Македонија
Имотот на Камчев во Русија, Бугарија и на Бахамите – пречка да излезе од притвор
Фирми во Русија, Бугарија, Холандија, Косово, Србија и Хрватска и офшор компании во даночните раеви се само дел од имотот што го поседува бизнисменот Орце Камчев, а тој е и краен сопственик на офшор фирмата „Финзи“, стои во решението на притвор за бизнисменот Камчев до кое дојде „Макфакс“.
Имотот што го поседува, како и бугарското државјанство се само една од причините зошто на бизнисменот му беше продолжен притворот за уште 30 дена.
Во решението стои дека „сите овие околности укажувале дека доколку осомничениот Камчев се брани од слобода, тој лесно ќе се даде во бегство во која било држава надвор од Македонија, особено во Бугарија, каде што има развиен бизнис и стан, а како државјанин на Република Бугарија нема да биде екстрадиран во Македонија“.
Можноста за бегство судот ја гледа и во фактот што Камчев последнава година 80 пати ја преминал државната граница. Не се отфрла ниту можноста за влијание врз сведоците бидејќи, како што ценел судијата на претходна постапка, голем дел од нив се вработени во неговите фирми, а тој често ги менувал управителите и седиштата на правните лица кои се дел од истрагата.
Кои се фирмите во странство на бизнисменот Камчев
Руската фирма „Здравје оптима“ во Ростов на Дон е една од фирмите што се поврзуваат со бизнисменот Орце Камчев. Уделите во фирмата во март годинава тој ги пренел на „Орка холдинг“ АД Скопје, а во април годинава уплатил 100 000 евра на име инвестиција во истата компанија. Сопствеништвото во оваа руска компанија „Орка холдинг“ го дели со Јован Дабевски, поранешен генерален менаџер на „Здравје Радово“ и извесен Антон Георгиевиќ. Втората руска фирма, отворена во 2015 година, „Семимол“, освен со Георгиевиќ и Дабевски, Камчев ја дели со бизнисменот Сергеј Самсоненко.
Според решението за притвор, Камчев се јавува и како краен сопственик на фирмата „Финзи“, иако неговото име не се појавува во документите на оваа офшор компанија со седиште во Албани, САД. Предистражната постапка наводно покажала дека Камчев бил краен сопственик од отворањето на сметката на „Финзи“ во 2009 до 2012 година.
Директор на офшор фирмата „Финзи“, која е поранешен сопственик на порталот „Нетпрес“, беше Коста Крпач, кој во 2016 додека беше сведок за истрагата на специјалното јавно обвинителство, изврши самоубиство. Според аудиоснимките на СДСМ, „Финзи“ беше една од фирмите преку кои, со посредство на Сашо Мијалков, се одвивала спорната набавка на израелската опрема за прислушување за потребите на МВР.
„Макфакс“ ги поседува сите документи од отворањето на фирмата „Финзи“ до сега, но таму не е споменато името на бизнисменот Камчев. Единственото име што се споменува е она на Владислав Стајковиќ, сопственик на фирмата НВСП, исто така осомничен за случајот „Империја“, како прв директор на фирмата.
Меѓу фирмите на Камчев се споменува и компанијата ПЗУ „Систина нефроппулос Кавадарци“, чиј основач е „Орка холдинг“. Во 2014 година оваа компанија уплатила 200 000 евра преку кипарска банка на офшор фирмата „Десимарг лимитед“, каде што управител е еден од осомничените за „Империја“, Ненад Јосифовиќ. Во 2015 година Јосифовиќ го овластува Камчев да ја ликвидира оваа компанија.
Фирмата од Бахамите, „Десимарг лимитед“ беше дел од големиот проток на документи за офшор компаниите „Панама пејперс“, за која веќе објави Меѓународниот центар за истражувачко новинарство.
Уште една од фирмите што се споменуваат во судските документи е и фирмата „Камил“ во Софија, која аплицирала за кредит од 24 милиони евра во Бугарија, пари со кои Камчев имал план да ги откупи уделите на партнерите во „Пелагонија енерџи“. Во документите се споменува и бугарската болница „Токуда“, каде што Камчев преку „Орка холдинг“ бил акционер во болницата со учество од 11 отсто од капиталот.
Молк од СЈО за случајот „Империја“
И еден месец по отворањето на истрагата, од специјалното јавно обвинителство не излегуваат со информации на што точно се однесува случајот „Империја“ и кои фирми се инволвирани. Од СЈО не одговараат на прашањата на „Макфакс“ поврзани со овој случај. Засега, она што е познато е дека преку фирми на инволвираните лица биле испрани над 10,5 милиони евра – 8 милиони евра пари од Македонија и 2.5 милиони евра преку офшор фирми.
