Министерот за надворешни работи Никола Димитров, денеска го прими во проштална средба амбасадорот на Кралството Шведска во Република Северна Македонија, Матс Стафансон, пред завршување на неговиот мандат и заминување од земјата.

Министерот Димитров се заблагодари за исклучителниот придонес на амбасадорот Стафансон во развивањето на македонско-шведското пријателство, за што министерот Димитров му врачи и благодарница за неговиот плоден ангажман и искрена, отворена и конструктивна поддршка кон демократската трансформација и европските аспирации на нашата земја.

„Вашата мудрост, добронамерни и пријателски совети, како и професионалниот пристап во работата, оставија силен печат во нашето општество, а воедно и меѓу дипломатскиот кор како доајен. Особено ми претставува задоволство што меѓу другото, за време на Вашиот мандат беше интензивирана и размената на посети на високо ниво, а притоа беше усвоена и Декларација за соработка меѓу нашите две земји во 2017 година. Кралството Шведска продолжува да служи како наш модел и инспирација при преземање на реформските чекори во духот на европските вредности, а притоа уверен сум дека и Вашиот наследник ќе продолжи со иста динамика да го негува позитивниот тренд на билатерални односи.“, рече Димитров.

Во функција на подобрување на односите и соработката помеѓу Република Северна Македонија и Република Казахстан, Министерството за правда на Република Северна Македонија и Генералното обвинителство на Република Казахстан денеска во Министерството за правда потпишаа три билатерални договори за меѓународна соработка и помош.

Потписник на овие договори беше министерката за правда, Рената Дескоска, и генералниот обвинител на Република Казахстан, Гизат Нурдаулетов.

На средбата министерката Дескоска истакна дека ѝ претставува голема чест и задоволство да ги потпише билатералните договори од областа на меѓународната правна помош. Станува збор за три договори за соработка: договор помеѓу Република Северна Македонија и Република Казахстан за екстрадиција; договор помеѓу Република Северна Македонија и Република Казахстан за меѓусебна правна помош во кривичната материја; договор помеѓу Република Северна Македонија и Република Казахстан за трансфер на осудени лица.

„Потпишувањето на овие договори е од големо значење за нашата држава и по нивното стапување во сила, нема да биде оставен никаков простор за избегнување на правдата со искористување правен вакуум помеѓу двете држави. Со потпишувањето на овие три договори затворивме уште една рута од патот што Репубика Северна Македонија го оди во борбата против криминалот и отворивме врата за успешна соработка помеѓу двете држави“, истакна министерката Дескоска.

Од осамостојувањето Република Северна Македонија со Република Казахстан немаше склучено билатерален договор, а со оглед дека Република Казахстан не е потписник на конвенциите од областа, помеѓу државите претходно не постоеше правен основ за постапување по предметите за екстрадиција, трансфер и меѓусебна правна помош.

Хелсиншкиот комитет го објави годишниот информатор за дискриминација за 2018 година. Според добиените податоци, како најчести основи за кои граѓаните сметаат дека биле дискриминирани се: пол и род, сексуална ориентација, етничка припадност, попреченост и религија. Најчести области во кои граѓаните сметаат дека биле дискриминирани се: работните односи, пристапот до добра и услуги, здравство и образование.

Хелсиншкиот комитет за човекови права во соработка со Мисијата на ОБСЕ во Скопје го спроведува проектот „Унапредување на човековите права“. Една од активностите во рамките на овој проект е подготовка на годишен информатор за дискриминација за 2018 година, кој ги претставува збирните податоци добиени од здруженијата на граѓани за регистрираните случаи на нееднаков третман, информациите од јавен карактер добиени од првостепените судови за бројот на судски постапки во делот на заштита од дискриминација, како и обработка на податоците од годишните извештаи за 2018 година на Комисијата за заштита од дискриминација и народниот правобранител во однос на регистрираните случаи, поведените постапки и донесените мислења за заштита од дискриминација.