Во Виена започна официјалниот работен појадок за премиерите од Западен Балкан, организиран од австрискиот канцелар Себастијан Курц.

На местото на македонскиот премиер, Зоран Заев на состанокот присуствува вицеперемиерот задолжен за економски прашања, Кочо Анѓушев. Тој ќе говори и на панел дискусијата каде ќе се обратат премиерите на Албанија, Босна и Херцеговина, Косово и Црна Гора.

Претходно, од Кабинетот на Курц соопштија дека Заев ја откажал посетата поради внатрешнополитичките проблеми во земјата.

На состанокот ќе стане збор за европската перспектива на Западен Балкан, регионалната соработка и за билатералните конфликти.

Во текот на изминатите три дена на скопското подрачје се случиле 43 сообраќајни незгоди, од кои три со тешки телесни повреди, 22 со телесни повреди и 18 со материјална штета.

При сообраќајните незгоди три лица добиле тешки телесни повреди и 41 лице лесни телесни повреди. 104 возачи се санкционирани бидејќи се движеле со поголема брзина од дозволената. Исто така, исклучени се и 63 возачи бидејќи 31 го управувале возилото под дејство на алкохол, 26 пред да стекнат право на управување моторно возило и шест биле возачи почетници.

26 возила се исклучени од сообраќај бидејќи 24 биле нерегистрирани и две технички неисправни. Исто така, санкционирани се и осум возачи што поминале на црвено светло, двајца не дале првенство на минување пешаци и двајца неправилно се престроиле. Во текот на изминатите денови издадени се 182 мандатни платни налога, а исто така 110 возила се подигнати со „пајакот“.

Сообраќајот на државните патишта се одвива по влажни коловози, на места со остатоци од кашест снег на коловозот.Забрана за товарни возила има на патниот правец Делчево према граничен премин Делчево и патниот правец Крива Паланка-ГП-Деве Баир

Интензитетот на сообраќај на патните правци надвор од градските средини е умерен. На граничните премини нема подолги задржувања за влез и излез од државата.

Од 15 ноември стапи на сила законската обврска за задолжително поседување на зимска опрема во возилата, без оглед на временската состојба. Оваа обврска ќе трае до 15 март 2019 година.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде се бележи појава на утринска магла, а исто така зголемена е и можноста од појава на одрони. На осојничавите места коловозите се наместа влажни, па поради ниските температури карактеристични за вечерните и утрински часови постои можност и од појава на голомразица.