Попот Виктор Стојчев, кој е оштетен во предметот, каде што таткото на Бојан Јовановски, Боки 13, Миле Јовановски беше осуден на казна затвор во траење од шест месеца, рече дека нема да ја коментира пресудата, но дека правдата е задоволена.

„Правдата е задоволена. Сторителот ќе биде казнет. Пресудата не би ја коментирал”, рече Стојчев, кој ќе бара отштета во граѓанска постапка од татко му на Боки 13.

Попот кажа дека неговото семејство три години било под стрес и закани од семејството Јовановски и им се заблагодари на медиумите за интересот.

Судијката Александра Ристеска го осуди Јовановски бидејќи со умисла тешко телесно го повредил попот Виктор Стојчев на 7 јануари, за Божик 2017 година. Одбраната има право на жалба до Апелациониот суд. Јовановски денеска не дојде да ја чуе пресудата.

Според обвинението, Миле Јовановски на Божик, го нападнал попот Виктор Стојчев. Расправијата за паркинг, почнала кога попот обидувајќи се да го паркира џипот, но не можел да влезе во дворот, бидејќи возилото на Јовановски било паркирано пред влезот.

Татко му на Боки првин почнал да го удира попот со тупаници, а потоа продолжил да го удира надвор од возилото. Јовановски тврдеше дека бил испровоциран од попот.

Министерката за правда, Рената Дескоска, се сретна со еврокомесарката за правда, потрошувачи и родова еднаквост, Вера Јурова, со којашто разговараше за реформските процеси што се одвиваат во нашата држава.

На средбата министерката Дескоска изрази жалење за недонесувањето одлука за отворање на преговорите со Република Северна Македонија и покрај тоа што препораките на ЕУ коишто стоеја пред нас беа исполнети.

Дескоска потенцираше дека, сепак, таквата одлука не го стопираше процесот на реформи во нашата држава, кој пред сè се одвива поради интересот на нашите граѓани. Министерката за правда истакна очекување дека ЕУ ќе ја преиспита својата одлука за отворање на преговорите и напомена дека тоа ќе биде одлука со која ќе го приближи Западен Балкан кон ЕУ, се вели во соопштението.

Здружението за меѓународна политика „Совет на амбасадори“ им се заблагодарува на европските лидери и на комесарите на иституциите на Европска Унија за нивната реална и морална политичка поддршка на Република Северна Македонија во нејзиниот долг пат кон зачленување во ЕУ. Таа поддршка, како што велат, посебно беше важна по одлуката на Европскиот совет во октомври на земјата да не ѝ се додели датум за преговори.

„Совет на амбасадори“ од голема важност ја смета готовноста на земјите членки на Унијата (изразена во non paper на Франција) да ја реафирмираат уште еднаш европската перспектива на земјите на Западен Балкан со убедување дека само со нивното приближување кон ЕУ тие земји ќе можат да ги консолидираат нивните држави засновани врз принципите на правото и на правната држава, на нивниот економски и социјален развој. Со таа политика ќе се отворат реални перспективи за подобра иднина за младите и конечно помирувањето на народите во регионот.

„Совет на амбасадори“ високо го цени тоа што сите политички партии во нашата земја во нивните политички програми како примарна цел зацртале да ги поддржуваат и афирмираат евро-атлантските интеграции, што како резултат даде земјата наскоро да добие статус на полноправна членка на НАТО. Меѓутоа, сите сме свесни дека паралелно со тоа треба да продолжат и процесите на заокружување на реформите барани од Европската комисија со усвојувањето на новите правила и критериуми за полноправно членство во ЕУ“ се вели во извештајот.

Тргнувајќи од тоа, „Совет на амбасадори“ ги повикува лидерите на политичките партии претставени во Собранието, и согласно тежината на нивната политичка одговорност, час побргу да ги заменат нивните теснопартиски интереси со државните интереси и да ја поместат одлуката за оддржување на предвремени парламентарни избори до почетокот на летото или, пак, изборите да се одржат, во нивниот редовен термин на крајот на 2020 година.

Со таков потег, според „Советот на амбасадори“, политичките партии претставени во Собранието, Владата и другите институции тоа време наместо да одржуваат предизборни митинзи и изборни активности би се фокусирале на исполнување на евроинтеграциската агенда на земјата и на неопходните реформи во изборната регулатива согласно препораките на ОБСЕ-ОДИХР и барањата на малите партии и граѓаните. Овој вистински чекор секако ќе биде поздравен особено од деловните луѓе кои ќе се насочат кон исполнување на од порано потцртаните бизнис-планови за идната година.

„Совет на амбасадори“ смета дека лидерите на политичките партии се свесни дека предизборниот и изборниот процес во секоја земја времено ги прави неефикасни институциите на државата, сè до нивно потполно парализирање. Оттаму се убедени дека лидерите на политичките партии ќе го искористат овој единствен моментум, на земјата, на нејзините граѓани и на младите на Република Северна Македонија, да им обезбедат европска перспектива и европски стандарди за нивен сестран просперитет.