Македонија
Едно од девет возрасни лица во Северна Македонија има дијабетес

Во Северна Македонија едно од девет возрасни лица има дијабетес или околу 175 илјади луѓе, објави Асоцијацијата за детски дијабетес на Македонија „Баланс мк“.
Од таму наведуваат дека бројот на лица со дијабетес во светот продолжува да расте. Во споредба со 2017 година кога се публикувани последните резултати од осмото издание на Дијабетес-атласот, бројот на лица со дијабетес од 425 милиони е пораснат на 463 милиони, односно зголемен е за 38 милиони, според најновото деветто издание на Меѓународната федерација за дијабетес (International Diabetes Federation – IDF).
Ова зголемување на бројот на лица со дијабетес е еднакво на бројот на жители во една голема европска држава како Полска или повеќе од двојно од бројот на жители во земјите од Западен Балкан (Македонија, Србија, Албанија, Косово, Босна и Херцеговина и Црна Гора). Се проценува дека до 2045 година оваа бројка ќе надмине 700 милиони или секој деветти човек во светот ќе има дијабетес.
Меѓународната федерација за дијабетес (IDF) годинава го издава деветтото издание на Дијабетес-атласот, кој претставува авторитативен извор на податоци за глобалната тежина на дијабетесот.
Според податоците од овој атлас, процените за 2019 година се следниве: едно од 11 возрасни лица (20-79 години) има дијабетес (463 милиони), односно 38 милиони луѓе повеќе во споредба со 2017 година, 3.600 повеќе деца и адолесценти заболени од дијабетес во споредба со 2017 година, односно 1.110.100 деца и адолесценти на возраст под 20 години имаат дијабетес тип 1.
Едно од две лица со дијабетес не е дијагностицирано, 22 милиона луѓе повеќе се на ризик да развијат дијабетес во споредба со 2017, речиси две третини (63 отсто) oд лицата со дијабетес се во активна работна доба (под 60 години), едно од пет лица со дијабетес е на возраст над 65 години, 33 милијарди долари повеќе се трошат на дијабетес во споредба со 2017 година, 10 отсто oд светските здравствени трошоци се трошат на дијабетес (760 милијарди долари) и едно од шест раѓања (20 милиони) е засегнато од зголемен крвен шеќер, од кои 84 отсто се должат на гестациски дијабетес (дијабетес во бременост).
Од „Баланс мк“ наведуваат дека зголемената преваленца на дијабетес тип 2 е резултат на забрзаното темпо на урбанизација, стареењето на популацијата, седечкиот начин на живеење, зголемената телесна тежина, недоволната физичка активност и поголемото внесување нездрава храна.
Во светски рамки половина од луѓето со дијабетес не се дијагностицирани, односно не знаат дека имаат дијабетес. Стапката на дијагностицирани случаи може да се подобри со зголемена свесност за симптомите за дијабетес тип 1 (жед, зголемено мокрење, замор, ненадејно губење на телесната тежина, глад) и зголемени можности за скрининг на лица со висок ризик за дијабетес тип 2 (напредна возраст, зголемена телесна тежина, компликации, ниско ниво на физичка активност и нездрава исхрана).
Во нашата земја е подготвена национална стратегија за справување со дијабетесот, која „Баланс мк“ очекува да се имплементира многу бргу.
Асоцијацијата објави и петиција за јавна поддршка на барањето за набавка на сензори за безболно мерење гликемија на 500 деца и адолесценти, како и исполнување на ветувањето за нивна набавка од Министерството за здравство, Владата и ФЗОМ што побргу.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Заев: Делото на Свети Климент Охридски нѐ потсетува трпеливо и мудро да се соочуваме со предизвиците

