Контакт

Македонија

(Видео) Двегодишно дете од Прилеп почина од сепса

Објавено пред

Двегодишно дете од Прилеп со клиничка слика на тешка мeнингокценија и флуминантна пурпура, односно тешка форма на сепса вчера во 11 и 30 часот било примено на Клиниката за инфективни болести во Скопје. Сепсата за неполни 24 часа ги зафатила сите органи на телото по што детето починало.

Како што вели д-р Милена Стевановиќ од Клиниката за инфективни болести и фебрилни состојби, станува збор за многу тешка и ретка клиничка слика на болест која е предизвикана од бактеријата Нисерија менингитидис и е со висока смртност и покрај преземање на сите тераписки мерки.

„Детето било однесено на педијатриското одделение во Прилеп каде е почната иницијалната терапија и по консултација со инфектолог упатено е на нашата клиника. Веднаш е реализиран прием на интезивна нега на клиниката за инфективни болести, земени се потребни микробиолошки следувања и започнат беше интензивен третман, но болеста со ваков брз тек, на жалост предизвика она што никој не го посакува, а тоа е смртен исход во 18 часот и 15 минути“, вели Стевановиќ.

Според неа, болеста започнува нагло од полно здравје, а симптомите се често неспецифични посебно кај деца под 4 годишна возраст. Во наредните часови од почетокот на болеста таа прогритира до најтешка форма која завршува со смртен исход.

Доктор Владимир Микиќ од Институтот за јавно здравје вели дека од појавата на пациентот во болницата во Прилеп до денеска преземени се сите епидемиолошки мерки кои се по протокол.

„Според протоколот веднаш штом е поставено сомневањето за можна менинкокна болест кај детето, инфектологот во Прилеп го известил регионалниот епидемиолог и веднаш е излезено на терен за да се преземат сите мерки кои се предвидени со протокол за постапување во вакви случаи. Тоа подразбира давање на профилакса на сите блиски контакти, вклучувајќи ги и лицата кои се грижеле за него, дезинфекција на сантитетското возило со кое е превезувано детето и на болничките простории каде детето било на прием“, вели Микиќ.

Дополнително епидемиолозите вршат дополнителни епидемиолошки истражувања за дезинфекција на домот каде претстојувало детето, а воедно се земаат и лабараториски материјали за да се види дали постојат одредени носители и да се намали ризикот за нови случаи иако тоа е исклучително ретко. Оваа болест најчесто се јавува со поединечни случаи.

„Менингококната болест се пренесува со близок контакт што значи дека заразното лице кое ги носи овие бактерии во носот и грлото доколку кашла или кива, а во истата просторија се наоѓа осетливо лице може да се заболи. Она што е поволно кај оваа болест во однос на ширењето е што не е многу контагиозна, значи доколку престојувате во соба каде што било тоа лице не може да добиете менингококно заболување“, рече Микиќ.

Според него, болеста се јавува исклучително ретко во Македонија со поединечни случаи, а уште поретко во вид на сепса или септикемија, обично, вели тој, се јавува во форма на менингитис. Како што рече, ова е еден од ретките случаи кои воопшто се забележани во претходниот период. Во последните 20 години најголем број на вакви случаи регистрирани се во 2004 – вкупно 9.

Обдукција на телото на детето нема да се прави, како што кажа Стевановиќ, заради тоа што семејството изречно одбивало, но и клиничката слика била јасна.

Виктор Јованов

Македонија

ВМРО-ДПМНЕ : Наспроти розовите очила на Заев, граѓаните живеат во јад и чемер

Објавено пред

„Измамникот Зоран Заев денес повторно пред Форумот на Жени на СДСМ лажеше. Зоран Заев повторно ветува прогрес, а ги погази достоинството и перспективите на сите во Македонија“, се вели во реакцијата на ВМРО-ДПМНЕ на говорот на премиерот.

„Следниот пат кога Радмила Шекеринска ќе му пишува говор нека спомене барем збор за одговорноста на власта за аферата Леонардо, за тендерите на Анѓушев, за концесиите и марихуаната на кланот Заеви, за торбата Луј Витон со рекетираните милиони.

