Македонија
Заев на Форум со граѓански организации: Приклучите се во овие историски моменти да ја обезбедиме иднината на државата

Премиерот Зоран Заев и министерот за информатичко општество и администрација, Дамјан Манчевски, имаа обраќања на тематскиот форум: „Една година влада – осврт на граѓанските организации кон досегашните постигнувања и идни очекувања“, што се одржа вчеравечер, заедно со претставници на Цивика мобилитас, во којашто членуваат околу двесте грантисти, како и пред претставници на донаторите на проектот, Швајцарската агенција за развој и соработка на Шведскиот институт за јавна администрација.
„Вие активно учествувате во реформските промени со коишто ја поставивме и ја движиме Република Македонија стабилно на патот на Европската Унија на НАТО. Вашето теренско (грас-рут) искуство, долгогодишната работа, анализите за клучни состојби во државата и од директен интерес за граѓаните на Република Македонија помогнаа кога го создадовме реформскиот план 3-6-9. А еве и овде ќе се обврзам, иако соработката со голем дел од вас e интензивна, дека граѓанскиот сектор останува активен дел и од практикувањето на политиките на Владата, и од носењето промени на сите нивоа“, рече Заев.
Тој оцени дека во општеството веќе е постигната свест, дека невладиниот сектор и граѓанските организации се една од најважните алки меѓу граѓаните и системот. „Власта никако не би смеела да се подразбира како моќ, туку како дадена доверба од граѓаните и должност кон граѓаните“, додаде премиерот Заев и посочи на направеното развластување кон граѓаните и кон општините.
„Да, Владата е политичка како што предвидува нашиот политички систем, но фокусот мора да биде кон граѓанските интереси. Затоа, ги вклучивме мерките од ‘Документот на граѓанските организации за итни демократски реформи’, познат како ‘Блупринт’, низ серијата консултации со претставници од граѓанскиот сектор. Посветени сме многу на проектот Отворено владино партнерство 2018-2020 и на консултативни средби со граѓанското општество за сите важни прашања за граѓаните од областа на секојдневниот живот, во унапредување на институционалните услуги, но и за клучните стратешки државни интереси“, рече Заев.
Тој сподели информации и за разговорите што течат околу спорот што ги сопира нашите евро-атлантски интеграции. „Република Македонија никогаш не била поблиску до изнаоѓање достоинствено решение на спорот со Република Грција коешто истовремено ќе го зачува и зајакне нашиот идентитет. Постои можност за такво решение за коешто последниот збор ќе го имаат граѓаните на Македонија на референдум. Јас сум подготвен за нашата држава повторно да покажам лидерство за заедничко добро на сите граѓани, за напредок и за развој на држава, сочувувајќи го дигнитетот, идентитетот и суверенитетот на нашите граѓани и нашата држава. И ве повикувам да учествувате, да се приклучите во овие историски моменти. Потребно ми е и мене како премиер и на Владата да продолжиме со активната, двонасочна отвореност и соработка и да дадете поддршка како граѓанско општество за економски развој и просперитет на Република Македонија. Вашата проактивност во нудење решенија е клучна. Можни се, достижни се и датум за ЕУ и покана за НАТО. Ако во тоа успееме, повторно, тоа ќе биде заеднички успех“ , рече премиерот.
Министерот за информатичко општество и администрација, Дамјан Манчевски, се осврна на реформите што во изминатата година се направени во медиумската сфера и во јавната администрација.
„Измените во Законот за аудио и аудиовизуелни медиумски услуги, што се резултат на долга дебата во којашто беа вклучени сите засегнати страни, во моментов е дел од собраниска процедура. Клучна е улогата на медиумските работници кои мора го кренат класот и да придонесат кон конечно усвојување на законот, што е и нивен предлог. Владата ги поддржува реформите во медиумската сфера, коишто произлегуваат од медиумските здруженија, граѓанските организации, новинарите и сите засегнати страни, а се надеваме дека во овие заложби ќе се вклучи и опозицијата, за да може законот да помине во Собранието“, рече Манчевски.
Во делот на јавната администрација, министерот Манчевски посочи на дигитализацијата на услугите, што овозможува брзи, ефикасни, поевтини услуги за граѓаните. „Преку порталот за е-услуги, со воспоставувањето централизиран шалтерски систем и една точка за услуги, со дигитализацијата на повеќе од 50 услуги коишто се најчесто барани од граѓаните, ние ги носиме услугите до граѓаните. Најважен за граѓаните е квалитетот на услугите што ги добиваат, а ние ќе целиме кон ефикасна администрација“, додаде Манчевски.
На средбата се обрати и Стефан Томаџан, заменик-амбасадор на Швајцарија во земјава кој ги поздрави активностите на Владата на Македонија во вклучувањето на граѓанското општество во градењето политики. Тој рече дека тоа е швајцарски модел за успешно граѓанско општество што дава резултати, а присуството на премиерот Заев и на министерот Манчевски на Форумот е потврда за определбите на оваа Влада да гради успешно граѓанско општество.
Претставниците на граѓанските организации се интересираа за повеќе актуелни прашања во државата. Во дебатата тие добија уверување од премиерот Заев и од министерот Манчевски дека оваа Влада е подготвена финансиски да ги поддржи граѓанските организации со средства од буџетот. При тоа, премиерот Заев ги повика организациите самите да посочат модел на успешни европски пракси, како државата да одвојува пари за невладиниот сектор, но да не се меша во распределбата, за да се задржи независноста на граѓанскиот сектор. Претседателот на Владата, Заев, најави и дека претставници на граѓанскиот сектор ќе учествуваат во подготовката и имплементацијата на планот 18, како што беа земени предвид нивните сугестии во планот 3-6-9. Исто така, премиерот Заев и министерот Манчевски рекоа дека не можат да се мешаат во изборите на кадри во регулаторните тела, судството, но дека повикуваат на правична застапеност согласно со родовите прашања, на лицата со посебни потреби, на граѓаните Роми. Опфатени беа и теми од образованието, за децата, екологијата, при што премиерот Зоран Заев најави очекувања дека среднорочните и долгорочните мерки во заштитита на животната средина ќе дадат резултати, во интерес и на децата и учениците и на сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Архитектите лути, барат итна заштита на ГТЦ без зелениот покрив и на Владата без барок

