Саша Богдановиќ вчера беше во кафеана, го служеа келнери, додека сите останати се под клуч и полициски час, обвини денеска пратеникот од ВМРО-ДПМНЕ, Бојан Стојаноски.

Според Стојаноски, градоначалникот на Центар бил снимен како седи во кафеана во оваа скопска општина.

„Како што можевме да видиме од сликите и видеата кои што беа прикажани на социјалните мрежи, навистина сметам дека нема апсолутно ништо и никаков протокол, никаков акт што би го заштитил градоначалникот на Центар да не поднесе оставка и да не понесе одговорност за овој настан“, рече претставникот на опозициската партија и обвини дека станува збор за брутално газење на законите.

На ваквите обвинувања веднаш реагираше Богдановиќ кој вели дека ојавените снимки се од негов работен ангажман во врска со кошаркарскиот клуб работнички.

„Во текот на вчерашниот ден, сместував гости во хотел дојдени од Белград и кошаркарот на КК Работнички, кој е најновото засилување во нашиот клуб“, објаснува тој.

Градоначалникот ги отфрла и демантира информациите дека станува збор за самоволно седење во кафеани за време на полициски час.

„За сето сместување и престој поседувам документација и сведоци. За да се расчисти целиот случај и да се докаже вистината, сите аргументи ги доставив до надлежни органи“, посочи Богдановиќ.

Средните училишта се подготвуваат за полагањeто на државната матура. На онлајн средбата со министерката за образование и наука Мила Царовска информираа дека постапуваат согласно заедничкото решение на Владата и Сојузот на средношколци за спроведувањето на завршниот испит.

„Најголем дел од училиштата веќе ги објавиле интерните испити. Уште еднаш повикав да се исполнат сите договорени елементи од матурата, затоа што тоа е во интерес на нашите ученици“, рече министерката Царовска.

Обврска на матурските предметни комисии е да подготват испитни задачи по секој предмет и да ги објават најдоцна три седмици пред полагањето. Од тие испитни задачи потоа се изготвува тестот за интерните испити.

Директорите на средните училишта информирале дека целосно ќе бидат спроведени сите безбедносни и заштитни мерки за полагање на матурата. Министерката Царовска била информирана и за текот на наставата како и за другите активности поврзани со воспитно-образовниот процес.

Заменик-претседателот на Владата задолжен за европски прашања Никола Димитров утре и задутре ќе престојува во работна посета на Рига и Вилнус.

Во рамки на утрешната посета на Латвија, предвидено е вицепремиерот Димитров да се сретне со министерот за надворешни работи Едгарс Ринкевичс, со претставници на латвискиот парламент (Saeima) – Рихардс Колс, претседател на Комитетот за надворешни работи, и Анда Вита Терауда, претседателка на Комитетот за европски прашања. Во Литванија, пак, в петок, вицепремиерот Димитров ќе биде примен од премиерката Ингрида Шимоните, како и од министерот за надворешни работи Габриелиус Ландсбергис, а ќе се сретне и со Радвиле Моркунаите-Микулениене, заменик-спикерка и претседателка на Комисијата за европски прашања во литванскиот Парламент (Seimas).

Балтичката турнеја на Димитров ќе биде заокружена со посета на Естонија во почетокот на мај. Таа е продолжение на серијата посети на Димитров во главни градови на ЕУ земји членки. Како и во Германија, Словенија, Хрватска, Австрија, така и во овие две балтички земји, кои се дел од групата „Пријатели на проширувањето“, ЗПВ Димитров ќе разговара со високите претставници на Латвија и Литванија во контекст на нивната поддршка за европското досие на Северна Македонија. На средбите Димитров ќе ја пренесе пораката за неодложната потреба од усвојување на преговарачката рамка и одржување на првата меѓувладина конференција на земјата со ЕУ, како прашање од стратешки интерес за регионот и за Европа. За таа цел, ќе ги претстави и конкретните реформски чекори за исполнување на европската агенда дома.

Ќе бидат разгледани и областите за зајакнување на билатералната соработка за успешно спроведување на европските реформи преку конкретна техничка поддршка, како и продлабочување на регионалната соработка во областите од заемен интерес, изнаоѓање одговор на актуелните глобални безбедносни предизвици и интензивирање на економската и трговска размена.