиот потег на власта.

Потсетуваме дека само пред неколку месеци Уставниот суд ја укина Одлуката на Владата за давање одобрение за основање на Приватно средно училиште „Медресеја Иса Беу“во Кондово.

Сега, одејќи спротивно на одлуката на Уставниот суд и на уставниот поредок, ВМРО-ДПМНЕ се обидува да ги озакони противуставните одлуки на Владата.

Социјалдемократскиот сојуз на Македонија нема да даде поддршка на Предлог-законот за установи за средно образование на верски заедници.

Нагласуваме дека, Предлог-законот е спротивен на Уставот кој јасно ја гарантира секуларноста на државата и ја одвојува верата од образованието како дејност од јавен интерес.

Овој предлог-закон директно го прекршува членот 7 од Законот за средно образование, според кој во средните училишта е забрането верско организирање, дејствување и истакнување на верски обележја.

Дополнително, предлогот создава нерамноправен третман и дискриминаторски услови со тоа што фаворизира конкретни институции, православната богословија и исламската медреса, и на тој начин отвора можност за воспоставување на паралелен образовен систем надвор од стандардите на државното образование.

Прашуваме, дали е прифатливо ученици со програма која содржи доминантен наставен план со верски содржини, да се стекнуваат со диплома еквивалентна на гимназиска, и потоа да се запишуваат на факултети за медицина, право, општествени и природни науки?

СДСМ укажува дека верските училишта веќе имаат регулиран статус преку Законот за правна положба на црква, верска заедница и религиозна група, каде е прецизирано дека тие имаат право да основаат образовни установи за школување свештени лица, но не и за општо средно образование. Овој закон е lex specialis и не може да биде дерогиран со нов закон кој би го проширил нивниот опсег надвор од првичната намена.

Очигледно е дека ВМРО-ДПМНЕ се обидува да протурка закон кој не е во согласност со уставниот поредок и законските одредби, исполнувајќи политички желби на својот коалициски партнер, без почитување на уставните и образовните принципи, и на јавниот интерес.

Заради сите наведени причини, СДСМ нема да учествува во амандманска расправа по предложениот закон, ниту ќе прифати да даде легитимитет на содржината која се коси со Уставот, законите и демократските вредности на секуларна држава“, изјави Кристина Костова, потпретседателка на СДСМ.

Министерот за внатрешни работи Панче Тошковски присуствуваше на промоцијата на новоформираната специјализирана Единица за сајбер безбедност на Министерството за внатрешни работи.

„Во време на брза дигитализација и се поопасни и пософистицирани сајбер закани, Министерството за внатрешни работи презема стратешки и решителен чекор, за првпат во своето постоење, формира специјализирана Единица за сајбер безбедност. Оваа единица ќе биде клучен столб во одбраната на дигиталниот суверенитет на МВР како институција која управува со најголемиот и најсензитивниот обем на лични податоци на граѓаните на државата. Безбедноста на овие системи е прашање не само на институционален капацитет, туку и на државна стабилност и доверба на граѓаните. Сите активности на новоформираната единица се насочени кон унапредување на безбедноста и отпорноста на внатрешната ИТ-инфраструктура на самото Министерство, со фокус исклучиво на заштита на неговите информациски системи. За првпат, Министерството набави современа техничка и софтверска опрема за проактивно следење, детекција и превенција на сајбер напади, со што поставува темели на системска и долгорочна заштита.“, потенцираше министерот Тошковски.

Министерот Тошковски информираше дека новата Единица за сајбер безбедност ќe биде одговорна за сеопфатна заштита и мониторинг на информациските системи на МВР, ќе врши постојана анализа и навремено детектираее на сајбер закани, ќе врши инсталација, одржување и менаџмент на безбедноста на ИТ инфраструктурата на министерството.

Со оваа иницијатива, МВР поставува нов стандард во сајбер одбраната кој подразбира модерен, одржлив и цврст безбедносен штит кој одговара на предизвиците на денешницата и обезбедува доверба кај јавноста дека податоците на граѓаните се под највисока заштита.

Исто така денеска министерот Тошковски заедно со деканот на Факултетот за информатички науки и компјутерско инженерство (ФИНКИ), проф. д-р Боро Јакимовски, потпишаа меморандум за соработка помеѓу Министерството и Факултетот. Целта е размена на знаења, искуства и едукација, како и унапредување и доусовршување на кадарот во областите каде што двете институции имаат заеднички интереси. Ваквата соработка претставува уште еден чекор кон јакнење на техничките и човечките капацитети на МВР и поддршка на дигиталната трансформација на институцијата, со крајна цел – подобри и побрзи услуги за граѓаните.

По приклучувањето на Факултетот за информатика од Штип кон институционалните заложби за воведување на вештачката интелигенција во националниот образовен систем во Македонија, од денес соработници на Министерството за образование и наука во остварувањето на оваа цел се и приватната високообразовна установа и друштвото за интернет едукација, кои работат под брендот Бреинстер.

На конференција на која беше потпишан трипартитен меморандум за соработка, министерката за образование и наука проф. д-р Весна Јаневска изрази задоволство што раководствата и кадарот на овие два едукативни субјекта, покажаа висок општествена одговорност и силна волја со своето знаење и стручност да им помогнат на министерството, Бирото за развој на образованието и Центарот за развој на стручното образование во интегрирањето на оваа технолошка иновација во наставните програми во средните училишта во државата.

„Примарниот фокус на меморандумот што денес го потпишуваме е поддршка за воведување на вештачката интелигенција во средните училишта. Важно е нашите ученици да знаат етички да ја применуваат при остварувањето на образовни и професионални цели. Но, Бреинстер ќе помогне и во интегрирање на претприемништвото како област и тема во наставните програми во средното образование и јас им благодарам за подадената рака“, рече Јаневска.

Потсети дека МОН и Факултетот за информатика во Штип веќе подготвуваат документ со насоки за наставниците и за учениците околу примената на вештачката интелигенција од септември, што, како што рече, ќе биде увертира на воведувањето на конкретни теми во наставните програми во секое одделение.

„Развојот на националниот образовен систем и грижата за создавање на квалитетни и добро едуцирани млади генерации е обврска на цело општество. И затоа, драго ми е што општествената одговорност постојано се зголемува, а институциите добиваат нови партнери“, додаде министерката.

Основачот на Бреинстер групацијата, Петар Ниновски потенцираше дека за нив ова е значаен ден бидејќи се формализира соработката со МОН и се прави голем чекор напред кон системски пристап во воведување на вештини поврзани со познавањето на вештачката интелигенција во средното образование.

„Веруваме дека заеднички можеме да изградиме образовен систем што не само што ги следи светските трендови, туку и активно учествува во нивното дефинирање. Среќни сме што државата го препозна потенцијалот кој го поседуваме и особено сме благодарни на министерката Јаневска за покажаното лидерство и визија. Младите заслужуваат квалитетна подготовка за да може да создаваат подобра иднина за Македонија. Чест ни е што сме дел од овој процес на трансформација на општеството“, потенцираше Ниновски.