Премиерот Зоран Заев вечерва имаше свое обраќање на духовната академија во чест на празникот Свети Климент Охридски, патрон на Македонската православна црква – Охридска архиепископија.
„Во мое лично име и во името на Владата, на сите православни верници, и на Синодот на Македонската православна црква – Охридска архиепископија, упатувам честитки по повод големиот христијански празник – Св. Климент Охридски“, со оваа порака Заев го започна своето обраќање и истакна дека Свети Климент Охридски е основоположник на македонската духовност.
Во продолжение, премиерот се осврна на дејноста на Свети Климент Охридски.
„Тој бил еден од најблиските и најревносните соработници и соучесници во мисијата на светите браќа Кирил и Методиј во Моравија за описменување на народите со словенски происход. Свети Климент, како голем човек и силна личност е жив паметник на нашата историјата и како основач на Охридската школа, позната и како ‘прв балкански и европски универзитет’“, посочи Заев.
Ставајќи ги заложбите на Свети Климет Охридски во денешен контекст, премиерот рече дека денеска Македонците и македонскиот јазик се впишани во ризницата на светските народи и јазици и никој повеќе нема дилеми и не го оспорува тоа.
„Тоа е остварено постојано имајќи го предвид и големото дело на Свети Климент, како и делата на сите останати црковни и духовни големци во редот на нашата историја, вградени во создавањето и афирмацијата на идентитетот на македонскиот народ. Ја комплетиравме нашата лична карта во ОН. Покрај името Република Северна Македонија, за јазик стои: македонски јазик и за државјанство: македонско/граѓанин на Република Северна Македонија“, кажа Заев.
Повика со предизвиците да се соочуваме трпеливо и мудро, како што тоа го правел Свети Климент Охридски и изрази убеденост дека Македонската Православна Црква – Охридска Архиепископија ќе се ангажира уште поактивно во надминување на предизвиците исправени пред неа и дека наскоро ќе биде прифатена како реалност во православниот свет.
Македонија
Турскиот министер Мевљут Чавушоглу во Истанбул прими делегација на ВМРО-ДПМНЕ

Министерот за надворешни на Турција, Мевљут Чавушоглу, денеска во Истанбул беше домаќин на делегација од ВМРО-ДПМНЕ претставувана од потпретседателите на партијата Александар Николоски и Владо Мисајловски, како и генералниот секретар Игор Јанушев.
Од опозициската партија информираат дека на средбата се разговарало за односите и соработката меѓу турската партија АКП и ВМРО-ДПМНЕ како две партии со десничарска ориентација.
„На средбата стана збор и за односите меѓу Македонија и Турција. Се констатираше дека односите се добри, но е потребно подобрување особено во делот на економската соработка и инвестициите. ВМРО-ДПМНЕ планира по победата на изборите да работи силно на привлекување инвеститори“, се наведува во партиското соопштение за средбата.
Теми во разговорот биле и турската заедница во Македонија и културите односи меѓу Македонија и Турција, за што исто така било оценето дека постои простор за дополнително продлабочување.
Македонија
Полесно повредените македонски патници во автобуската несреќа во Србија се враќаат дома

Според последните информации добиени од болницата во Прокупље, каде беа згрижени 16 од вкупно 26 патници повредени откако се преврте македонски автобус кој превезувал патници за Копаоник, сите тие се пуштени на домашно лекување.
Според информациите од МНР, во моментов се очекува да пристигне автобус кој ќе ги превезе кон дома. Повеќе нема згрижени пациенти ни во болницата во Блаце и сите тие се пуштени на домашно лекување.
Една потешко повредена пациентка е хоспитализирана во Ниш и таа ќе биде задржана на понатамошно лекување.
Официјалните резултати за причините за несреќата српските власти сѐ уште не ги доставиле до нашата амбасада во Белград.
Македонски автобус околу 10 часот изутринава се преврте во Србија на магистралниот пат Прокупље – Блаце. Крајната дестинација на патниците билa Копаоник.
- Топ3 месеци
Газда полеан со бензин, а неговиот џип запален во Кисела Вода
- Забава3 месеци
Дошла на преглед поради постојан замор, а докторите ѝ рекле дека ќе умре за 72 часа
- Култура3 месеци
„Болка и слава“ на Алмодовар го отвора фестивалот „Браќа Манаки“, кинематограферот Алкаине гостин во Битола
- Книги2 месеци
Промоција на „Небо во кафез“ од Д.А. Лори
- Црна хроника2 месеци
Се урна тераса во Скопје – повредени татко и неговите три малолетни деца
- Hitech3 месеци
(Видео) Возач и совозач во „тесла“ спијат додека автомобилот вози со 100 на час
- Култура1 месец
Десет најчести прашања и одговори за програмата „Креативна Европа медиа“ на „Синедејс“
- Црна хроника3 месеци
Деветнаесетгодишник со автомобил удрил во девојче во Кавадарци