Времето денеска, утрото променливо облачно и студено, а преку денот времето ќе биде сончево со мала до умерена облачност. Ќе дува умерен до засилен северен ветер, наместа долж Повардарието со брзина над 60 km/h. Минималната температура ќе биде во интервал од -8 до 0, а максималната ќе достигне од 0 до 8 степени.

Во Скопје утрото претежно облачно, во текот на денот облачноста ќе се намалува. Ќе дува умерен, во делови од котлината повремено засилен ветер од северен правец. Минималната температура ќе се спушти до -3, а максималната ќе достигне до 6 степени.

Во наредните денови, следува период на стабилно и студено време со ниски утрински температури кои насекаде ќе бидат негативни, а наместа ќе се спуштат и под -10 степени.

Од ЈП Водовод и Канализација известуваат дека денеска ( среда ) без вода ќе останат следните корисници:

· поради изведување на приклучок од Ф-100мм на ул.20 бр.6 во с.Трубарево, прекинато водоснабдување ќе имаат корисниците од с.Трубарево, водоснабдувањето ќе биде прекинато од 10:00 часот до санирање на дефектот. ( општина Гази Баба)

· поради уличен дефект Ф-400мм на булевар 8ми-Септември во населба Карпош, прекинато водоснабдување ќе имаат корисниците од Бул. Илинден до кружен тек ( Хотел Александар Палас, спортскиот центар Борис Трајковски и базентот) водоснабдувањето ќе биде прекинато од 09:00 часот до санирање на дефектот. ( општина Карпош)

· поради промена на шибер Ф-80мм на ул. Коце Металец во населба Железара, прекинато водоснабдување ќе имаат кулите од истата улица со број 2А,2Б,2В,2Г, водоснабдувањето ќе биде прекинато од 09:00 часот до санирање на дефектот. ( општина Гази Баба)

Валмир Азири, поранешниот државен секретар за култура, направи срамен и неприфатлив чин, кој не само што го посрамува лично, туку и секој Албанец. На конкурсот во 2021 и почетокот на 2022 година, тој без двоумење го промени својот идентитет од Албанец во Македонец, само за да си овозможи лична корист и да обезбеди работно место кое беше наменето за македонската заедница, реагираат од коалицијата „Вреди“.

Ова, според нив, е чин на незамисливо предавство кон Албанците и сериозно кршење на вредностите кои нè дефинираат како нација.

„Демократската унија за интеграција, која постојано зборува за заштита на интересите на Албанците, не се двоумеше да ја продаде секоја вредност и идентитет на Албанците кога станува збор за лични интереси. Овој скандал е јасен одраз на хипокризијата и неспособноста на оваа политичка партија, која продолжува да профитира од позициите и да манипулира на грбот на Албанците. Се поставуваат важни прашања по овој скандал: Која е договорената шема што го натера Валмир Азири да направи ваков чекор? Дали неговото молчење додека беше државен секретар беше дел од агенда за деградирање и маргинализирање на Албанците во културата? Дали може поинаку да се нарече индивидуа која е подготвена да го продаде својот идентитет за лични интереси?“.

Ова, како што оценуваат во „Вреди“ е чин кој не смее да остане без последици.

Коалицијата, нагласуваат од таму, е решена да се бори против секој обид за манипулација и газење на албанскиот идентитет за тесни и лични интереси.

Бараат итна одговорност за овој, како што велат, тежок скандал и се обврзуваат да обезбедат дека лица како Валмир Азири нема да имаат место во институциите што треба да ги штитат интересите и вредностите на Албанците.

Ова, нагласуваат од коалицијата, е јасна порака за сите оние кои мислат дека можат да ја предадат албанската култура и идентитет за лична корист.

„Коалицијата „Вреди“ нема да запре и ќе продолжи да ги брани интересите на Албанците и нашиот национален интегритет“.