Зелениот покрив на Градскиот трговски центар иницираше низа барања на Асоцијацијата на архитекти на Македонија (ААМ) до Владата. Архитектите денес донесоа став под итно да се заштитат сите објекти од модерната архитектура кои нелегално се рефасадирани со барокни фасади, бараат ГТЦ да се заштити како споменик на културата без сега најавената зелена градина на покривот, како и низа законски измени кои нема да дозволат да се повтори уредување на градот без конкурс.
„Нашиот став е всушност барање до Владата под итно да ги стави под заштита објектите од модерната во Скопје, со тоа што за оние кои беа мета на проектот ’Скопје 2014’, а тоа се Владата, ЕВН, Стоковна куќа, телекомуникацискиот центар, да се донесе одлука за нивно враќање во оригиналниот изглед. Бараме и ГТЦ да се стави под заштита, без зелениот покрив. Со заштитата се дефинира што може понатаму да се прави со овој објект, притоа имајќи предвид дека во оригиналното решение на проектантите има зелени градини во ГТЦ“, изјави архитектот Мартин Пановски, претседател на ААМ, за „Макфакс“.

„Добивме информација дека проектот е донација, но еве и да е донација тоа не е во ред затоа што ако се обратеа во Асоцијацијта ќе им направевме најмалку 10 подобри проекти и секако ќе ги дониравме“, Мартин Пановски, претседател на ААМ
Второ барање на ААМ е под итно да се смени законот за јавни набавки, каде што проектот, како што велат, има третман на било која друга стока што се набавува, не се гледа портфолио на проектант, квалитет кој што би го добиле и слично туку се бираат најевтините понуди кои речиси без исклучок се и најнеквалитетни.
„Во контекст на јавните набавки бараме под итно да се направи одлука за поголеми објекти кои што би ги инвестирала било која државна институција да е задолжително да се прави конкурс, каде што ќе се бираат идејни решенија. Со сегашниот систем на јавни набавки проектите кои треба да се нешто креативно имаат третман на набавка на флаширана вода“, револтиран е претседателот Пановски.
Четвртото барање е за измени во законот за градба чија подготовка е во процедура. ААМ бара Комората на овластени архитекти и овластени инженери да се подели на два дела, односно на комора на архитекти и посебно комора на инженери. Пановски вели дека од досегашното постоење на Комората утврдиле дека архитектите и инженерите не функционираат во една Комора оти многу често има конфликт на интереси меѓу струките.
„Петтото барање е носење на закон за архитектура. Во овој момент имаме закон за урбанизам и градежништво и како држава архитектурата ја сметаме како градежништво. Архитектурата не е градежништво. Мора да дефинираме кој смее да каже дека е архитект. Некој што дипломирал на Архитектонски факултет не е архитект а не работи проектирање не може да се каже дека е архитект. Кај нас тоа е една пракса“, објаснува архитектот Пановски.
Последното барање на ААМ е Министерството за транспорт да се врати по старо и да биде Министерство за урбанизам и градежништво.
Барањата официјално ќе бидат доставени до Влада и архитектите велат дека нема да дозволат тие да останат неодговорени.
„Ова се работи кои се буквално иницирани од една градина, се што е кажано е вметнато во тие малку квадрати. Добивме информација дека проектот е донација, но еве и да е донација тоа не е во ред затоа што ако се обратеа во Асоцијацијта ќе им направевме најмалку 10 подобри проекти и секако ќе ги дониравме, но тоа не е идејата. Идејата е дека треба да има демократија што подразбира конкурс за избор на идејното решение и изложба на пристигнатите трудови“, вели претседателот Панвоски.
Ставот на Асоцијцијата е дека за ГТЦ треба да се направи комплетен проект за реконструкција и реставрација.
Зелениот покрив на ГТЦ пред два дена го претстави скопскиот градоначалник Петре Шилегов заедно со директорот на ГТЦ и со претставници од УНДП, но никој кој не даде официјално објаснување зошто е одбран токму проектот кој е остро критикуван и квалификуван дека му се наметнува на трговскиот на ист начин како што му се наметнуваше барокот.
Македонија
Дескоска: Згрозена сум и најостро го осудувам физичкиот инцидент во затворот

