Опозицискиот Социјалдемократски сојуз на Македонија (СДСМ) обвини дека лидерот на ВМРО-ДПМНЕ, Христијан Мицкоски, ангажирал странска приватна разузнавачка компанија за следење на опозицијата и, како што велат, фабрикување афери.

Во соопштението се наведува дека станува збор за Black Cube, израелска приватна разузнавачка компанија, која СДСМ ја опишува како „приватен Мосад“, позната по „следење, собирање информации, провокации и фабрикување афери против политички цели“.

„Мицкоски и неговата група ја ангажирале оваа компанија за да ги следи функционерите на СДСМ, особено претседателот Венко Филипче“, се наведува во соопштението.

Од СДСМ тврдат дека тим на „Black Cube“ неодамна престојувал во Скопје и одржал состаноци во хотел, на кои, како што посочуваат, присуствувал и бизнисмен близок до ВМРО-ДПМНЕ, кој требало да го финансира ангажманот.

Партијата оценува дека целта е „да се следи опозицијата, да се собираат информации и да се фабрикуваат афери за да се дискредитира СДСМ“.

Во соопштението се прави и споредба со Унгарија, при што се наведува дека вакви методи претходно биле користени од Виктор Орбан, а се споменуваат и наводни активности поврзани со избори во други земји.

„Ова не е случајност. Ова е класичен автократски модел: кога легалните инструменти не функционираат, се ангажираат приватни разузнавачки агенции за да се прават лажни афери и да се заплашува опозицијата“, наведуваат од СДСМ.

Во реакцијата се додава дека, и покрај овие наводи, партијата ќе продолжи да инсистира „на вистината, на независното правосудство и на европскиот пат на Македонија“.

ВМРО-ДПМНЕ обвини дека Венко Филипче и СДСМ стануваат сѐ поарогантни и дека делуваат целосно отуѓени од реалноста, оценувајќи дека наместо да се занимаваат со состојбите во Македонија, се фокусираат на политички случувања во други држави.

„Чекаме Филипче и СДС да расчистат со политичките случувања во другите држави, за да се вратат во реалноста и да почнат да бидат опозиција во Македонија“, велат од партијата.

Во соопштението се наведува дека СДСМ не се соочува со сопствените слабости, „и покрај реакциите од јавноста дека Филипче ја води партијата во бездна“, како и покрај јавните настапи на нивни поранешни членови и функционери.

ВМРО-ДПМНЕ се осврнува и на изборите во Унгарија, наведувајќи дека по победата на партијата Тиса, која според нив е сестринска партија на ВМРО-ДПМНЕ, а не на СДСМ, опозициската партија „очајнички бара некоја утеха занимавајќи се со избори во друга држава и туѓи политички приказни“.

„Филипче на пример, се однесува како тој лично да има удел во победата на таа партија. Од друга страна, сестринската партија на СДСМ, на истите тие избори доживеа дебакл. За тоа досега нема коментар“, се вели во реакцијата.

Од ВМРО-ДПМНЕ понатаму посочуваат дека Филипче коментирал и за стратешкиот договор со Велика Британија, тврдејќи дека станува збор за договор за носење мигранти во земјава, но дека по демантите од институциите и од британскиот амбасадор, „останаа без коментар“.

Во реакцијата се споменуваат и тарифите од страна на САД, при што владејачката партија наведува дека по потпишувањето заедничка изјава со САД и намалувањето на тарифите, од СДСМ повторно немало коментар.

„На никој не му е јасно што прави Филипче. На Филипче не му е јасно што прави Филипче“, стои во соопштението, каде ВМРО-ДПМНЕ оценува и дека тој ги продолжува, како што велат, „антидржавните политики“ од времето на Зоран Заев.

Во продолжение, партијата наведува дека СДСМ се скарала со сопартијци, оттурнала поранешни функционери, влегла во конфликт со медиуми и новинари, а сега, како што тврдат, „отворено иницира кавги со други држави и нивни претставници во земјава“.

„СДСМ се сведе на 130 илјади гласови по локалните избори минатата година, а ќе се сведе на уште помалку на следни избори, според тоа како Филипче ја води партијата“, наведуваат од ВМРО-ДПМНЕ.

Во соопштението се додава дека преку, како што велат, „ПР-от на Башановиќ истата матрица продолжува“, обвинувајќи дека СДСМ се занимава со лаги и конструкции и постојано се претставува како жртва.

„СДС и Венко Филипче да почнат да се занимаваат со партијата, затоа што со ова темпо ќе ја доведат до раб на исчезнување“, порачуваат од ВМРО-ДПМНЕ.

Демократската унија за интеграција (ДУИ) алармира за сериозен пад на странските директни инвестиции во Македонија, повикувајќи на политичка одговорност од актуелната власт.

Според партијата, во 2025 година инвестициите се намалиле за 61% во однос на претходната година, достигнувајќи вредност од 468 милиони евра, што го оценуваат како „еден од најслабите резултати во регионот и тежок сигнал за економијата на државата“.

Во соопштението се нагласува дека странскиот инвеститор бара правна сигурност, функционални институции, политичка стабилност, професионална администрација и јасна евроатлантска перспектива, додавајќи дека „кога државата создава неизвесност, политички тензии и недостаток на стратешка насока, капиталот избира други дестинации“.

Од ДУИ предупредуваат дека последиците од ваквиот пад се директни и сериозни: „Падот од 61% значи помалку работни места, помало производство, помали можности за повисоки плати и помалку шанси за младите“.

Партијата ја критикува Владата дека наместо ветениот економски развој и рекордни инвестиции, резултатите се спротивни, наведувајќи дека „внатрешната политичка изолација, влошувањето на меѓуетничките односи, затегнатите односи со меѓународните партнери и застојот на европскиот пат создаваат директни економски последици“.

„За оваа состојба мора да има јасна политичка одговорност. Влада која за кратко време ја носи државата на дното во регионот по странски инвестиции, нема кредибилитет да бара трпение од граѓаните“, се наведува во соопштението.

Од ДУИ порачуваат дека „оставката на оваа влада е првиот неопходен чекор за враќање на довербата, стабилноста и развојната перспектива на државата“.