Претседателот на СДСМ и премиер, Зоран Заев, и претставникот од ДУИ и министер за економија, Крешник Бектеши, повикаа на двојна победа во Дебар со оглед дека во општината следуваат и претседателски и локални избори – граѓаните да ги поддржат заедничкиот претседателски кандидат Стево Пендаровски и градоначалничкиот кандидат Хекуран Дука.

„Се здруживме дома, донесовме важни одлуки, одржавме европски лекции, без калкулантство. Да си го задржиме народот, младите. Дојден сум да побарам поддршка да си го држиме единството“, порача Заев, кој посочи дека Дебар отсекогаш бил пример за соживотот во нашата држава.

Тој повика на посебна внимателност за кого гласаат граѓаните бидејки гласот за Река е глас за Силјановска, а тоа води назад.

„Јас го почитувам Блерим Река, но го фати национализмот на Зијадин Села и се здружи со Силјановска. Албанците не гласаат за ВМРО-ДПМНЕ затоа што од ВМРО-ДПМНЕ не ги сакаат, не ги гледаат рамноправно. Однапред прават математики како Села да му помогне на Мицкоски. Затоа, фрлање во кош е гласот за Река. Гласот за Река ја крева Силјановска. Нас ни треба да ечи гласот на нашиот народ. Затоа, да гласаме за кандидатот за градоначалник, Дука, и за претседателскиот кандидат Пендаровски“, додаде Заев.

И кандидатот за градоначалник, Хекуран Дука, и претставникот од ДУИ и министер за економија, Крешник Бектеши, повикаа на заедништво и продолжување напред.

„Ќе бидам еднаков за сите и ќе ги поттикнувам сите млади да работат заедно на развојот на Дебар. Гласајте за мене и за консензуалниот кандидат за претседател, Стево Пендаровски“, повика градоначалничкиот кандидат Хекуран Дука.

„Работиме на заеднички перспективи, без предрасуди, за перспективи на сите граѓани во нашата заедничка држава, за економски развој, за напред кон НАТО и ЕУ. Да ги поддржиме градоначалничкиот кандидат Хекуран Дука и заедничкиот кандидат Стево Пендаровски“, рече претставникот од ДУИ и министер за економија, Крешник Бектеши.

Кандидатот за претседател, проф. д-р Гордана Силјановска-Давкова, вечерва се сретна со граѓаните во Штип.
Таа им се заблагодари на поддршката што ѝ ја даваат во текот на оваа изборна кампања, затоа што ѝ даваат дополнителна сила за да победи, сè со цел правдата да преовладее во државата.

„Една е нашата татковина Македонија. А татковина не се менува. Татковината не трпи придавки, не ѝ личат. Никогаш во историјата, ниту на Илинден, ниту на АСНОМ, ниту на 8 Септември, ниту некој се борел, ниту некој мечтаел, ниту некој сонувал, ниту некој се радувал на Северна Македонија“, порача Силјановска-Давкова.

Таа додаде дека не е национализам да кажете дека нешто што немало корен не може да фати корен во срцето, ниту може да го прими умот, па ни здравиот разум. Нема мести за придавки.

„Јас ве уверувам дека договорите се важни, меѓутоа со договор не може да се крши Уставот, ниту договорот може да опстои ако е спротивен на она малку меѓународно задолжително право. Не, договорите не се ни Библија ни Куран, секој народ си има право на самоопределување, така и македонскиот“, појасни Силјановска-Давкова.

Посочи дека правото на самоопределување на секој народ и нација е непотрошно право. Него го нема ако ги нема внатре името, знамето, химната и својот Устав. Власта се откажа од тоа, ама не можае да се откаже во име на македонскиот народ. Бидејќи народот е носител на суверенитетот, а не власта.

„Првиот митинг го одржавме во мојот роден град Охрид, последниот во славниот Штип. Штип со херои, Штип со државници. Штип во кој дури првиот човек на партијата што е на власт рече и напиша дека Македонија е сè што имаме, а сега власта го заборави тоа. За нив, Македонија е сè што немаме, ама ние ќе ја вратиме Македонија зашто тоа е сè што имаме“, нагласи Силјановска-Давкова.

Силјановска-Давкова рече дека на 21 и на 5 мај граѓаните гордо за гордата Македонија ќе гласаат и ќе победи. Бидејќи крајот на власта е на повидок, а нејзината победа веќе е на дофат.

„Не може претседателот да направи сè, јас не мислам дека претседателот треба да има повеќе функции од овие. Се плашам дека на Балканот власта, особено кога е лична, може да се употреби и да се злоупотреби. Ама за да прерасне македонската пролет во македонски европски реформи, победата ќе значи отворање на новата ера по предвремените парламентарни избори. А тогаш сето она за што страсно разговараме и се договараме дека мора да се случи, а е невозможно без правна држава, без просперитетна економија, без квалификувана државна и јавна администрација, со остра битка со корупцијата и криминалот, што е нивно секојдневие, со битката со фамилијаризацијата на демократијата, наречена невиден непотизам, ќе доведе до отворање нова страница од македонската историја“, нагласи Силјановска-Давкова.

Појасни дека од срце посакува Македонија да добие датум на преговори за влез во ЕУ, ама умот ѝ вели тоа не е можно. Не е доволно да имате договор во рацете за да се влезе во ЕУ, треба да се има европски капацитети. Треба да се има европска кондиција, треба да се почитуваат европски вредности, но нив ги нема, за жал. И сето тоа на власта ќе ѝ се соопшти набргу.

