Владата ја разреши директорката на Управата за финансиско разузнување

По само шест месеци директорување, Владата во петокот ја разрешила актуелната директорка на Управата за спречување перење пари и финансиско разузнавање, Ангела Атанасова.

Според информациите на Макфакс, разрешувањето се случило во петокот и не се познати причините за кадровската смена, ниту кој ќе биде нејзин наследник.

И покрај неколкуте обиди во изминативе два дена да добиеме потврда од владиниот портпарол, Александар Ѓорѓиев, тој не одговори на неколкуте наши телефонски позиви, како и на испратената смс порака.

Макфакс,сепак, доби неофицијална потврда за смената на Атанасова бидејќи сега веќе ексдиректорката не се појавува на работа, а вработените слушнале за смената.

На веб-страницата на оваа институција сè уште како директор фигурира името на претходниот директор,Владимир Атанасовски.

Тој дојде на местото на Љупчо Андоновски за директор на УБК на први септември минатата година.Јавноста го запозна по „ноќната епизода“ во УБК,кога тимот на СЈО предводен од обвинителката Катица Јанева со судски налог бараше увид во податоците на оваа служба околу незаконското прислушување.

Неодамна, Атанасовски беше казнет до казна од 2.500 евра,токму околу несоработката со СЈО.

Инаку, разрешената директорка Ангела Атанасовска дојде во Управата од позиција на прв човек на „Службен весник“.

По заминувањето на Атанасовски, институцијата цел месец беше без директор,па беше доведена во прашање и исплатата на платите бидејќи немаше кој да ги потпише списоците.

Не е познато дали причината за смената на Атанасова е незадоволство од нејзината работа или, пак,владејачката гарнитура има потреба од „партиски кадар со поголема доверба“..крај/мф/гд