Времето утре ќе биде претежно облачно, на југ со сончеви периоди, а со повремен дожд претежно во северните делови од земјата. На планините врнежите ќе бидат од снег, а повремен снег ќе има понекаде и на повисоките места.

Во северните делови ќе дува слаб до умерен северен ветер, а слаб јужен во јужните делови од земјата. Минималната температура ќе биде во интервал од 0 до 5, а максималната од 6 до 11 степени.

Во Скопје, претежно облачно со повремен дожд особено попладне. Ќе дува слаб до умерен ветер од северен правец. Минималната температура ќе се спушти до 3, а максималната ќе достигне до 8 степени.

Утре и во среда ќе преовладува променливо облачно време и особено на северозападот со повремени врнежи од дожд, а на планините и на некои повисоки места со повремен снег. Преку ноќта кон среда и во среда во северните делови на планините ќе се формира дополнителна снежна покривка, а мала снежна покривка ќе се формира и понекаде на повисоките места.

Од овој влажен бран врнежите ќе бидат пообилни на западот (над 25 л/24ч) особено во ноќта кон среда и во среда претпладне кога во републиката ќе започне да дува и повремено силен северозападен ветер (над 65 км/час). Потоа следува период на стабилно и сѐ потопло време.

Министерот за здравство, Венко Филипче, денеска зборуваше за засилувањето на мерките со цел заштита од понатамошно проширување на коронавирусот.

Претходно, министерот најави дека по предлог на Комисијата за заразни болести до Главниот координативен кризен штаб предложил воведување полициски час, почнувајќи од среда, во периодот од 22 до 5 часот наутро.

Филипче во изјавата истакна дека мерките кои во моментов важат во угостителските објекти се доволни и ги повика инспекторатите да ги употребат зголемените ингеренции и почесто да вршат контрола за почитување на протоколите.

„Во угостителските објекти има протоколи и сè што треба е само да се почитуваат, а инспекторатите, свесни сме дека се нон стоп на терен и дека е голем притисокот, но ги повикувам колку може таа работа да се интензивира во смисла на контрола и проценка дали се почитуваат препораките или не. Угостителските објекти работат со протоколи, сосем доволни во својство на стандардните принципи за да се спречи ширењето на болеста, така што  ова е сега мерка, ќе видиме каков резултат ќе има, има слободни болнички капацитети и во моментов ситуацијата не е  критична и ризична, но секако не сакаме да стигнеме до таму“, изјави министерот.

Според него, во болниците се исполнуваат инфективните одделенија, но сепак нема нагол раст како што беше на почетокот на месец ноември минатата година.

„Во моментов е тешко да се процени дали и колку ќе биде силен бранот којшто сега се јавува во смисла на зголемени новодијагностицирани случаи“, посочи Филипче.

Првиот вицепремиер и министер за политички систем и односи меѓу заедниците, Артан Груби, по повод Денот на жената, оствари средба со претставничките на сите заедници кои живеат во Република Северна Македонија.

Груби се осврна на прашања поврзани од светот на жените, на нивните достигнувања, социјалните и политички прашања поврзани со еднаквите можности, но и на чекорите што треба да се преземат за да се надминат празнините што се уште постојат, информираат од неговиот кабинет.

„Гзиме Старова, Изета Бабачиќ, Аспазија Софијанова, Дрита Карахасан, Васка Мустафа-Бајрамоска, Анета Пешева и Братислава Танасковиќ се успешни жени со својата професионалност во заедниците на кои припаѓаат, но сите заедно за целото наше општество“, нагласил првиот вицепремиер.

Груби за време на средбата, меѓу другото, им кажал на присутните дека еманципацијата на жената започнува со еманципацијата на нејзиниот сопруг и дека не само денес, на 8 март, туку систематски и секој ден треба да се почитува напорот на жените.

На средбата сите заедно се согласиле дека е од особено значење да се запаметат делата на успешните жени со цел да се зајакне влијанието на жените во нашето општество, а токму тоа е важноста на одбележувањето на 8 Март.