Младите земјоделци во фокусот, над 50 милиони евра поддршка преку ИПАРД и „Млад земјоделец“, изјави на прес-конференција, Гоце Георгиевски од Комисијата за земјоделство, шумарство и водостопанство на СДСМ.

Тој рече дека младите земјоделци се во фокусот на развојните мерки, програми и политики на СДСМ.

„На располагање се над 50 милиони евра од ИПАРД програмата како и мерката „Млади земјоделец“. Огромна можност, огромен потенцијал за развој, огромна шанса за успех. Во тек е нов повик за млади земјоделци за поддршка од 10.000 евра по корисник, од Националната програма за рурален развој. За прв пат од оваа година, авансна исплата во износ од 40% за младите кои ќе добијат грант за мерката “Млад земјоделец” и тоа веднаш по потпишувањето на договорот. Во тек е и програмата ИПАРД 3 која нуди дури до 70% кофинасирање во инвестиции“, рече Георгиевски.

Ги повика сите млади земјоделци да аплицираат и да ги искористат средствата.

Ако е толку очајна ситуацијата како што СДС вели, нека закаже избори, па тогаш ќе видат колку поразени ќе бидат, реагира ВМРО-ДПМНЕ откако СДСМ констатира дека во опозициската партија се случува распад поради суети.

„СДС наместо да пишува соопштенија полни со лаги и манипулации, нека си ги решат прво проблемите во својот двор.

И ако е толку очајна ситуацијата како што СДС вели преку своите гласила, тогаш нека се осмели да закаже избори, па тогаш ќе видат колку поразени ќе бидат.

Вознемиреноста на СДС секој ден се воочува и е се поочигледна.

Јасно може да се воочи дека СДС е највознемирена поради две работи, првата е пропаста на стратегијата и кампањата дека Груевски ја води ВМРО-ДПМНЕ, a втората е дека пропаѓа оската ДУИ-СДС и делови од опозицијата за уставни измени“, се вели во соопштението.

Претседателот Стево Пендаровски, во рамки на учеството на Генералното собрание на ОН, вчера попладне во Њујорк ја одликуваше Организацијата на Обединетите Нации со Орден на Република Северна Македонија.

Претседателот Пендаровски му го врачи одликувањето на генералниот секретар на ОН, Антонио Гутереш кое се доделува за големата помош и поддршка на ОН при справувањето со последиците од катастрофалниот скопски земјотрес и за непроценливиот придонес за обновата на градот Скопје, којшто прерасна во град на солидарноста и вистински симбол на пријателството меѓу народите.

Претседателот Пендаровски оствари и средба со генералниот секретар на ОН, Антонио Гутереш на која се разговараше за севкупните активности на Република Северна Македонија во рамки на Обединетите Нации, како и за улогата на организацијата во справувањето со глобалните предизвици.

Претседателот Пендаровски се заблагодари за посветеноста на ОН во нашата земја и изрази очекување соработката во иднина да продолжи со зголемен интензитет. Тој нагласи дека континуираниот ангажман на ОН во Северна Македонија придонесува за зајакнување на капацитетот на земјата во клучните сектори за развој на македонското општество.

На средбата беа разменети мислења и информации за текот на нашите евроинтеграции, за актуелната политичка и безбедносна состојба во регионот, како и за руската воена агресија врз Украина. Претседателот Пендаровски ја истакна нашата силна заложба и посветеност за јакнење на улогата на ОН во справувањето со глобалните предизвици.