Во овој говор на Заев не слушнавме ни збор за 500 000 граѓани кои живеат во сиромаштија, за иселувањето на младите, за очајните земјоделци, за пропаднатото здравство, колабираното образование и за тоа што СДСМ направи за надминување на проблемите на граѓаните. Тоа е реалноста со која се соочуваат и жените и мажите и младите и возрасните во Македонија. Наспроти розовите очила на Заев, граѓаните живеат со јадот и чемерот како да го преживеат месецот. Заев може да бега од одговори, но нема да побегне од одговорноста. Одговорноста ќе го стаса како катастрофален пораз на претстојните избори“, се вели во реакцијата.

Прикажи повеќе...

Македонија

Во Битола се одржа акција за пошумување на ридот „Зелен Баир“

Објавено пред

о Битола се одржа акција за пошумување на ридот над населбата Баир во Битола. Просторот каде се реализираше акцијата „Зелен Баир“е поранешна борова шума, која во последните 15 години, во неколку пожари беше целосно уништена. Во рамки на оваа акција се засадија најмалку 100 борови садници од страна на волонтери од повеќе граѓански организации. Преку оваа акција волонтерите ја потенцираа улогата на шумите и зелените површини кои се наоѓаат во близина на урбаните средини, и потребата од спроведување на други акции од ваков тип со цел оддржување и зголемување на зелените површини. Со оваа акција се очекува да се направи делумна реституција на веќе загубените „бели дробови“ на Битола кои беа од исклучителна важност на локалното население и пошироко.

Акцијата за пошумување на ридот „Зелен Баир“ во Битола беше организирана во рамки на „Активни граѓани за добро владеење“ активност која се спроведува Форум – Центар за стратешки истражувања и документација од Скопје (Форум ЦСИД), со поддршка на Проектот на УСАИД за граѓанско учество. Целта на „Активни граѓани за добро владеење“ е поттикнување на граѓаните да влијаат на процесот на донесување одлуки на локално ниво, за што беа организирани обуки на кои учествуваа претставници на локалните самоуправи од сите плански региони, младински здруженија, маргинализирани групи, образовни институции и медиуми.

Во изминатите четири месеци, Форум ЦСИД спроведуваше активности во Пелагонискиот плански регион, при што се формираше неформална група на млади граѓани од општина Битола кои добија поддршка за реализирање на акција за пошумување на ридот „Зелен Баир“.

Прикажи повеќе...

Македонија

(Видео) Мицкоски: Идните функционери ќе мора да се откажат од луксузирања, доста е

Објавено пред

„Еден новинар ме праша што очекувате од младите на овие избори… Јас му одговорив дека очекувам тие, сите вие во оваа преполна сала да бидете свои единствени, да бидете она што сте и да се борите за она што сакате да бидете. Да рушите бариери, да надминувате стереотипи, да бидете промената, да бидете обновата која ќе ја донесеме. Младите се за обнова не затоа што тоа е фраза, туку тоа е насушна потреба. Унијата на Млади сили на ВМРО-ДПМНЕ ја има слободата, а секој од вас го има мојот збор дека ќе ви бидам најголемиот поддржувач за вашите идеи и вашите цели.

Затоа што Македонија одамна го нема тој луксуз да загуби уште една генерација која ќе се исели. Повеќето села одамна се празни, а сега градовите се празнат, а генерациите си заминуваат. Иселувањето не е како калемење на растение, туку тоа е како да го откорнете од родната грутка и го пресадите таму некаде далеку, на друга почва и во други услови. Колку и да боли, колку и да пече, ова е реалноста во Македонија“, рече лидерот на ВМРО-ДПМНЕ, Христијан Мицкоски по повод 28. годишна Конференција на УМС на ВМРО-ДПМНЕ одржана во Македонска Филхармонија.

Според Мицкоски, секој почеток има и свој крај, а крајот на сето ова е близу и тој се вика 12 април. „Младите се за обнова, како што знам дека 12 април е денот кога завршува една неславна ера на политичари кои го лажат и манипулираат народот. Тоа е нивниот крај, а почетокот е со доаѓањето на обновата“, рече тој.

„И ако есента е период кога денот се намалува, ако е сигурно по ноќта дека доаѓа утрото, исто така сигурно е дека Зоран Заев кога ќе дојде периодот на избори, не ја говори вистината. За тоа нема мака и преку цела година, но ова се засилува само пред избори.
И ако се сеќавате неколку пати отворено предупредувам дека изборите се време кога Заев кажувањето на невистини го има вклучено на најјако. Па кога не разговара со некои пранкери, ќе се истури со ветувања за повисоки плати, пензии, синдикални договори, ветувања за професори, наставници, доктори или што уште нема да му текне, само бесмртност нема ветено. До душа чистиот воздух го заборави, зошто секој изминат ден го демантира, но нема проблем да продолжи да ветува други работи, и така ветувања без суштина, препакувани лаги ќе се изнаслушаме во периодот кој следи. Но, на ваквите итроштини и предизборни лаги никој веќе не наседнува. Тоа е минато“, рече Мицкоски.

