Мицкоски: За да се реши проблемот со аерозагадувањето, потребно е да се изградат когенеративни гасни централи

Премиерот Христијан Мицкоски на денешната надзорна расправа за аерозагадувањето рече дека оваа тема секоја зима е актуелна посочувајќи дека не е само воздухот проблем во квалитетот на животот на граѓаните туку и околината и животната средина.

Во однос на загадениот воздух Мицкоски истакна дека најголем причинител за таквата состојба е системот на затоплување на домаќинствата, јавните и индустриски објекти.

„Кога станува збор за воздухот и квалитетот на воздухот, најголем причинител, јас би се согласил со вас, е токму тоа што вие го кажавте – системот на затоплување на домовите. Но, и на индустриските објекти, јавните објекти. Имаме многу јавни објекти, кои што сè уште користат фосилни горива за затоплување“, истакна Мицкоски.

За решавање на овој проблем, премиерот Мицкоски смета дека е потребно да се изградат таканаречени когенеративни гасни централи, кои може да служат и за производство на електрична енергија и за производство на топлина.

„Така што, кога сето ова би се сумирало, можам да кажам дека ова е еден од главните приоритети и ќе продолжиме во таа насока да се бориме, особено во делот на обезбедување централизиран систем за затоплување на домовите, јавните објекти и дел од индустриските капацитети. И како тоа ќе го правиме, најчесто тоа може да се реши со изведба на таканаречени когенеративни гасни централи, кои може да служат и за производство на електрична енергија и за производство на топлина. Но, за сето тоа да се случи, потребна е и подземна инсталација за да може таа топла вода да дојде до домаќинствата, до јавните објекти и до индустриските објекти.“, дециден е Мицкоски.