За случајот во притвор, освен Камчев, е и Ненад Јосифовиќ – соработник на Камчев, директорот на „Ексико“ – Тодор Мирчевски, Цветан Панделески – директор на ЗК „Пелагонија“, и Зорица Арсовска – сметководител во фирмите на Камчев. Притвор за случајот му беше определен и на поранешниот директор на УБК Сашо Мијалков, но подоцна, по барање на СЈО, за него се укина притворот за „Империја“, а мерката му беше одредена за случајот „Таргет – Тврдина“.
За „Империја“ има вкупно 12 осомничени, меѓу кои и мајката и сестрата на Орце Камчев.
Бизнисменот Камчев и неговите соработници можат да бидат во притвор максимум 6 месеци, а по истекот на овој рок, СЈО ќе мора да поднесе обвинение или ќе мора да им дозволи на осомничените да се бранат од слобода.
Осомничените можат да поднесат жалба до Апелацискиот суд и да побараат укинување на притворот, со тоа што имаат можност да побараат да се бранат од слобода со гаранција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Османи со конкретен акциски план за оддржлив економски раст на Северна Македонија
Кандидатот за претседател на Европскиот фронт, Бујар Османи со конкретен акциски план за економски раст на Северна Македонија преку постигнување национален конзензус и формирање национален совет во серијата средби со различни чинители на државата тој реализираше средба со претставници на Стопанската комора на Северна Македонија.
“Ќе предложам како Претседател на државата да се создаде национален совет за економски раст, со кој ќе претседава Претседателот како креатор на државен консензус а во кој ќе учествуваат поголемите политички партии од двете етнички заедници, но и претставници на заедниците под 20%, регулаторите, бизнис заедницата, синдикатите, Организацијата на потрошувачите, Академијата, невладините организации и останатите интересни групи, како еден вид на државен управен борд, со цел постигнување на државен консензус по однос на клучните параметри и регулативи за еден забрзан и оддржлив развој” презентираше Османи дел од неговата визијата за земјата.
“Овој борд или овој национален совет би имал пет работни групи: една за ефикасна администрација, ефикасни институции и професионална администрација, втора за оддржливи финансии, третата работна група за дигитализација, четврта за човечки капитал и петта, за инфраструктура. Во секоја од работните групи покрај експертите од чинителите кои што ги спомнав, би имало и меѓународни експерти и би имало наши претставници од дијаспората кои што се интегрирани во нивните општества со цел да се пренесат нивните искуства. Овие работни групи ќе предложат политики, закони, регулативи, параметри до овој национален совет, овој државен совет за постигнување државен консензус, кој што ќе ги одобри. Очекувам во првите шест месеци да се направи првиот предлог. Тогаш политичките партии ќе ги усвојат тие закони и тие регулативи, без расправа. Владата заедно со опозицијата ќе ги имплементира и ќе ги мониторира” истакна Османи.
Според Османи, нашата економија е жртва на постојаните циклички политички кризи а со преговорите со Европската Унија, земјата покрај државниот консензус за ЕУ мора да има и економски државен консензус по однос на општите параметри.
“Дали групата за оддржливи финансии ќе предложи дефицитот да не биде повеќе од 3 % и тоа ќе биде усвоено од страна на овој борд, што значи и од позицијата и од опозицијата и од чинителите, тогаш секој мора да го почитува и без расправа тоа да го имплементира. Ако надворешниот долг не треба да биде над 60% сите чинители ќе го почитуваат тоа. Исто како што е со регулативите и директивите на ЕУ, тие се фиксни, тие не се преговараат, тие само се имплементираат. Затоа сметам дека оваа ќе биде еден нов квалитет во постигнување на еден оддржлив и забрзан раст” заклучи Османи.
Преку изборната програма, Декалогот на Европскиот претседател, Османи предвидува и директно учество на Претседателот во пет надворешно-политички иницијативи, во кои заедно со бизнис заедницата ќе ги претстави економските потенцијали на државата надвор од земјата.
Македонија
Богојески: Хејтери во политиката ми го злоупотребуваат прекарот Бунтур наследен од прадедо ми од Илинденското востание
Колку време трае кампањата за претседателските, а сега и за парламентарните избори, толку време сум цел на напади и говор на омраза од политичките противници, реагира Петар Богојески, лидер на партијата Македонски концепт, која на претстојните избори е дел од коалицијата „Твоја Македонија“, предводена од ВМРО-ДПМНЕ. Богојески вели дека многумина од политичарите во кампањата му го злоупотребуваат прекарот Бунтур наследен од прадедото.
