Македонија
Загадениот воздух во Скопје одзема животи

Алармантно е зголемен бројот на смртни случаи како последица на загадениот воздух во Скопје, покажа истражувањето поддржано од ЕУ, а координирано од Метеоролошкиот институт на Финска, кое во среда беше презентирано од Институтот за јавно здравје.
Концентрацијата на опасните ПМ-2,5 честички е речиси двапати повисока од најблиските градови во Европа, а особено загрижувачките се наодите од проценките на здравствените ризици од воздухот, според кои во Македонија годишно се губат околу 1.300 животи од аерозагадувањето, а три групи на болести се поврзуваат со аерозагадувањето и тоа ракот на белите дробови, мозочните удари и болестите на срцето вели професор Драган Ѓоргев од Институтот за јавно здравје.
„Бројките покажуваат дека Скопје е меѓу најзагадените градови, особено ако ги земеме концентрациите на ПМ-2,5 честички, оние поопасните, и сме водечки европски град од она што гостите го презентираа. Ако најблиските градови – Букурешт и Будимпешта се некаде околу 30-40 микрограми на годишно ниво во просек, Скопје има дури 70. Страшно високи концентрации на ПМ-2,5 честички“, изјави Ѓоргев на презентацијата на наодите од проектот поддржан од ЕУ, а координиран од Метеоролошкиот институт на Финска.
Епидемиолошката студија е работена со конкретни податоци од кај нас, односно од месечните причини за смртност доставени од Заводот за статистика. Како што наведе д-р Ѓоргев, движењето на загадувањето се совпаѓа со движењето на смртноста, пиковите се во периодите кога има највисоко аерозагадување, а тоа е во зима.
„Во овие три години е покажано дека аерозагадувањето, односно болестите кои се поврзани со аерозагадувањето се околу 30-35 отсто, односно кај 30- 35 отсто случаи аерозагадувањето било причина за смртност. Нормално тука се работи кај ранливи групи како хронично билни и стари лица. Тоа се прилично високи бројки. Кај други земји се реферирани 10 до 20 отсто“, вели тој.
Ото Ханинен од Институтот за јавно здравје на Финска, говорејќи за искуствата на неговата земја, рече дека меѓу другото кај нив една од главните работи е промоцијата на централното парно греење како опција, но исто така и развојот на самиот сообраќај.
„Возниот парк во Финска беше еден од најстарите во споредба со ЕУ, но со промена на возилата и обновата на возниот парк се намалија драстично емисиите на загадувачки материи“, изјави експертот од Финска, Ото Ханинен.
Тој вели дека во нивната земја актуелен е проблемот со прашина на патиштата, а дека уште во 80-те години од минатиот век е направен голем напредок во индустрискиот сектор за намалување на штетни емисии во воздухот./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре нестабилно време со врнежи и грмежи

Времето утре ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град. Минималната температура ќе биде во интервал од 8 до 12, а максималната ќе достигне од 18 до 25 степени.
Во Скопје, променливо облачно со повремен дожд. Попладне ќе биде нестабилно со пороен дожд, грмежи и засилен ветер. Минималната температура ќе се спушти до 10, а максималната ќе достигне до 25 степени, јавува УХМР.
До крајот на оваа седмица ќе се задржи променливо облачно и нестабилно време со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Македонија
Пресудата е политички мотивирана, рече Јакимовски кој е осуден на три и пол години затвор

Градоначалникот на Општина Карпош, Стевчо Јакимовски е изненаден од пресудата со која е осуден на затворска казна од три и пол години.
Обвини дека се работи за политички мотивирана пресуда и најави жалба до Апелацискиот суд.
„Навистина сум изненаден од пресудата. Без никакви докази, на 100 отсто докази на наша страна дека немаме сторено кривично дело, носат пресуда со која ме осудуваат на четири години со единствена казна затвор на три години и шест месеци“, изјави Јакимовски.
Во насока на делото, Јакимовски изјави дека е осуден за легализација на две бараки кои биле монтажно-демонтажни и направени од гипс-картон, во согласност со сите стандарди, додавајќи и дека дека за времени објекти не може да се води кривична постапка.
Рече и дека Обвинителството се послужило со фалсификат кој бил докажан со вештачење, но судот не го зел предвид.
Македонија
Меџити: Владините институции континуирано превземаат мерки против загадувањето на воздухот

Во присуство на министри, заменици министри, ЗЕЛС, градоначалници, директори на управи и претсттавници на институциите, денеска под раководство на првиот вицепремиер и министер за животна средина и просторно планирање Изет Меџити се одржа координативен состанок за напредокот и постигнувањата во делот на спроведувањето на Акцискиот План за подобрување на квалитетот на воздухот и на животната средина.
На состанокот присутните информираа за активностите превземени од страна на институциите кои ги водат во насока на подобруавње на квалитетот на воздухот, при што се нагласи дека загадувањето на воздухот е повеќедецениски проблем не само кај нас, туку и во земјите од нашето опкружување и во светот и дека Владата сериозно пристапи кон преземање на конкретни активности кои се координирани помеѓу институциите на локално и централно ниво.
Заклучок од состанокот беше дека сите субјекти во државата – државните институции, локалната самоуправа, бизнис секторот, граѓанските здруженија и секој поединец има обврски и ингеренции и само со усогласено делување може да се стигне до посакуваните резултати.
Од таа причина Министерството за животна средина формираше работна група која изработи „Акциски план за грејната сезона 2024 -2025“ во кој се проектирани краткорочни интервентни мерки кои се реални, брзо изводливи и применливи акции со назначени одговорни институции за имплементирање и со обврска за известување од спроведените акциии.
Главно преземените активности беа фокусирани на зајакнати контроли на правните субјекти во однос на почитување на условите од А и Б интегрираните дозволи и студиите и елаборатите за оцена на влијание врз животната средина и за оние што не го почитуваа законот беа изречени казни. Посебно внимание институците посветиле на третманот на отпадот како и контролите за палење на оган на отворено. Особено успешни беа контролите на станиците за технички преглед на возила со цел да се утврди дали се спроведува мерење на емисиите на издувни гасови и вонредните контроли на техничка исправност на возилата, особено за оние со дизел горива, и нерегистрирани возила.
Владата ја лансираше и Планската програма за почист воздух 2025 -2030 која се фокусира на долгорочните мерки и решенија, а во неа се опфатени сите важни аспекти за подобрување на квалитетот на амбиентниот воздух и постои системски приод што гарантира резултати на краток, среден и долг рок, велат од ова министерство.