Советничката од редовите на СДСМ во Советот на Град Скопје, Кети Штерјова, денеска ја обвини владејачката коалиција дека во Општина Чаир била донесена одлука за промена на имиња на улици без примена на Бадентеровото мнозинство.

Штерјова оцени дека со одлуката, како што рече, се прекршуваат законските процедури и механизмите предвидени со Охридскиот рамковен договор.

„Важат ли законите во општина Чаир? Очигледно не! Се уште не се решени огромните скандали со дивоградбите, досега никој не одговараше. Коалициските партнери ВМРО и ВЛЕН се штитат меѓусебно. Последниот скандал е со амин на ВРМО, нивниот коалицискиот партнер ВЛЕН, во Советот на Општина Чаир ги промени имињата на две улици без Бадентерово мнозинство. Грубо е прекршен механизмот за една од клучните гаранции на Охридскиот договор за носење одлуки за прашања што ги засегаат меѓуетничките односи, во овој случај Македонците“, рече Штерјова.

Советничката тврди дека улиците биле именувани по припадници на УЧК и предупреди дека ваквите одлуки можат да предизвикаат меѓуетнички тензии.

„Улиците се именувани по припадници на УЧК. Носење на вакви одлуки може да создаде меѓутнички тензии и да ја поткопа довербата кај граѓаните – Македонци. Очигледно коалицијата на власт намерно сака да создаде меѓуетнички тензии во општина која важи за толерантна и каде луѓето се почитуваат меѓу. Само за да ги покријат своите скандали. Лажниот патриотизам на ВМРО се гледа насекаде и создава проблеми на секое ниво. Се е лага кај ВМРО. Со лаги и манипулации дојдоа на власт, така и владеат. Ги штитат своите функционери и нивните коалициски партнери од одговорност за дивоградбите а ги газат механизмите што ја штитат државата и меѓуетничките односи. Граѓаните веќе јасно гледаат дека за ВМРО и ВЛЕН законите не важат, ги интересораат само бизнисите, тендери и привилегиите“, истакна Штерјова.

Од СДСМ побараа повлекување на одлуката за која тврдат дека е незаконска и порачаа дека законите мора да важат за сите.

Многу капитални проекти во Охрид – објави на својот фејсбук профил, заменик претседателот на Владата и министер за транспорт Александар Николоски, кој заедно со премиерот Христијан Мицкоски и градоначалникот на Охрид, Кирил Пецаков извршија увид во инфраструктурни проекти во Охрид.

Во својата објава Николоски напиша:

„Денес заедно со премиерот Христијан Мицкоски и градоначалникот на Охрид Кирил Пецаков направивме увид на неколку големи капитални проекти.

Ја посетивме улицата Кленоец која целосно се реконструира со поддршка на Министерството за транспорт. Се изврши реконструкција на атмосферска и фекална канализација како и асфалтирање на улицата. Оваа улица претставува една од главните артерии за поврзување на овој дел од градот.

Го посетивме новиот објект на училиштето Кочо Рацин и Младинскиот центар во склоп на истото. Оваа функционална целина е од огромно значење за младите и сите жители од овој дел на Охрид.

Заедно со министерката за образование Весна Јаневска направивме увид во активностите во охридската гимназија, репрезентативен објект на градот.

Многу проекти и многу инвестиции во Охрид“ – објави заменик претседателот на Владата, Николоски.

Премиерот Христијан Мицкоски и претседателот на СДСМ, Венко Филипче, и денеска излегоа со спротивставени ставови околу измените на Изборниот законик, особено околу предложениот модел за гласање на дијаспората.

Мицкоски ја повика опозицијата на, како што рече, одговорност и зрелост, оценувајќи дека владината коалиција е усогласена за Изборниот законик, додека Филипче тврди дека проблем е можноста за, како што рече, изборни манипулации.

Мицкоски: Опозицијата да предложи решение, ние ќе го поддржиме

Премиерот изјави дека Владата очекува од опозициските партии конкретен текст со предлози за Изборниот законик, кој, според него, би бил прифатен.

Коментирајќи го предлогот на Филипче за формирање експертска група за Изборниот законик и гласањето на дијаспората, Мицкоски рече дека таквите тела често можат да го забават процесот.

„Од моето искуство и во животот и во политиката, ако сакате некоја работа да не се заврши, тогаш формирајте група или комисија и тогаш работата нема да добие тек како што треба да добие“, изјави Мицкоски.

Тој оцени дека СДСМ и Левица го блокираат процесот со, како што рече, изговор дека се загрозува гласањето на дијаспората.

„Тие четири месеци работеа во Парламентот, се договараа, преговараа и наеднаш кога сфатија дека треба да сработат нешто, тогаш заедно со другата политичка партија во опозиција Левица одлучија да го блокираат овој процес“, рече премиерот.

Владата нуди поддршка за предлог за дијаспората, вели Мицкоски

Мицкоски посочи дека опозицијата може да предложи експерти и сопствен текст за регулирање на гласањето на дијаспората, а Владата, како што рече, би го прифатила.

„Донесете текст во кој ќе биде вклучена и методологија како би гласала дијаспората поинтензивно, ние без да го проверуваме веднаш ќе го поддржиме“, изјави Мицкоски.

Тој додаде дека актуелната власт веќе организирала локални избори кои, според него, поминале во „скандинавски тек“, што се гледало и преку бројот на поднесени приговори.

Мицкоски оцени дека опозицијата треба да биде искрена кон граѓаните и своите поддржувачи и дека причините за блокадата, според него, се обид да се избегне соочување со изборите.

Филипче: Проблем е можноста за изборни манипулации

Лидерот на СДСМ, Венко Филипче, оцени дека единствениот проблем со предложениот Изборен законик е, како што рече, обидот на ВМРО-ДПМНЕ да воведе механизми кои можат да ја доведат во прашање легитимноста на изборите.

„Тоа дека е дел од реформската агенда и тоа што власта кажува дека тоа е нешто што е за нив многу важно, меѓутоа не отстапува од тоа што таму се става еден член со кој сериозно може да се доведе во прашање легитимноста на било кои следни избори, е уште еден доказ дека нив Европа навистина не ги интересира“, рече Филипче.

Тој нагласи дека СДСМ ја поддржува европската агенда, но не, како што рече, по цена на можност за изборна злоупотреба.

„Спремни сме и секогаш ја поддржуваме Европската агенда, но не по цена ВМРО да протне механизам со кој што можат утре да ги крадат изборите“, изјави Филипче.

СДСМ бара експертска дебата за гласањето на дијаспората

Филипче рече дека доколку се повлече спорниот член со кој се менува начинот на гласање на дијаспората, може да се отвори институционална дебата за можни решенија.

Тој предложи формирање работна група која би ги анализирала искуствата од други држави и би дала препораки за евентуални промени.

„Еве нека се формира работна група која доколку треба може да разговара за некој начин соодветен како поинаку би гласала дијаспората, да им се олесни, но не со примери какви што во Европа досега не функционирале“, рече Филипче.

Според него, треба да се анализираат можностите за електронско гласање или гласање по пошта, но само по стручна проценка и со обезбедени гаранции за изборниот процес.

„Нашата забелешка е принципиелна. Изборен грабеж, кражба нема да дозволиме“, порача Филипче.

Тој додаде дека СДСМ не е против гласањето на дијаспората, но дека сите промени мора да обезбедат фер и легитимен изборен процес.