Министерката за труд и социјална политика, Мила Царовска, денеска со градоначалникот на Кочани, Николчо Илијев, го посетија Центрарот за ран детски развој во село Тркање.

Како што информираат од ресорното министерство, Центарот за ран детски развој, чијшто капациетет е за околу 20 деца, ќе почне да работи од први септември и е во состав на детската градинка „Павлина Велјанова“.
Згрижувањето и воспитувањето на децата во центарот е бесплатно и ќе се реализира по три часа секој работен ден.

„Навистина ми е драго што овој центар во Тркање е во рурална средина и ги прави последните подготовки за отпочнување со работа. Од она што можев да го видам, обезбедени се соодветни услови, опрема и дидактички средства, соодветен кадар, како и програма за вршење на дејноста. Центарот е наменет за деца на возраст од 3 до 6 години и ги повикувам родителите од селото да ги запишат децата за да може да започнат да ја следат програмата од септември“, рече министерката Царовска.

Таа воедно истакна дека Кочани е и една од првите 4 општини која ќе гради нова градинка за над 100 деца со грант од Светска банка, за што минатата недела беа потпишани договори.

Владата денеска даде позитивно мислење за предлогот да се основа ново општинско основно училиште „Киро Глигоров“ во Општина Центар.

Основањето на училиштето беше предложено од страна на Министерството за образование и наука, а првите генерации ученици истото ќе ги прими во текот на претстојната учебна 2019/2020 година.

Денешното сведочење на Катица Јанева е сè освен професионално водење на истрагата со цел откривање на нарачателите на рекетирањето, изјави портпаролот на ВМРО-ДПМНЕ, Димче Арсовски.

„Јанева доаѓа да даде исказ како сведок во присуство на адвокат. И тоа не кој било, туку адвокат на еден од таргетите во случајот ‘Империја’, случај што е конструиран по истекот на законскиот рок за постапување на СЈО, само и само за да се рекетираат бизнисмените“, кажа Арсовски и додаде дека од ова не постои поголема иронија и поголемо потценување на интелигенцијата на граѓаните.

Партискиот портпарол посочи дека доколку Јанева сакала да ѝ помогне на истрагата тогаш ќе дојдела сама и ќе кажела сè што знае за нарачателите.

„Адвокатот ѝ треба само за да се прикријат дупките и за да се има контрола врз сè она што ќе каже, бидејќи очигледно Катица Јанева нема сама капацитет да отиде и да даде исказ во обвинителство“, нагласи Арсовски.

Тој се задржа и на тоа како на сослушувањето Јанева дошла со службено возило и личен возач со цел, како што кажа, да демонстрира сила и моќ, но посочи дека тоа е класична злоупотреба на ресурсите што ги плаќаат граѓаните.

Според портпаролот на ВМРО-ДПМНЕ, очигледно е дека целта на Вилма Русковска не е да дојде до главата на октоподот.

„Нејзината цел е да се сокријат трагите што може да доведат директно до Зоран Заев и до разноразните Кики, Фрики и Шеки од власта“, порача тој, но додаде дека добра вест во целата приказна е што претстои обнова на Македонија, и тоа многу брзо.

„Откако правдата ќе се врати, одговорност ќе сносат и оние кои помагаа, но и оние коишто ги извршија сите овие случаи и оние коишто помагаа да се забошотат сите овие случаи. Одговорност мора да има“, нагласи Арсовски.