Македонија
Ковачевски и Бочварски од Прилеп: Инвестираме за подобрување на целокупната патна мрежа во Прилеп и Пелагонија

Претседателот на Владата на Република Северна Македонија, Димитар Ковачевски, заедно со министерот за транспорт и врски, Благој Бочварски, и министерот за внатрешни работи, Оливер Спасовски, е во работна посета на општина Прилеп, каде што извршија увид во реконструкција на локалната улица Леце Котески.
Реконструкцијата на оваа улица е дел од проектот за поврзување со локални улици и патишта, кој се реализира преку Министерството за транспорт и врски и преку кој им се дава директна поддршка на локалните самоуправи во вкупна вредност од 70 милиони евра за реконструкција на локални улици и патишта во општините.
„Почнавме со реконструкција на оваа улица, каде што, на мое големо задоволство, гледаме дека работите на терен се интензивираат. Со забрзано темпо се продолжува со поставување нов слој асфалт на улицата, каде што се изведува нова пешачка и велосипедска патека во должина од 2 километра. Со оваа динамика очекуваме зафатот да заврши во предвидениот рок. Со рехабилитацијата на оваа улица го подигнуваме нивото на безбедноста за сообраќај и овозможуваме побрза комуникација со жителите од Прилепскиот Регион“, рече претседателот на Владата на Република Северна Македонија, Димитар Ковачевски, при денешниот увид на реконструкцијата на улицата Леце Котески во Прилеп.
Притоа премиерот Ковачевски додаде дека за реализација на овој проект се обезбедени речиси 800 илјади евра.
„Реконструкцијата на улицата Леце Котески е дел од проектот за поврзување со локални патишта во општините за што се инвестирани 70 милиони евра, а досега се опфатени над 140 улици во над 60 општини. Инвестираме насекаде во целата држава, се грижиме за рамномерен регионален развој. Ги подобруваме условите за живеење во општините, ја зголемуваме нивната финансиска независност. Бидејќи развиени општини значат силна економија“, потенцира премиерот Ковачевски.
Министерот Бочварски потенцира дека динамиката на изградба е според планот на изведувачот. Досега се асфалтирани 800 метри од вкупно 2.000. Во наредните две недели цела должина ќе биде асфалтирана со прв слој асфалт, со што понатаму продолжуваат градежните активности за изградба на тротоарите и велосипедската патека. Оваа инвестиција е дел од вкупниот инвестициски циклус за Прилеп и Пелагонија во изградба и модернизација на патната мрежа.
„Владата преку Министерството за транспорт и врски продолжува силно да ги поддржува локалните самоуправи обезбедувајќи им неповратни средства за реализација на голем број проекти во патната инфраструктура, кои носат значаен бенефит за сите граѓани. За реконструкцијата на улица Леце Котески вложуваме речиси 50 милиони денари, а ова е втора улица што ја реконструираме во Прилеп по улицата Мице Козар, чија реконструкција е веќе завршена. Тука на дел од улицата веќе е поставен прв слој асфалт, а во овој момент се врши тампонирање и припрема за асфалтирање и на преостанатиот дел од трасата, како и на тампонирање на тротоарските површини. Прилепчани да бидат уверени, добиваат најбезбедна и модерна патна врска во градот“, истакна министерот за транспорт и врски, Благој Бочварски.
Министерот Бочварски исто така информира дека на владина седница е одобрен првиот инфраструктурен проект во должина до 29 километри за изградба на автопатот Прилеп – Битола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
МНР на Бугарија со длабоко разочарување: Изјавите на Мицкоски ги поткопуваат напорите за градење добрососедски односи и европска интеграција

Министерството за надворешни работи на Бугарија, се огласи по повод изјавите на премиерот Христијан Мицкоски. Тој рече дека „нема потреба да се внесуваат Бугарите во Уставот“.
„Министерството за надворешни работи на Република Бугарија го изразува своето длабоко разочарување и категорично ги осудува неодамнешните изјави на претседателот на Владата на Република Северна Македонија, г-дин Христијан Мицкоски. Овие изјави не само што ја искривуваат реалноста, туку и ги поткопуваат напорите за градење добрососедски односи и европска интеграција.
Сакаме да нагласиме дека прашањето за правата на Бугарите во Република Северна Македонија не е билатерален спор меѓу нашите две земји, туку е прашање кое влијае на темелните европски вредности и стандарди. Напредокот во процесот на европска интеграција на РСМ е можен само преку целосна и сеопфатна имплементација на Европскиот консензус, договорен и усвоен од Советот на ЕУ во 2022 година, чиј важен дел се измените на Уставот на РСМ. Почитувањето на правата на малцинствата и обезбедувањето на нивната еднаквост се основни принципи на Европската Унија. Во овој контекст, Република Северна Македонија, како земја кандидат за членство во ЕУ, има одговорност да го усогласи своето законодавство и практика со овие принципи“, велат оттаму и додаваат:
„Исто така, сакаме да го посочиме фактот дека огромен број граѓани на Република Северна Македонија се стекнале со бугарско државјанство, признавајќи го своето бугарско потекло и идентитет. Ги повикуваме властите во Република Северна Македонија да се воздржат од реторика која поттикнува поделби и омраза и наместо тоа да се фокусираат на исполнување на критериумите за членство во Европската унија, вклучително и заштита на правата на сите етнички заедници во земјата. Само преку искрен дијалог и меѓусебно почитување можеме да постигнеме одржлив развој и просперитет за нашите народи во обединета Европа“, соопштија од бугарското МНР.
Македонија
Мисајловски на состанокот на контакт групата за Украина, за првпат реализирана под водство на Обединетото Кралство

Министерот за одбрана Владо Мисајловски денеска во Брисел во рамки на предвидените состаноци на министри за одбрана на Северноатлантскиот совет на НАТО, учествуваше на состанокот на Контакт групата за Украина, кој за првпат се реализира под водство на Обединетото Кралство.
На состанокот предводен од секретарот за одбрана на Обединетото Кралство, Џон Хили, на кој учествуваа министри и високи претставници на 50-тина земји, генералниот секретар на НАТО Марк Руте како и високиот претставник за надворешна и безбедносна политика на ЕУ, Каја Калас, фокус беше поддршката на Украина.
Од започнувањето на агресијата врз Украина, македонската Влада досега има донесено 15 (петнаесет) одлуки за хуманитарна и воено-техничка помош и поддршка на Украина и украинскиот народ како земја која ја брани својата независност и територијален суверенитет и во континуитет се залага за почитување на меѓународното право и правен поредок.
Престојот во Брисел продолжува и утре со состанокот на Северноатлантскиот совет на НАТО на ниво министри за одбрана и состанокот на Советот НАТО- Украина.
Македонија
Врнежи од снег кај Маврово, Плетвар, Попова Шапка и Крушево, засега не преставуваат пречка за одвивање на сообраќајот

Врнежи од снег со слаб интензитет се бележат во Маврово и на планинските превои Буково, Ѓавато и Плетвар, додека врнежи со среден интензитет се бележат на Попова Шапка и во Крушево, но во моментов не преставуваат пречка за одвивање на сообраќајот.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
Сообраќајот на државните патишта се одвива во зимски услови, по наместа влажни коловози, соопштија од АМСМ.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.