„СДС во лажењето нема мера до каде може да оди, секогаш е способна да се надмине себе си и да ги пробие сите до стигнати нивоа. Последниот пример е од деновиве, во кој СДС и Венко Филипче се фатени живи како штитат приватни бизнис интереси. За да го заштитат милионскиот профит на нив блиска фирма за обезбедување, се утепаа од лажење веќе неколку дена“, соопшти ВМРО-ДПМНЕ.

„Па така, почнаа да бараат криминал, таму каде што нема. Со новиот тригодишен договор на СОЗР за обезбедување на објекти на државната управа, државата има заштеда од пола милион евра годишно.

Јавната набавка за избор на фирма која ќе ги обезбедува објектите е направена на транспарентен начин на кој учествуваа четири компании, а главен услов беше најниска цена.

Транспарентниот начин на јавната набавка внесе конкуренција во наддавањето и тоа придонесе, за истата работа од претходно, сега да се постигне пониска цена за половина милион евра и исто толку пари на граѓаните да се заштедат во државниот буџет.

Претходно, државата со СДС, Филипче и екс директорот на СОЗР и бизнис пајташ на Ковачевски, Пеце Мирчевски значи губела по основа фирма за обезбедување по пола милион евра годишно, што за 6 години се фантастични 3 милиони евра.

Сега СДС штитат приватни бизнис интереси од 3 милиони евра. Целото лажење на СДС и Венко Филипче е токму поради ова, да го заштитат профитот на нивната блиска фирма која од овој тендер заработувала пола милион евра екстра годишно“, се наведува во соопштението на ВМРО-ДПМНЕ.

„Последиците што ги сносиме како држава со користење на моменталниот авион, кој не ги покрива потребите на државата и е од постар датум на производство, се големи“, велат од ВМРО-ДПМНЕ.

„Сведоци сме дека низ историјата на државата, државните авиони биле користени за потребите на владата за патувања на владиниот врв, со цел да безбедно и без дополнителни трошоци да се стигне до посакуваната дестинација.

Како држава членка на НАТО доколку сакаме да биде сериозна држава, треба да имаме квалитетен воздухоплов. Моменталниот авион кој е во служба на Владата, често е во дефект и на поправки, а тоа ја „кошта“ државата.

Државниот авион нема да биде на ВМРО-ДПМНЕ, ниту пак на СДС и ДУИ, туку ќе биде за потребите на државата. Тесноградоста на СДС и заслепеноста на Филипче, покажува дека не гледаат подалеку од партиското слепило на Бихачка.

Авионот нема да биде употребуван за да се смируваат коалициите на партиите на власт, како што бевме сведоци во минатото, туку за користење на државниот врв за патување на службени патувања каде се преставува Македонија и се штитат државните интереси“, соопштуваат од ВМРО-ДПМНЕ.

„СДС антидржавна партија, продолжува да тоне во нивната безидејност и криминал. Поради нивната злоба не можат да го видат, а уште помалку да го поздрават различниот и позитивен пристап на премиерот Мицкоски во водењето и претставувањето на државата“, велат од ВМРО-ДПМНЕ.

„Премиерот Мицкоски беше единствениот лидер од Балканот во посета на САД и кој учествуваше на инагурацијата на претседателот Доналд Трамп, и тоа го искористи за да оствари бројни средби со влијателни политички претставници и успешни бизнисмени.

Меѓу средбите кои ги оствари премиерот и претседател на ВМРО-ДПМНЕ, Христијан Мицкоски, беа тие со претседателот на Републиканската партија на САД, Мајкл Батли како и со Ден Бонџино, еден од најблиските соработници на претседателот Трамп.

Мицкоски оствари средби и со други влијателни личности како Ричард Гренел, Џеси Спиро, Девин Нунез, Такер Карлсон, Марко Галина, како и со македонската дијаспора и со нивни влијателни претставници како Крис Павловски, Џон Битов, Ендру Пејков и многу други.

Борбата за подобар живот, повисок стандард, поквалитетно образование, поконкурентна економија, како и борбата против корупцијата и криминалот, подобрувањето на инфраструктурата, подобрувањето на здравството беа дел од темите во фокусот на средбите во САД.

Сите средбите кои што ги оствари Мицкоски, беа во функција на искористување на потенцијалот во економската соработка со цел инвестиции во Македонија, кои ќе создадат подобри услови за живот и посигурна иднина за сите.

На средбите во САД премиерот Мицкоски, исто така, зборуваше и лобираше за поддршка во борбата за заштита на македонските национални интереси и враќање на достоинството на македонскиот народ, во однос стратешкиот интерес за побрзо полноправно членство во Европската Унија.

Ова е добар чекор за достоинствено претставување и позиционирање на Македонија во меѓународната политичка заедница. Со ова се покажува дека за разлика од времето на владеење на СДС антидржавна, кога на секое нивно излегување од државата ги распродаваше националните интереси, сега има некој кој секоја можност ја користи за нивна заштита и промовирање.

И наместо да го поздрават овој пристап и важните средби во Америка, СДС антидржавна избра да тоне во безидејноста и сопствениот криминал“, се наведува во соопштението на ВМРО-ДПМНЕ.