Од здружението за заштита на животните „Анима мунди“ информираат дека заедно со неколку други здружениja поднеле кривична пријава за случајот со затруени кучиња, кои потоа беа живи закопувани во Пехчево.

Пријавата на „Анима мунди“, здружението за заштита на животните и животната средина „ЕДЕН“, Daisy Family Rescue i Helping strays in Ohrid, Macedonia е поднесена против непознати сторители вработени во Комуналец – Пехчево; ЈКП Комуналец – Пехчево и општина Пехчево.

„Постои основано сомнение дека на ден 19 и 20 февруари годинава околу пладне во Пехчево, непознати лица вработени во ЈКП Комуналец, со помош на вили и градежна механизација подигнувале од улица, а потоа и затрупувале со земја, живи бездомни и домашни кучиња, кои претходно биле затруени. Од видеоматеријалот во јасно се гледа дека неколку кучиња – домашни миленици и бездомни, собирани со вили, а со помош на градежна механизација се фрлени во дупка и видно грчејќи се во агонија предизвикана од отровот, немаат можност да избегаат, со што се осудени на сурова и мачна смрт“, велат од „Анима мунди“.

Од здружението за заштита на животните велат дека очекуваат темелна истрага и најстрога казна за сите инволвирани во овој грозоморен случај.

Мајката на 26-годишниот Пино Секондо, Маја Трпковска, за во понеделник пред Собранието, со почеток во 16:30 часот, најави протест со цел притисок врз надлежните институциите за пронаоѓање на нејзиниот син .Таа за „Макфакс“ вели дека е разочарана од досегашната потрага по Пино, за кој 73 дена нема слушнато никаква вест. Трпковска на мирниот протест ги повика семејствата кои имаат исчезнати деца или роднини да се приклучат и заеднички да кренат глас.

„Нема да се откажам од потрагата по мојот син. Поминувам низ невидена агонија. Не знам како може полицијата да нема информации за случајот, а згора на тоа инспекторите кои го водат случајот повеќе не ми креваат слушалка, ме блокирале на телефоните. Не знам веќе каде да се обратам. Дали е оваа држава? Да бев во европска држава, ќе ми донесеа и психолог да ми помага во овие тешки мигови, а не да бегаат од мене. Не сум политичар, не знам да зборувам како нив, но ако имаат срце, нека се ангажираат повеќе, и тие се родители, луѓе пред сè. Чувствувам дека моето дете е живо, затоа и се одлучив на овој чекор, да барам јавна поддршка“, изјави Трпковска за „Макфакс“.

Инаку, таа додава дека Пино бил мирно момче, не се дружел со лошо друштво, вреден, комуникативен и ведар по природа. Пред да исчезне излегол од дома со автомобил „шкода фабија“ со регистарски таблички SK 1566 AP. Два и пол месеци од тогаш нема трага ни глас од него, ниту, пак, е виден автомобилот.

Министерството за внатрешни работи ги отфрла шпекулациите за постоењето на киднапери кои киднапираат поради препродажба на човечки органи. Оттаму велат дека досега кај нив не се пријавени ниту случаи на киднапирање поради органи, ниту се вистинити наводите дека досега на исчезнати жртви им недостигале органи

„Деновиве преку социјалните мрежи во јавноста се шират целосно неточни информации во кои се злоупотребуваат актуелните случаи на исчезнати лица. Граѓаните да бидат спокојни и да не потпаѓаат на шпекулативни дезинформации кои предизвикуваат паника и вознемиреност. МВР за последните случаи на исчезнување, коишто се целосно расчистени, јасно и недвосмислено соопшти дека се работи за класични случаи на самоубиство. Неосновани се и дезинформациите дека има пораст во бројот на исчезнати лица, како што е соопштено и во текот на вчерашниот ден – статистичките податоци покажуваат дека не постои тренд на пораст во исчезнувањата, и дека во континуитет во последниве 5 години пронаоѓањето на пријавените исчезнати лица се реализира со околу 94% Статистичките податоци од 2014 заклучно со 2018, од 2008 пријавени случаи за исчезнати лица, пронајдени се 1876 лица. Дополнително, на веб-страницата на МВР може да се проверат сите податоци и сите актуелни случаи на исчезнати лица МВР апелира до медиумите и граѓаните да се воздржат од ширење на дезинформации кои ја вознемируваат јавноста, и да се повикуваат на официјално објавените податоци од надлежните институции“, соопштуваат од МВР.