Според него, власта не може да купи чест, достоинство и доверба со некој денар задоцнето и премало покачување.

„Македонецот не се продава за шака денари кои сакаат овие да му дадат, а кои природно му следуваат и не плука врз предците, кон оние кои со живот го платија она што ние денеска го живеме.Треба да се биде реален и да се каже дека имаме реални порази како држава и премиер кој не се срами да носи порази. Погледнете ги само овие во последниве неколку месеци. Му ја зема Ципрас машната и како отсечен скалп се фалеше со нејзе, а пред некој ден Мицотакис го викна за да му каже дека промовира светски бренд дека Македонија е грчка. Среде Скопје во „Охис“ им се случи Чернобил и не реагираат, а згора на се пробаа и да го сокријат. Наместо правда, гледаме секојдневно оној поранешен пратеник кој бараше полче, наместо да одговара пред законот секојдневно шета по телевизии и е главна ѕвезда. Испраќа порака дека никој ништо не му може. Исто како и Ременски која наместо да биде повикана за „Рекет“, гледаме пресметка на параполициски структури во СДСМ, кои место за правда се борат за себе си и да ги заштитат своите матни зделки. Но, проблемот е што судството е урнисано. Кога така говорат за нивното надградено „сваровски судство“ во „Луј Витон правосудство“ ќе помислите овие луѓе не се три години на власт, туку само што дошле. Па демек министерката Дескоска била револтирана за застарените предмети во судството, ама кога ќе им треба истото тоа судство да испорача некоја одлука под маса, тогаш власта и Зоран Заев се најзадоволни. Нивната тактика е тие да удираат по судиите, а овие да молчат, бидејќи сакаат да го амортизираат незадоволството од неспособноста и подземните игри кои ги прават. Ама не може да се амнестираат од фактот дека не донесоа правда“, рече лидерот на ВМРО-ДПМНЕ и додаде:

„Но ако се побуните за своите права, тогаш ќе извадат од под маса закон за забрана за протестирање, замислете овие чија што уста е полна со европски вредности сакаат на шверцерски начин во Собранието да протнат закон за забрана за протестирање. Тоа не е затоа што сакаат да направат ред, туку затоа што деспотот се плаши од својот народ. А се плаши затоа што човекот прави грешки до грешки, неправди до неправди. И кога така сакаат да забранат да се собира народот, не престануваат и да прават притисок во медиумите. И кога ќе речат биле за слобода на медиумите, тука фактите ги демантираат. Клучот на според нивните зборови провладината 1 ТВ, на Независен весник, Нова ТВ, Вест, Утрински, Дневник кажува дека медиумите умираат. Исто како што се стега и независноста затоа што во еден од кабинетите на Илинденска се штанцаат и лажните вести за мене, против моите соработници, за ВМРО-ДПМНЕ. Се тепаат новинари, им се закануваат, а на тоа владата молчи, а ги нема и оние советници на Зоран Заев кои се прават заштитници на слободата.

Но секоја лага им се распрснува, како онаа хајка која што ја правеа за мојот имот кој го стекнав пред да влезам во високата политика. Но, сега откако и нивната Државната комисија за спречување на корупција кажа дека се е чисто, ги нема да кажат некој збор за тоа, молчат. Но факт е дека не сме сите исти. И колку тоа да сака да го престави така власта, треба да знаат дека честа и образот за мене немаат цена. Дури и во едни вакви услови, на апсолутна власт на СДСМ, со се што видовме овие три години, притисоци, монтажи, рекети, успеаја да конструираат случај против мене, но за нивна жал неуспешно.Очекувам најмалку барем да се извинат за клеветите кои ги изрекоа против мене и моето семејство, но поважно е да сфатат дека не сме сите исти, и дека во политиката може да има и чесност, принципи и чест“, додаде тој.

Мицкоски вели дека верува во принципи и вредности и во една поинаква слика за политичарот од онаа каква сме навикнале да ја гледаме овие 28 години.

