Демократскиот сојуз оценува дека имплементацијата на Законот за зелените пазари е без претходна подготовка и консултација со еснавските асоцијации и пазарџиите.

Демократскиот сојуз бара Министерството за економија да предложи до Парлаламентот да се одложи примената на овој закон за една година, а во меѓувреме да направи анализа на проблемите со зелените пазари и предложи решенија користејќи ги искуствата од другите држави.

Во оваа насока, тие предлагаат сопствениците на пазарите да имаат обврски за примена на високи хигенско-санитарни стандарди, услови за работа за продавачите, покривање на пазарите, како и јасни критериуми кој може да биде продавач, нивните социјални права и друго.

„Голем број на пазарџии се социјално загрозени, работат во тешки услови, на минус 10 или на четириесет степени и сл. Институциите треба да поведат сметка и за препродавачите, сопствениците на пазарите и сите други кои имаат финансиски интерес, а ги одбегнуваат давачките спрема државата“ велат од Демократкиот сојуз.

Градоначалникот на општина Ѓорче Петров, Александар Наумовски продолжува со расипничкото трошење на парите на граѓаните, а колку повеќе се расфрла толку помалку е заинтересиран за круцијалните проблеми со кои се соочуваа општината, порача Бојан Стојаноски од ВМРО-ДПМНЕ.

„Клучниот проект на Наумовски во година и половина раководење со општината е зголемување на сопствената плата за 4.100 денари, пари со кои примателите на социјална помош преживуваат во текот на целиот месец. Сега платата на градоначалникот изнесува 65 илјади денари, со што тој зема плата речиси три пати поголема од просечната во Република Македонија“ вели Стојаноски.

Тој додаде дека додека ѓорчевци се гушат поради енормното загадување, кое пред само некој ден достигна 800 микрограми на метар кубен пм 10 честички, што е за 16 пати над дозволеното, Наумовски ужива во локалните кафеани трошејќи ја платата која сам си ја покачи.

Решение за аерозагадувањето нема, вели Стојановски, иако во предизборната кампања за локалните избори ветуваше експресно надминување на овој најгорлив проблем на граѓаните.

„Наумовски заборави и на своите ветувања за изградба на базен и градинка во општината од кои по година и половина се уште нема ни трага ни глас. Пари нема за овие клучни проекти кои тој им ги вети на граѓаните на општина Ѓорче Петров. Но затоа има 1 милион денари за репрезентација, односно за јадење и пиење, повеќе пари за покачување на сопствената плата и за нови партиски вработувања. Наумовски е срам за општината и време е да си замине“ нагласи Стојаноски.

Наместо градоначалникот на Град Скопје Петре Шилегов, на прес-конференција денеска се појави неговиот портпарол Ваљон Салиху кој ги соопшти чекорите што ќе бидат преземени поради енормното аерозагадување, кое трет ден по ред го надминува законски дозволениот минимум.

Од денеска се воведува бесплатен јавен превоз во автобусите на ЈСП и во автобусите на приватните превозници, се до моментот на намалување на загадувањето. Понатаму, Град Скопје ги прекинува сите градежни активности на градилиштата под своја надлежност, а беа повикани и сите градоначалници од општините во град Скопје, да ги прекинат градежните активности на градилиштата во нивна надлежност.

Цената на паркирањето на паркиралиштата на Градски паркинг од овој момент двојно се зголемува и тоа важи се до престанокот на итните мерки.

„Град Скопје ја интензивираше контролата на градилиштата, односно возилата што излегуваат од градилиштата мора да имаат измиени тркала и да се покриени со церади заради контрола на прашината. Го задолжуваме ЈП „Комунална хигиена“ да го продолжи интензивното чистење на градските улици и булевари што се во надлежност на Град Скопје и им препорачувам на скопските општини да го направат истото на улиците што се во нивна надлежност“, соопшти Салиху.

Град Скопје ги повика градоначалниците на општините во градот Скопје да ги интензивираат инспекциските надзори над субјектите кои управуваат со отпадни гуми и отпадни масла, а МВР да спроведе ограничување на обуките на автошколите од 9,30 до 14,30 и по 18,00 часот и да врши зачестени контроли на издувните гасови на возилата кои учествуваат во сообраќајот.

„Ова не е битка која што ја водиме само денес. Град Скопје работеше цела година на 25 нови мерки против загадувањето кои ги немаше претходната градска администрација, а кои беа иницијативи на стручната и граѓанската јавност, препораки во студиите за загадувањето. Не можеме сами во оваа битка, потребна е поголема вклученост и на другите институции и на граѓаните“, рече Салиху.