Лекарската комора ги осудува јавните вербални навреди, напади и притисоци врз лекарите и лекарската професија, како и неоснованите обвинувања за направена лекарска грешка, што се зачестено присутни во медиумите и социјалните мрежи.

„Апелираме да престане секојдневниот и голем притисок врз докторите од ЈЗУ Клиничка болница ‘Д-р Трифун Пановски’ – Битола, кој е присутен иако инспекцискиот и стручниот надзор, како и извештајот на Судската медицина, не утврдија лекарски грешка и стручен пропуст во лекувањето и не е констатирана причинско-последична врска меѓу терапијата што ѝ била дадена на петгодишната пациентка и исходот од лекувањето.

Во такви услови целосно е неоправдано континуирано да се создава јавно мислење дека сите лекари во нашата земја, вклучително и во болницата во Битола, работат нестручно и несовесно. Процесот на создавање лекар трае долго време и бара посветеност, континуирано учење и залагање, што е голема инвестиција на самиот лекар, неговото семејство, но и на образовниот и здравствениот систем. Истакнуваме дека повеќето од лекарите професионално, одговорно, стручно и посветено секојдневно се грижат за здравјето на пациентите во условите што постојат во здравствениот систем. Не постои доктор што не сака да го излекува својот пациент“, додаваат во реакцијата.

Докторите, како најважен фактор на здравствениот систем, како што велат, мора да бидат еднакво заштитени и почитувани, без разлика дали се дел од јавното или приватното здравство, затоа што сите се образоваат на истите факултети и најчесто најголем дел од својот професионален развој го достигнуваат во јавните здравствени установи. Иако јавното здравство се соочува со предизвици во однос на расположливите ресурси, докторите од Клиничката болница во Битола, а и во сите други јавни здравствени установи, секојдневно се обидуваат да пронајдат начини како да се подобрат условите, да не се затвораат одделенија и да им се овозможи на пациентите подобра здравствена заштита со поголемо обострано разбирање и трпение. Оценуваат дека неоправданиот притисок што се прави врз лекарите создава услови за нивно заминување од јавното здравство, што е примарно на штета на пациентите.

Лекарската комора ја истакнува и важноста, медиумите и новинарите, кои влијаат врз креирање на општото јавно мислење, да ги почитуваат професионалните стандарди при известувањето за лекувањето пациенти и да пренесуваат проверени информации од официјални извори со почит кон пациентите и нивната приватност. Ширењето шпекулации и до крај непотврдени информации прави поширока општествена штета.

„Изразуваме жалење и разбирање за болката на пациентите и нивните семејства, но потенцираме дека состојбите нема да се подобрат со ширење говор на омраза кон лекарите и споделување нестручни процени и тврдења. Надлежните институции се единствени во земјата што даваат официјално, стручно мислење врз основ на факти и тие се единствен извор на точни и прецизни информации за настанатата состојба. За одржливост на здравствениот систем ја истакнуваме важноста лекарите и пациентите да ги почитуваат одлуките на институциите, а тие да постапуваат ажурно и кога ќе се утврди лекарска грешка, но и кога лекарот ќе биде неосновано напаѓан и обвинуван“, истакнуваат од Лекарската комора.