Министерката Петровска: До општина Желино ќе биде испратено барање за изградба на спомен-обележје за загинатите бранители кај Карпалак

Министерката за одбрана, Славјанка Петровска, денеска, на спомен-плочата кај Карпалак, ја предводеше делегацијата од Министерството, која положи венец свежо цвеќе во спомен на десеттемина бранители, припадници на Армијата, кои во 2001 година го загубија својот живот кај месноста Карпалак на патот Скопје – Тетово.

Во оваа пригода министерката Петровска истакна дека десеттемина херои на македонската Армија несебично се одѕваа на повикот на татковината и затоа никогаш нема да бидат заборавени. На семејствата на загинатите им порача дека нивните синови ќе бидат запаметени вечно како херои, кои за татковината го дадоа најскапоценото – својот живот.

На прашање за изградба на спомен-обележје, министерката информира дека уште денеска Министерството ќе испрати барање до Општина Желино за подигнување спомен-обележје за загинатите бранители кај Карпалак.

„Овие луѓе го дадоа најскапоценото, својот живот, за нашата татковина и како министерка за одбрана сметам дека заслужуваат достојно спомен-обележје, со кое нема да ги вратиме назад, но ќе имаме место каде што достојно ќе оддаваме почит. Денеска, во текот на денот, во Општина Желино, која е надлежна Општина, како што направив и за Вејце, ќе испратам барање да биде дозволено тука да се изгради достоен споменик, а се разбира, Министерството е подготвено тоа да го реализира“, рече министерката.

Кај Карпалак загинаа бранителите Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.