Од Зелениково до централната железничка станица во Скопје со градскиот воз ќе се патува за 25 минути. Возот кој ќе тргнува од Зелениково, ќе минува низ Јане Сандански, Драчево, Лисиче и ќе завршува кај Транспортниот центар ќе има седум станици.  Директорот на Македонски железници – инфраструктура, Синиша Ивановски извести веќе направиле и тестирање за брзината на градскиот воз.

„Од најоддалечената станица на градскиот воз во Зелениково отприлика треба за 25 минути со вкалкулирани застанувања на постојки да се стигне до Скопје, додека од Драчево тестирањата покажаа дека ќе требат од 11 до 13 минути за да се стигне до главната железничка станица во Скопје. Првата фаза на градскиот воз која во моментов се работи, од Зелениково до централната станица Скопје во должина од 24,5 километри ќе биде готова за најмногу шест месеци од денеска“, рече директорот Ивановски.

Истовремено со делницата за градскиот воз од Зелениково, се работи и на делницата од Драчево до Илинден долга 7,7 километри која директорот Ивановски очекува да биде готова до Нова година оти е покуса.

Изградбата на делницата од Драчево со Илинден е три милиони евра, а за делницата од Зелениково до Транспортниот центар се предвидени 5,7 милиони евра.

Градскиот воз ќе биде синхронизиран со автобусите на ЈСП за што директорот Ивановски веќе имал средба со новиот градоначалник на Скопје.

„За многумина изгледаше како сон, но еве денеска е јаве, почнуваме да нудиме алтернатива за граѓаните во Скопје имајќи предвид дека изминатиов период се соочуваа со катастрофално лоша состојба поврзана со нефункционалноста на јавниот транспорт и ЈСП. Како Град Скопје ќе бидеме целосно логистички вклучени во овој процес земајќи предвид дека на новите станици ќе се прилагодиме со ЈСП за граѓаните да не чекаат со часови да дојде возот. Кога ќе има воз, тогаш ќе стигнуваат и автобусите“, рече градоначалникот Ѓорѓиевски кој нагласи дека од денес во функција се ставени дополнителни 60 приватни автобуси за јавен превоз во Скопје.

Министерот за транспорт и врски, Александар Николоски на чија иницијатива се прави градскиот воз како алтернатива за јавниот превоз во Скопје кажа дека почнале да ги менуваат дрвените прагови на пругите кои не се заменети откога се поставени во 1963 година. Тој очекува седната година да почнат да се градат и другите две траси за градскиот воз од кои едната е од Волково преку Ѓорче, и Скопје Север до Транспортниот центар, а другата, трета траса е од Миладиновци до Илинден од каде пак веќе ќе има поврзување со главната железничка станица во Скопје.

СДС нема иднина се додека Филипче е на чело на партијата. Филипче, како продолжена рака на Зоран Заев, продолжува да ја третира партијата како приватен проект, изјави Викторија Андоновска од ВМРО-ДПМНЕ.

„Изборниот резултат беше само статистичка потврда за ова. На своето конто, СДС брои само 6 општини, 126.000 гласови и околу 230 советници, историски изборен дебакл на СДС, кој за Филипче е успешен резултат за кој му честитаме. Се додека Филипче и Заев владеат во СДС и тоа не се искорени целосно, партијата нема никаква реална шанса да оди напред, ниту пак има шанса да се реформира. По ова се гледа дека обидот на Филипче за реформирање, кој толку долго и широко го најавуваше, не само што е пропаднат, туку не е ни започнат“, рече таа.

Според Андоновска, Филипче треба да си даде оставка од претседател на СДС, затоа што, додава таа, како тој што нагласува некогаш државотворната СДС, целосно ќе ја снема од политичката мапа во земјата, поради неговите политики.

„На македонската политичка сцена и е потребна конструктивна опозиција, ослободена од стегите на Заев и Филипче“, рече Андоновска.

„Ние се доведовме до ситуација во 21 век да зборуваме за елементарни работи и навистина сето тоа делува помалку и комично, но кога некои работи треба да се направат, мора да се направат и како што кажа градоначалникот за време на изборната кампања тој вчера во исклучително рекордно време успеа да ги мобилизира сите капацитети. Но, исто така им благодарам и на општествено одговорни компании кои се вклучија во акцијата и мислам дека вчера беше сето тоа убаво и една ваква робусна акција денеска ако ништо друго можевме да видиме дека контејнерите се барем празни и чисти“, вели претседателот на Владата на Република Северна Македонија, Христијан Мицкоски одговарајќи на новинарско прашање.

Мицкоски рече дека нечистењето на ѓубрето е политичка стратегија на опозицијата, но дека новиот градоначалник Орце Ѓорѓиевски уште првиот ден ги засукал ракавите и започнал со работа.

„Навистина делува смешно, јас ве разбирам и јас понекогаш можеби би се насмеал за сето ова кое што го зборуваме. Но, за жал се доведовме до една ваква ситуација и оваа беше политичка стратегија на опозицијата, преку неработењето на претходната градоначалничка нанесе штета, пред се на Владата и на државата. И морам да признам дека во одредена мера успеа со сето тоа. Но, ние таа лекција ја научивме и затоа уште во првиот ден ги засукавме ракавите и започнуваме од темелите или од под темелите. Така беше во владата кога дојдовме со долгови, така и во градот. Така што мора да гребеме од под темелите, за да дојдеме до површината и потоа да градиме нагоре. И мислам дека тоа го прави квалитетно уште од самиот почеток новиот градоначалник. Јас сакам само да кажам дека немате во животот втора шанса за прв впечаток. Така што многу е важен првиот впечаток и мислам дека тука новиот градоначалник тоа ќе го оправда“, изјави премиерот Мицкоски.