Додека во Македонија нема вакцини, тече само процесот на ревакцинација, граѓаните бараат спас и се вакцинираат во соседството, светот сериозно се подготвува како да се справи со новите соеви на коронавирусот, вели Марија Андоновска, член на ИК на ВМРО-ДПМНЕ.

„Новиот индиски сој т.н. „Делта“ според британски извештаи не се детектира со вообичаените ПЦР текстови. Тоа би значело дека се потребни нови реагенси за ПЦР тестови за да се детектира овој сој. Но, што прави нашата власт!? Додека во светот се прават анализи, проценки за новиот сој, планови како да се постапи и слично, надлежните во Македонија немаат абер. Уште во пред да го имаме првиот случај во Македонија, ВМРО-ДПМНЕ апелираше да се набават повеќе реагенси, масовно и бесплатно да се тестира. Заев и Венко немаа слух за апелите од опозицијата и народот“, изјави на денешната прес конференција Андоновска.

Според Андоновска, исходот од негрижата се над 5.000 изгубени животи и народ оставен сам да се снаоѓа како знае и умее.

„Со волкав процент на вакцинирани во овој момент, факт е дека тешко ќе постигнеме колективен имунитет наскоро. Со овој мал процент на вакцинирани, четврт бран е неминовен. Ама зошто Венко Филипче и Зоран Заев да се грижат за тоа како да спречат евентуален четврти бран, кога можат да уживаат“, вели Андоновска.

Од нејзината партија упатија прашање до министерот за здравство дали има план како да се справи со евентуален 4-ти бран и дали има намера да набави ПЦР тестови кој би го детектирале новиот сој бидејќи постоечкиот како што велат не е соодветен за да открие евентуално постоење на новиот сој од коронавирусот.

Андоновска му порача на министерот за здравство, конечно како што рече да почне да работи, да заборави на провизиите и да се погрижи за здравјето на граѓаните.

На вакциналните пунктови во државата заклучно со вчера вакцинирани се вкупно 263.083 граѓани, информираат од Министерството за здравство.

Прва доза вакцина вчера примиле 3.606 граѓани, а вчера вкупно се вакцинирале 5.611 граѓани. Во државата вкупно се аплицирани 458.131 дози вакцини, а ревакцинирани се 195.048 граѓани.

„Со последните бројки 48 % од населението над 70 години имаат примено барем една доза вакцина, 42 % од населението над 65 години е вакцинирано со барем една доза вакцина и 36 % од населението над 60 години е вакцинирано со барем една доза вакцина“, посочуваат од ресорното министерство.

Од таму додаваат дека интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 452.093 граѓани.

Масовна вакцинација се одвива во неколку градови во државата и тоа во А1 СЦ Борис Трајковски во Скопје и во спортските сали во Кавадарци, Куманово, Тетово, Штип, Битола, Струмица, Охрид, Велес и Прилеп.

Од денеска е отворен и јавен повик за самокандидарање на кандидати за градоначалници на општините и Град Скопје за претстојните локални избори, изјави Мартин Попов, организационен секретар на СДСМ.

Повикот со сите детали е достапен на веб – страната на СДСМ, а од утре ќе биде објавен и оглас во печатените медиуми на македонски и албански јазик.

„Отворени сме за сите кои имаат желба да се вградат во напредокот, да придонесат, да бидат дел од најдоброто. Со висок углед и кредибилитет во локалната заедница и регионот на живеење, кои имаат поддршка од сите етнички заедници, кои ги почитуваат принципите и вредностите едно општество за сите граѓани и во целост ги почитуваат начелата и принципите на кои се темели СДСМ“, рече Попов.

Како што кажа, дел од новитетите е што од секој кандидат треба да достави и детална програма со предлог идеи и проекти за развој на општината или град Скопје за периодот 2021-2025 година, и изјава за прифаќање и почитување на Етичкиот кодекс на СДСМ.