Во интервју дадено за угледниот германски весник Франкфуртер алгемајне цајтунг (ФАЦ) премиерот Зоран Заев обелодени нови детали во врска со бегството на поранешниот премиер, Никола Груевски, кој доби азил во Унгарија.

Запрашан за тоа како Груевски успеал да побегне од земјава, Заев вели дека тој бил скриен во багажник на автомобил кој го изнел од државата.

„Сега знаеме како. Груевски со лифт се симнал во подрумот на зградата, а таму се скрил во багажникот на автомобилот кој го извел надвор од земјата. Во Албанија, го чекало друго, унгарско дипломатско возило“, обелодени премиерот во интервјуто.

Запрашан зошто потрагата по Никола Груевски започнала дури во понеделник, кога експремиерот требало да се појави во затворот уште претходниот петок, Заев одговара дека такви се правилата за осудениците во нашата земја.

„Во земјата вообичаено е криминалците кои се повикани во петок за отслужување на затворска казна, викендот да го поминат дома. Не можевме тоа да го смениме само за Груевски“, објаснува премиерот Заев.

Груевски беше осуден на затворска казна од две години за набавката на луксузниот „мерцедес“, а обвинет е уште во четири случаи на СЈО, во предметите Насилство во Центар, ТНТ, Траекторија и Титаник.

Претседателот на Собранието, Талат Џафери, на почетокот на денешната седница ја констатира оставката на Никола Груевски.

Експремиерот ја достави оставката изминативе денови од Унгарија, каде што избега и доби политички азил.

Груевски поднесе оставка откако Комисијата за деловнички и мандатно-имунитетни прашања донесе одлука да му предложи на Собранието да му се одземе пратеничкиот мандат поради неоправдано отсуство од шест месеци.

Според Законот за пратеници, Груевски може да побара апанажа во висина на платата што ја земаше како парламентарец.

На пратеничкото место на Груевски ќе седне Ѓоко Камчев.

Експремиерот Никола Груевски тајно во стан во Будимпешта се состанал со заменик-државниот секретар за надворешни работи на Унгарија, Иштван Јо, објави унгарскиот портал 444.

Информацијата за состанокот ја потврдило унгарското Министерство за надврешни работи, од каде навеле дека нема ништо невообичаено во тоа нивни вработен да биде во контакт со човек кој бил долгогодишен премиер во својата земја.

Откако новинар од унгарскиот портал во петокот го улови и сними македонскиот експремиер во бегство, беше објавена информацијата дека Груевски тој ден бил на таен состанок со заменикот во министерството.

Според 444 средбата била во истата зграда во која новинарот безуспешно се обиде да добие одговори од Груевски на неколку прашања.