Македонија
Мицкоски: Во инфраструктурата имаме големи инвестиции, експресниот пат Градско – Фариш ќе се пушти многу бргу од денес

„Што се однесува до пуштање во употреба на експресниот пат којшто ќе ги поврзува Градско, најпрвин Фариш, а потоа Клисура Дреново, тоа е во вкупна должина од отприлика 25 километри ќе биде набрзо од денес. Таму ќе се движат, по тој експресен пат, возилата со брзина од 130 километри на час“, посочи премиерот Мицкоски одговарајќи на новинарски прашања.
„Сега ја пуштаме делницата од Градско до Фариш. Има мало свлечиште коешто очекувам да биде санирано. Пуштањето, мислам дека ќе биде на 14-ти овој месец, тоа би се рекло за шест дена од денес. Со што драматично ќе се намали времетраењето на патување до Прилеп и Битола и тој дел на Македонија. Исто така, продолжуваат и активностите на автопатот помеѓу Прилеп и Битола, очекувам во рок од три години да биде и тој завршен. Има една карпа којашто претставува опасност за возилата и патниците во делот на потегот Дреново, кај Фариш, Клисура Дреново и таа ќе се санира. Очекувам и тој дел да биде пуштен во март, со што би се заокружиле овие 25 километри”, истакна претседателот на Владата Мицкоски.
Тој посочи дека покрај експресниот пат којшто ги поврзува Чатал-Длабочица-Крива Паланка, односно Страцин-Крива Паланка од 25 километри, и која е пуштена неодамна во употреба некаде на 17-ти јануари ќе се пушти во употреба првата делница од пругата кон Бугарија, Куманово -Бељаковце.
„Така што, сето она коешто стоеше, сега полека се задвижува. Течат инфраструктурните активности на Коридорот 8 и 10Д. Очекувам пред да почне туристичката сезона, втора половина на мај, прва половина на јуни, да ја пуштиме делницата од Врбјани до Охрид, со исклучок на делот кај местото Ботун. Тука имаме мало свлечиште коешто треба да се санира, и до крајот на 2026 да го пуштиме целиот потег на автопатот Кичево-Охрид. Очекувам да биде распишан тендерот Букојчани-Кичево со што и тука би се поврзале овие два коридора. Очекувам после адаптацијата, конечно да имаме успешно наддавање Блаце-Скопје, проектирање на тунелот Тетово-Призрен и така натаму и така натаму“, истакна премиерот Мицкоски.
„Очекувам да биде завршено, како и проектирањето Куманово-Страцин, обиколница Битола, граничен премин Меџитлија. Сето ова се проекти коишто се во процес на или проектирање или изградба и завршување“, подвлече претседателот на Владата, Мицкоски одговарајќи на новинарско прашање во однос на тоа кога ќе биде готов патот Градско-Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Ние сме единствената партија во која што членството бира претседател на директни внатрепартиски избори што говори за демократскиот капацитет

Попладнево се одржа седница на Централниот одбор на СДСМ.
На седницата, Централниот одбор оцени дека со погрешните политики на актуелната власт на ВМРО-ДПМНЕ животниот стандард на граѓаните со месеци се влошува, граѓаните имаат се помалку пари додека платите стагнираат.
„Власта покажува голема неспособност, нема одговор за покачувањето на цените, за осум месеци не понуди ниту една успешна економска мерка додека во здравството се случува хаос и недостаток на лекови, образованието уназадува и генерално земјата се движи во погрешна насока. СДСМ останува посветена на борбата за подобар животен стандард. Како одговорна партија СДСМ ќе понуди пакет на законски решенија за заштита и подобрување на животниот стандард на граѓаните. Согласно Статутарните одредби, Централниот одбор донесе Одлука за распишување на директни внатрепартиски избори за избор на Претседател на СДСМ кои ќе се одржат на 16 март 2025 година“, велат од Централниот одбор на СДСМ.
Воедно Централниот одбор избра нов состав на Централна изборна комисија на СДСМ и го усвои Правилникот за критериумите, начинот и постапката за кандидирање и избор на Претседател на партијата.
„СДСМ е единствената партија во земјата во која што членството бира претседател на директни внатрепартиски избори што говори за демократскиот капацитет и на партијата и на членовите. На оваа седница Централниот одбор го одобри и планот за интензивни теренски активности кои ќе започнат овој месец, на средби со членовите и граѓаните ширум земјата. Паралелно ќе течат и подготовките за локалните избори оваа година“, рекоа оттаму.
Македонија
МНР на Бугарија со длабоко разочарување: Изјавите на Мицкоски ги поткопуваат напорите за градење добрососедски односи и европска интеграција

