Голем број дејства, реконструкција, проверки – но три месеци ниту трага ниту глас од внукот на Бошкоски

По изминати речиси три месеци од грабнувањето на Самоил Костадиновски, внук на Љубе Бошкоски, од него нема ниту трага ниту глас. Институциите тврдат дека трагаат по него, осомничените и натаму тврдат дека се невини и немаат никаква поврзаност, а родителите бараат каква било информација за грабнатиот. Од скопското Обвинителство за „Макфакс“ посочуваат кои дејства ги презеле, но не одговараат дали истрагата напредува за Костадиновски да биде најден.

„Во рамките на огромниот број дејства што Основното јавно обвинителство Скопје ги презема со цел пронаоѓање на лицето и обезбедување докази беше извршена и реконструкција на целиот настан во согласност со проверките направени до овој момент. Обвинителството крајно посветено работи на расчистување на настанот“, велат од Обвинителството за „Макфакс“.

Притворот за осомничените скопјани, во чиј автомобил Костадиновски последен пат бил снимен како влегува, се продолжува од месец на месец. Обвинителството тврди дека тие може да избегаат, да скријат докази, да влијаат на сведоци – Кривичниот суд смета дека сомневањата се оправдани и треба да останат во затворот во Шутка.

„Макфакс“ претходно објави дека осомничените скопјани во затворот стигнале и до телефон, остварувале комуникација со лица од надвор, која не доведе до Костадиновски, но доведе до апсење дилери на дрога. Дополнително, обвинителот направи и реконструкција – осомничените кажуваа каде го возеле Костадиновски, но и каде го оставиле.

Костадиновски исчезна на почетокот од март. Во полиција пријави неговиот повозрасен брат.