„Не смееме да го разочараме народот, ниту на функциите да гледаме како некое наследено право. Функцијата пред да биде привилегија, е одговорност. Одговорност кон народот и кон Македонија. Моето најголемо настојување ќе биде да има апсолутна правда и секоја неправда која ќе биде докажана, секоја злоупотреба која ќе биде направена да биде жестоко казнета, без оглед кој е од каде доаѓа и колку е близок со мене.

Принципите за кои говорам нема да бидат слово на хартија или напразно кажан збор, туку морален кодекс кој мора да го знае и применува секој кој ќе ја има одговорноста да му служи на народот. Овој морален кодекс, е за да не дојде до грешки, за да ја смениме сликата за политиката во Македонија.

Прво, Нема да има предолго останување на функција, затоа што секоја таква појава, колку и таа успешно да се обавува, предизвикува рутинизирање и чувство на самодоволност, и арогантност која доведува до одлепување од народот. Второ, ако има некој функционер кој сака да обавува и функција да биде истовремено бизнисмен, нека заборави на тоа. Не може тоа така. Овој народ мора да има луѓе на позиции кои треба да им одговорат на барањата на граѓаните, а не на личните бизнис интереси.

Трето, мора да излезе на површина квалитетот на луѓето и нивните способности. Четврто, администрацијата мора да се ослободи од стегите во кои сега работи. Петто, мора да бидеме достапна Влада за народот. Шесто, ќе имаме посебно внимание и почит кон верските заедници и религиозни групи согласно нашата идеолошка определба. Но исто така ќе ги почитуваме и маргинализираните групи и сојузи нудејќи општество без предрасуди и без стереотипи.

Седмо – економија, раст и развој. Образование кое е квалитетно, и модерно. Шанса за младите и посебна стратегија за борба против иселувањето. Ќе понудиме решенија како дел од план со кои мора да се спротивставиме на егзодусот со иселувањето. Да ги задржиме луѓето кои тука ќе градат иднина. Да обезбедиме правда без исклучок. Здравство со стандарди и квалитет. Земјоделие кое ќе нуди можности за земјоделците, култура со почит кон традицијата и модерното, и без влијание на политиката. Ова се основите кои ќе ги следиме во идната програма. И ќе се трудиме да оствариме што е можно повеќе, и ако нема реализација на ветеното, тогаш казната од народот ќе дојде. Нема да има мешање на политиката каде не и е местото“, порача Мицкоски.

Спред него, идните функционери ќе мора да се откажат од луксузирањата. Доста е од луксузирање 28 години, на политичарите. Нема да има трошоци за непродуктивни работи, и за личен комодитет. Не може народот да е на сол и леб, а функционерите да се луксузираат. Не оди тоа тоа. Треба да се стави крај на таквиот морален хазард, јас ќе бидам прв меѓу еднаквите.

„Имаме јасни стратешки партнерства со ЕУ, САД и НАТО алијансата. Ќе работиме за ЕУ, ќе работиме за стандарди, и принципи, да си ги признаеме слабостите за да можеме да одиме напред. А ниските страсти во политиката ќе ги оставиме на страна. И колку и да сакаат луѓето од сегашната власт да не наречат екстремни националисти, знаат дека ние сме луѓе родољуби и патриоти кои си ја сакаат земјата и ги бранат заедничките интереси. И кога говорам за македонизмот, говорам дека тој е основата на нашето општество на која треба да се развиваме, ниту антиквазицијата, ниту онаа насилна севернизација, која што ни се турка во последно време, туку Македонизам како космполитска идеја која треба сите нас да не врзува и да не обединува.Нема да бараме поддршка базирана на трговија со гласови, туку поддршка базирана врз програма и цели. Јас немам хипотеки кон никого во политиката, и јас и сите ние единствено можеме да обратиме кон оние кои не поддржуваат со работа и со принципиелен однос. Ова е моралниот кодекс составен од принципи и вредности, а следува и програма. А промените кон подобро ќе се почувствуваат во првите 100 дена од мандатот на новата влада“, истана Мицкоски.

Прикажи повеќе...

Најново

Свет17 минути

Папата организираше ручек за 1 500 бездомници

Папата Франциско организираше ручек за 1 500 бездомници и лица во неволја. Римокатоличката црква денеска го одбележува денот на сиромашните, а...

Македонија3 часа

Франција е за влез на Балканот во ЕУ, но со нова постапка во седум етапи

Земјите од Западен Балкан треба да влезат во Европската унија, но преку нов, постепен процес на пристапување во седум фази,...

