Музејот на Народната банка отворен за јавноста: располага со најголемата јавна нумизматичка збирка во државата

Музејот на Народната банка со својата постојана поставка повторно е отворен за јавноста. Со речиси 23.000 монети од разни историски епохи, почнувајќи од почетокот на V век пр. н. е. до денес, Музејот на Народната банка располага со најголемата јавна нумизматичка збирка во државата.

На простор од 240 м2 се изложени околу 1.000 монети од збирката на Музејот, распоредени во 36 витрини.

При осмислувањето на постојаната музејска поставка акцентот e ставен на развојот на монетарните системи и нивните стандарди во општествата што оставиле свој белег во историјата на државата. Општествените и културните случувања, кои се одразиле врз иконографијата и дизајнот на парите, исто така имаат свое место во Музејот. Следејќи ги светските трендови поврзани со улогата на централните банки во грижата за сопственото културно наследство, Народната банка во 1999 година почна со откуп на стари и ретки пари од нашите почва преку кој ја изгради денешната единствена збирка. Влегувајќи во ова поле на музејска дејност, Народната банка денес е еден од столбовите во заштитата на движното културно наследство.

Влезот за посетителите е бесплатен, секој работен ден од 9 до 15 часот, а достапни се и групни посети со закажување однапред.