„Родум сум од Крушево, но малкумина знаат дека сум директен внук по машка линија на Димитар (Миту) Бунтурот, ополченик и борец за ослободување на Македонија во балканските и во Првата светска војна за што е носител на златен Медал за храброст. Внук сум на Петар Богојески-Бунтурот, чие име го носам, учесник во НОБ на Караорман и носител на златен Медал на трудот на Југославија. По мајчина линија, пак, внук сум на првоборецот Кицо Петрески, загинат на Сремскиот фронт, и на Борис Петрески, ранет на истото место. Од таму доаѓа и мојот прекар Бунтур, кој често во јавноста се злоупотребува од хејтери во политиката“, вели Богојески.
Богојески уверува дека нападите нема да го вратат од намерата за рестарт на Македонија по изборите, но нагласува дека не може да ја разбере фрустрацијата на оние што секојдневно го навредуваат на лична основа.
„Кратко истражување на јавниот простор веднаш ги отркива фактите и честите деманти на речиси сите обвинувања. Последните клевети за примање мито за да се вклучиме во коалицијата ‘Твоја Македонија’, создавањето лажни профили со моето име и споделувањето лажни изјави и слично се веќе основа за вклучување на ОЈО во целиот процес. Буквално, освен клевета и навреда, украден ми е личниот идентитет и во мое име се објавуваат лажни изјави, што е кривично дело. Зошто токму јас сум предмет на тие хибридни напади? Кој се плаши од мојата вистинска факторизација на политичката сцена во земјата“, посочи Богојески.
Последната клевета од вицепремиерот и главен активист на ДУИ, Артан Груби, кој ја обвини Македонски концепт за руска партија, Богојески ја оцени како трагикомична. „Тоа веќе е трагикомично, со оглед на јавните прозападни ставови на мојата партија, и тоа години и години. Но, зошто токму ДУИ толку многу се плаши од Македонски концепт? Дали мојата чистота како човек, моето потекло и бескомпромисното поведение на борец за каузата се причина за тој страв кај ДУИ?“, прашува Богојески. Како сопруг и татко на две деца, вели дека не му е сеедно што политичката пресметка со навреди завршува и пред очите на семејството, па јавно прашува дали е тоа нивото на македонската политика или се може и подобро.
ПР-текст
Македонија
СДСМ Прилеп: Кривична пријава за градоначалникот Јовчески поради незаконски потпишан анекс на договор за јавна набавка
Заради постоење основи за сомневање дека со склучувањето анекс на Договорот за јавна набавка од 27.03.2024 година со фирмата ЕЛЕКТРО – ТОЧИЛА ИНЖЕНЕРИНГ увоз-извоз ДООЕЛ Прилеп, градоначалникот на Општина Прилеп Борче Јовчески направил повреда на законските одредби од Законот за јавни набавки, Општинската организација на СДСМ Прилеп против Јовчески поднесе кривична пријава за сторени кривични дела „Злоупотреба на службената положба и овластување“ и „Несовесно работење во службата“, истакна на денешната прес-конференција, Моника Грашеска Илиеска, координатор на советничката група на СДСМ и Коалицијата во Советот на Општина Прилеп.
Она што треба да се истакне, според неа, е дека услугата за која бил склучен анексот воопшто не била опфатена со Програмата за јавно осветлување на Советот на Општина Прилеп за 2024 година, со што градоначалникот Јовчески извршил фаворизирање на фирмата „ЕЛЕКТРО – ТОЧИЛА ИНЖЕНЕРИНГ“.
Дополнително, како што вели, спорниот анекс во висина од 998.614,00 денари бил склучен на 27.03.2024 година, односно за време на мандатот на преодната Влада, што значи дека постоела законска пречка за спроведување јавни набавки кои не биле внесени во Планот за јавни набавки.
„Советничката група на СДСМ и Коалицијата во Советот на Општина Прилеп, подолго време укажуваше на низа неправилности во практикувањето на функцијата од страна на градоначалникот Борче Јовчески, на локалната самоуправа и јавните комунални претпријатија.
Сето тоа доби на интензитет со распишувањето на претстојните двојни избори и со паничниот обид на прилепските локални власти, спротивно на законите, со редица коруптивни договори да дојдат до глас повеќе.
Посочениот пример со потпишаниот анекс со „ЕЛЕКТРО – ТОЧИЛА ИНЖЕНЕРИНГ“, заради кој градоначалникот Јовчески ја заработи кривичната пријава, е слика и прилика на криминалното и насилничко владеење на ДПМНЕ на секое ниво“, вели таа.