Министерството за надворешни работи на Бугарија, се огласи по повод изјавите на премиерот Христијан Мицкоски. Тој рече дека „нема потреба да се внесуваат Бугарите во Уставот“.
„Министерството за надворешни работи на Република Бугарија го изразува своето длабоко разочарување и категорично ги осудува неодамнешните изјави на претседателот на Владата на Република Северна Македонија, г-дин Христијан Мицкоски. Овие изјави не само што ја искривуваат реалноста, туку и ги поткопуваат напорите за градење добрососедски односи и европска интеграција.
Сакаме да нагласиме дека прашањето за правата на Бугарите во Република Северна Македонија не е билатерален спор меѓу нашите две земји, туку е прашање кое влијае на темелните европски вредности и стандарди. Напредокот во процесот на европска интеграција на РСМ е можен само преку целосна и сеопфатна имплементација на Европскиот консензус, договорен и усвоен од Советот на ЕУ во 2022 година, чиј важен дел се измените на Уставот на РСМ. Почитувањето на правата на малцинствата и обезбедувањето на нивната еднаквост се основни принципи на Европската Унија. Во овој контекст, Република Северна Македонија, како земја кандидат за членство во ЕУ, има одговорност да го усогласи своето законодавство и практика со овие принципи“, велат оттаму и додаваат:
„Исто така, сакаме да го посочиме фактот дека огромен број граѓани на Република Северна Македонија се стекнале со бугарско државјанство, признавајќи го своето бугарско потекло и идентитет. Ги повикуваме властите во Република Северна Македонија да се воздржат од реторика која поттикнува поделби и омраза и наместо тоа да се фокусираат на исполнување на критериумите за членство во Европската унија, вклучително и заштита на правата на сите етнички заедници во земјата. Само преку искрен дијалог и меѓусебно почитување можеме да постигнеме одржлив развој и просперитет за нашите народи во обединета Европа“, соопштија од бугарското МНР.
Македонија
Мисајловски на состанокот на контакт групата за Украина, за првпат реализирана под водство на Обединетото Кралство

Министерот за одбрана Владо Мисајловски денеска во Брисел во рамки на предвидените состаноци на министри за одбрана на Северноатлантскиот совет на НАТО, учествуваше на состанокот на Контакт групата за Украина, кој за првпат се реализира под водство на Обединетото Кралство.
На состанокот предводен од секретарот за одбрана на Обединетото Кралство, Џон Хили, на кој учествуваа министри и високи претставници на 50-тина земји, генералниот секретар на НАТО Марк Руте како и високиот претставник за надворешна и безбедносна политика на ЕУ, Каја Калас, фокус беше поддршката на Украина.
Од започнувањето на агресијата врз Украина, македонската Влада досега има донесено 15 (петнаесет) одлуки за хуманитарна и воено-техничка помош и поддршка на Украина и украинскиот народ како земја која ја брани својата независност и територијален суверенитет и во континуитет се залага за почитување на меѓународното право и правен поредок.
Престојот во Брисел продолжува и утре со состанокот на Северноатлантскиот совет на НАТО на ниво министри за одбрана и состанокот на Советот НАТО- Украина.