Згрозена сум и најостро го осудувам вербалниот, а потоа и физичкиот инцидент во КПУ „Затвор – Скопје“, напиша на својот фејсбк-профил министерката за правда, Рената Дескоска.
Таа оцени дека насилството не е и не смее да биде начин на комуникација никаде, ниту во затворите.
Дескоска вели дека побарала целосно информирање од страна на управата на затворот и очекува надлежните институции професионално и одговорно да го расветлат случајот, а потоа да поведат постапки за санкционирање на сторителите на насилството, но и на сите оние што не презеле мерки за спречување вакви ситуации.
Претходно, денеска, во затворот „Скопје“ во Шуто Оризари дошло до тепачка во која биле вклучени ексминистрите Миле Јанакиески и Спиро Ристовски. Јанакиески беше префрлен во болницата „8 Септември“, а потоа вратен во затворот. Директорот на болницата, Христијан Костов, предмалку изјави дека по прегледите, кај Јанакиески не биле евидентирани повреди.
Спиро Ристовски и Миле Јанакиески од синоќа се во 30-дневен притвор бидејќи Обвинителството за гонење организиран криминал и корупција ги осомничи дека се дел од шестемина што ги организирале насилствата во Собранието на 27 април 2017 година.
Македонија
(Видео) Костов: Јанакиески нема повреди, во затворот ќе биде под надзор на доктор

Директорот на болницата „8 Септември“, Христијан Костов, изјави дека кај ексминистерот Миле Јанакиески не биле евидентирани никакви повреди по инцидентот во затворот „Скопје“ во Шуто Оризари.
„Детаљно е извршен преглед вклучувајќи крвна слика, лабораториски преглед и ехо, а по прегледите е донесен заклучок дека кај лицето не се евидентирани повреди“, рече Костов и додаде дека оттука немало потреба за хоспитализација.
Поради податокот дека Јанакиески бил удиран по телото, од болницата препорачале 24-часовен надзор во затворот од страна на медицинско лице.
Претходно, директорот на затворот, Ѓоко Котевски рече дека Јанакиески имал нагмечувања, но не и скршеници.
- Истражувања3 месеци
Во дворот на МЗТ ќе се гради фабрика за преработка на медицински отпад, паника кај околните фирми
- Истражувања1 месец
(ВИДЕО) Градоначалничката на Арачиново со службени пари купувала суџук, мирисливи свеќи, пилешки гради и дрвени лажици
- Истражувања2 месеци
Фондот за иновации прво одобрил грант од 200 илјади евра на сопругот, па ја вработил сопругата
- Проверка со факти3 месеци
Заев прифаќа амнестија за 27 април, а тврдеше дека нема да има
- Проверка со факти2 месеци
(Видео) Шекеринска: Нема да се пазариме со амнестија
- Проверка со факти2 месеци
(Видео) Макрадули: Популизмот не помага при решавање со загадувањето
- Македонија2 недели
Скандалозна распределба на пари во култура – има за тетовски, нема за скопски џез-фестивал
- Македонија2 месеци
(Видео) Кога општеството потфрла, кучето Бен му помага на момчето со церебрална парализа