Свет4 часа

Русија ѝ ги враќа запленетите воени бродови на Украина

Русија започна да ги враќа украинските воени бродови запленети на 25. ноември минатата година во Керчкиот проток, соопштија руските власти....

Свет5 часа

(Видео) Бојно поле на улиците на Хонгконг, полицаец погоден со стрела

Полицаец од Хонгконг денеска бил погоден со стрела в нога, отакако полицијата употребила солзавец за да ги растера демонстрантите кои...

Македонија6 часа

Во републичка акција, за една вечер казнети 203 возачи под дејство на алкохол

За откривање на возачи под дејство на алкохол, полициските сектори од цела држава, спровеле акција која траела синоќа од 22...

Регион7 часа

Српскиот министер за здравство: Животот на Вучиќ беше во опасност

Српскиот министер за здравство, Златибор Лончар, денеска во изјава за „Танјуг“ нагласи дека претседателот на државата, Александар Вучиќ, имал хронични,...

Европа8 часа

Британскиот принц Ендрју негира дека злоупотребувал малолетничка на имот на осуден педофил

Британскиот принц Ендрју првпат во интервју за Би-би-си, одговори на прашања за наводната поврзаност со осудениот педофил Џефри Епстајн, при...

Македонија8 часа

Десет лица приведени при контроли во седум скопски локали

Викендов, во периодот од 23 до 04 часот наутро од страна на скопската полиција, Управата за јавни приходи, Државниот пазарен...

Европа22 часа

Годишнина од протестите на Жолтите елеци, во Париз приведени 105 лица

Француската полиција денеска употреби солзавец и водени топови за да ги растера демонстрантите кои се собраа во Париз на одбележувањето...

Економија23 часа

Бил Гејтс повторно е најбогат човек во светот

Oсновачот на „Мајкрософт“, Бил Гејтс во петокот го надмина директорот на „Амазон“, Џеф Безос, на списокот на најбогати луѓе во...

Европа1 ден

Градоначалникот на Венеција: Ова што се случува кај нас, ќе се случи во целиот свет

Жителите и властите во Венеција се борат со обилни дождови и поплави поради што во градот е прогласена и вонредна...

Топ1 ден

160 животи згаснуваат годишно во сообраќајни несреќи во земјава

17 ноември е светски ден на сеќавање на жртвите од сообраќајни незгоди, на милионите лица кој изминатите години трагично го...

Топ1 ден

Четворица работници повредени во „Макстил“, еден од нив е хоспитализиран

Четворица работници се повредиле на работно место во „Макстил“, од кои едниот со тешки повреди е хоспитализиран. Како што информираат...

Топ1 ден

Екстелохранителот на Мијалков избегал од куќен притвор

Драганчо Стоименов, познат како Дацо Белски, поранешниот телохранител на Сашо Мијалков, избегал од куќен притвор. Како што велат од МВР...

Топ1 ден

Притворен маж од Арачиново – убил соселанец поради расправија за добитокот

Полицијата приведе арачиновец поради убиство извршено во селото Мојанци. Тој го убил соселанецот поради банална расправија околу напасувањето на добитокот....

Спорт1 ден

„Кориере“: Вториот најбогат човек во светот го купува Милан за милијарда евра!

Иако на крајот на септември во отворено писмо, сопственикот на модниот бренд „Луј Витон“, Бернард Арнаут демантираше дека ќе го...

Македонија1 ден

Контролор на „Дурмо турс“ доби условна казна за несреќата кај Ласкарци

Обвинет во издвоена постапка за несреќата кај Ласкарци кон средината на октомври призна вина пред судот и доби условна казна...

Регион1 ден

Македонски шлепер се преврте на автопатот Ниш – Белград

Камион со македонски регистарски таблички утринава околу 8:30 се превртел на автопатот Ниш – Белград во близина на селото Катун...

Регион1 ден

(Видео) Силно невреме во Хрватска, морето исфрли тони ѓубре кај Дубровник

Хрватското крајбрежје од вчера попладне е погодено од силно невреме, проследено со силен ветер, којшто предизвика проблеми во сообраќајот. Издаден...

Регион1 ден

Вучиќ во болница поради кардиоваскуларни проблеми

Српскиот претседател Александар Вучиќ е примен во Воено-медицинската академија (ВМА) поради кардиоваскуларни проблеми, соопшти Генералниот секретаријат на претседателот на Србија....

Досие