Врмето утре ќе биде сончево со мала до умерена облачност, соопшти Управата за хидрометеоролошки работи.

Попладне облачноста ќе се зголеми, а во западните делови ќе има појава на локален дожд. Ќе дува слаб до умерен северен ветер. Утринската температура ќе се движи од 9 до 17, а дневната од 22 до 31 степен.

Во Скопје, времето ќе биде сончево со мала до умерена облачност, а попладне облачноста ќе се зголеми. Ќе дува слаб до умерен северен ветер, а температурата ќе се движи до 28 степени.

И во следните денови продолжува променливото и посвежо време.  Од УХМР најавуваат дека најоблачно и најсвежо со повремен дожд ќе биде во вторник, кога во западните и јужните делови од земјава ќе има и пообилни врнежи од дожд, проследени со грмежи.

Потоа дневната температура ќе биде во пораст, а кон крајот на неделата во попладневните часови повторно ќе има локални врнежи и грмежи.

Неизвесно е дали ќе има лидерска средба помеѓу првите луѓе на најголемите политички партии, а несогласувања постојат во оснос на темите за кои би станало збор на состанокот.

Додека СДСМ е на ставот дека е најважно лидерите да седнат на маса и да разговараат за статусот на Специјалното јавно обвинителство, пописот и новиот Изборен законик, опозициската ВМРО-ДПМНЕ смета дека треба да се разговара за предвремени избори.

Од СДСМ велат дека не бегаат од разговор и го повикуваат ВМРО-ДПМНЕ да не ги кочи процесите кои се од интерес на државата.

Опозициската партија, пак, верува дека во земјата во моментов нема амбиент за политички дијалог помеѓу власта и опозицијата и инсистира на предвремени избори.

„Потребна е политичка зрелост кај власта за да се седне и да се разговара за што поскоро организирање на предвремени избори, бидејќи изворот на сите проблеми е на Илинденска број 2“, изјави портпаролот на ВМРО-ДПМНЕ, Наум Стоилковски.

Премиерот Зоран Заев во неколку наврати најави дека ќе го покани Христијан Мицкоски на лидерска средба.

Во Галичник денеска се одржа 46-то издание на традиционалната културно-сценска манифестација „Галичка свадба“, која повеќе од 4 децении ги негува свадбарските обичаи и ритуали на жителите од мијачкиот крај.

Манифестацијата во исто време придонесува за зачувување на автентичноста на изворните песни и ора, како и на надалеку познатата галичка носија на која е врежан печатот на вековните македонски традиции.

Младенци на годинешната „Галичка свадба“, која секоја година се одржува на Петровден, односно за време на викендот кој е најблизу до овој празник, се Марина Петровска и Огнен Караѓозовски, кој по потекло е од Галичник.

Тие денеска по низата свадбени обичаи, како и со изведбата на невестинското и други ора, се венчаа во црквата „Св. Петар и Павле“. Инаку, традиционално, почетокот на „Галичката свадба“ се означи во саботата, со поставување на свадбарското знаме, а свадбената свеченост заврши со чинот на испраќање на тапанџиите и зурлаџиите.

„Галичката свадба“, која традиционално се реализира со поддршка од Министерството за култура, ја следеа претседателот Стево Пендаровски, министерот за култура, Хусни Исмаили, како и голем број гости и посетители од земјава, но и од странство, кои можеа да проследат над 30 обичаи кои се изведуваа за време на свадбарските денови.

Инаку, традиционално, со одржувањето на „Галичката свадба“ во организација на месната заедница на селото Галичник, започна и „Галичкото културно лето“, кое и овојпат ќе понуди најразлични забавни и музички содржини, приспособени за сите генерации посетители.