Министерката за труд и социјална политика Јованка Тренчевска денеска присуствуваше на промоција на новата мобилна апликација Bebbo, развиена од УНИЦЕФ , во соработка на Министерството за здравство, Министерството за образование и наука и Министерството за труд и социјална политика и поддршка на Европската Унија.

Апликацијата Bebbo содржи многубројни информации и стручни совети, интерактивни алатки за правилен развој на детето, но и совети за тоа како родителите да се грижат за себе. Таа е бесплатна и лесна за симнување и користење, работи без интернет и е достапна на македонски и албански јазик.

Тренчевска посочи дека апликација Bebbo, во голем дел се надоврзува на заложбите на Министерството за труд и социјална политика, во зајакнувањето на капацитетите и вештините на стручниот кадар и на самите родители за позитивно родителство, имајќи го предвид значењето на односот на родителите и стручниот кадар во градинките во развојот на една личност и колку вештините со кои ќе се стекнат децата на возраст од 0-6 години ќе влијаат на нивниот понатамошен развој.

„Децата сведоци на насилство или жртви на насилство, понатаму во животот најчесто стануваат и самите насилници, поради тоа што не препознаваат што е добро, а што лошо. Што е решавање на еден проблем на демократски начин и решавање на проблем преку дијалог и дискусија внатре во семејството,“ рече Тренчевска.

Таа посочи дека, поддршка особено им е потребна на родителите и децата кои живеат во сиромаштија, деца Роми, деца со попреченост и деца кои се особено ранливи на експлоатација, злоупотреба и одвојување на семејството.

Српскиот претседател Александар Вучиќ вели дека е задоволен што Европскиот парламент не го прифати предлогот да се прекинат преговорите за пристап на Србија во ЕУ поради ставот за војната во Украина. Српскиот претседател, како што пренесува Нова.рс, вели дека официјален Белград и понатаму ќе продолжи да се однесува во склад со интересите на земјата.

„Имаше обиди да се прекинат преговорите со Србија. Мило ни е што тоа не е изгласано затоа што ќе беше погрешно и благодарност до поголемиот дел од ЕП што тоа не го прифати. Секој нека си ја работи својата работа. Нема да молиме никого. Важно е Србија да биде на европскиот пат, но секако важно е и да има слобода и право да размислува за своите интереси“, вели Вучиќ.

Тој рече дека сè потешко му е да разговара со многу од европските политичари затоа што многу од нив сметаат дека се во војна и дека нема место за разговор.

Вучиќ ги негираше наводите дека е договорена негова средба со премиерот на Косово – Албин Курти во Брисел.

„Зборуваме за заклучоци коишто би се донеле евентуално по информацијата што ќе ја достави Владата до Собранието по која ние ќе разговараме. Не станува збор за промена на европскиот предлог, туку зборуваме за заклучоци кои ние како Собрание ќе ги донесеме за да ја задолжиме и обврземе Владата како да се однесува во следниот период. Јас денес очекувам одговорност од сите партии и пратенички групи бидејќи станува збор за сериозен процес во државата, бидејќи се работи за иднината на државата и нивните граѓани“, изјави меѓу другото координаторот на пратеничката група на СДСМ, Јован Митрески пред денешната работна група во Клубот на пратеници.

Митрески рече дека како пратеничка група „ќе дадеме наши предлог-заклучоци коишто ќе се однесуваат на нашите стратешки определби за членството во ЕУ со исклучување на билатералните – историски и образовни прашања. Ќе дадеме предлози и заклучоци коишто ќе значат безусловно почитување на определбата за посебните историски, јазични и културни посебности на македонскиот народ“.

Митрески по новинарско прашање рече дека „како Собрание уште еднаш ќе потврдиме дека билатералните прашања ќе бидат исклучени од рамката и ќе ја задолжиме Владата, затоа што овие заклучоци се обврзувачки за Владата, да се исклучат билатералните прашања од аспект на историјата и образованието“.