„Тогаш што останува, останува по успешните претседателски избори и по успешните предвремени парламентарни избори, за кои се надевам дека премиерот ќе го додржи зборот овој пат, барем по тоа да остане запомнат дека еднаш го исполнил она што го ветил. Е, тогаш ќе можеме навистина заедно да градиме држава со правда и правдина“, нагласи Силјановска-Давкова.

Силјановска-Давкова на граѓаните во Штип и во Македонија им вети дека кога ќе победи на претседателските избори ќе се избори светлината на правото и правдината да завладее во Република Македонија и да се стави крај на заевизмот, кој ѝ нанесе само зло на државата.

Вечерва, претседателот на ВМРО-ДПМНЕ, Христијан Мицкоски, се обрати на митинг пред граѓаните од општина Пробиштип.
Мицкоски рече дека СДСМ воопшто не ги исполнил ветувањата што ги даваше пред граѓаните и дека мисли на граѓаните од едни избори на други и дава лажни ветувања.

„Ова не се само претседателски избори, затоа што можеби за врхушката на СДСМ ова се претседателски избори бидејќи тие за народот и за државата мислат од едни до други парламентарни избори, а потоа, ако им помина лагата, ако им помине измамата, тогаш фино заседнуваат во меките фотелји и, се разбира, за пусти пари се работело, тоа е целта, нема друго. Но, ние сме поинакви од нив, ние легнуваме со последна мисла за татковината и народот и се будиме со прва мисла за татковината и народот. Затоа, сакам да ги потсетам на сето она што го ветуваа, на сето она што го зборуваа, да ги потсетам сите оние снимачи кога ќе го прегледуваат денешниот настан, дали кога ќе го прегледуваат, ќе се засрамат од сите оние кажани лаги“, кажа Мицкоски.

Претседателот на ВМРО-ДПМНЕ истакна дека на 21 април, а потоа и на 5 мај, ВМРО-ДПМНЕ победува убедливо на претседателските избори.

„Сакам овде во Пробиштип да ја соопштам онаа добра вест што изминативе 20 дена интензивно секаде во Македонија во домовите се зборува. А тоа е дека на 21 април, а потоа на 5 мај, ќе победиме со толку голема разлика што нема да знаат што ги снашло. Победа најпрвин на претседателските избори, а потоа победа на предвремени парламентарни избори“, истакна Мицкоски.

Тој исто така објасни дека состојбите во земјоделството се катастрофални и дека сите ветувања од гарантиран откуп до повисоки цени на производите и повисоки субвенции се само лаги на СДСМ на чело со Зоран Заев.

„Земјоделците мораат со пили да ги сечат крошните на јаболкниците затоа што немаат кому да му го продадат родот бидејќи еден килограм јаболка е 1 денар. Но, истовремено нè потсетија на сите лаги на Зоран Заев, сите лаги на Зоран Заев, дека ќе има загарантиран откуп, дека ќе има честита цена за трудот на земјоделецот, дека ќе има зголемени субвенции и поддршка за земјоделецот. Две години потоа овој политички измамник се срами и дури да спомене за ова ветување“, објасни Мицкоски.

Мицоски истакна дека поради катастрофалната состојба во земјата, предизвикана од владеењето на СДСМ и Зоран Заев, голем број луѓе се иселуваат од државата и тоа зазема сè поголем интензитет и замав.

„Разговаравме со нашите сограѓани, болката е голема, се сеќавате на овие ветувања пред Владата кога ги поставуваа чевлите дека луѓето се иселуваат. Во Виница луѓето ни соопштија дека само два дена пред ние да дојдеме повеќе од 500 луѓе ја напуштиле Македонија и заминале на друга дестинација во Европа. За една година 100.000 наши сограѓани ја напуштија Македонија и никогаш не се вратија“, рече Мицкоски.

Тој појасни дека ситуацијата во земјата е трагична и дека Македонија се движи во многу лоша насока и повика на масовен одѕив на претседателските избори за да се стави крај на оваа голгота низ која поминуваат граѓаните.

„Ситуацијата е трагична, Македонија, браќа и сестри, добри луѓе, се движи во многу лоша насока. Да не биде после дека повторно ние сме предупредиле, а тоа било само во нашите умови. Ајде заедно масовно да излеземе на 21 април, а потоа и на 5 мај. Онаа пролет, што ја најавивме во Охрид, да ја донесеме во Македонија, да ја обоиме со името на идниот претседател на Републиката, професорката Гордана Силјановска-Давкова“, рече Мицкоски.

Тој потенцира дека ВМРО-ДПМНЕ има јасна визија, програма, методологија и тим што знае како да ги направи неопходните реформи во државата на чело со кандидатот за претседател, професорката Гордана Силјановска-Давкова.

„Правна држава, враќање на правото и враќање на правната држава. Па има ли поголем гарант од идниот претседател на Републиката дека имаме јасен план, јасна визија, тим и методологија како да направиме вистински реформи за враќање на владеењето на правото и правната држава, од најинспиративниот професор на Правниот факултет, а тоа е идниот претседател на Републиката, професорката Гордана Силјановска-Давкова“, потенцира Мицкоски.