Неексплодирана артилериска граната пронајдена кај Калишта, ДЗС апелира да не се поместуваат вакви убојни средства

Неексплодирано убојно средство од минатите војни е пронајдено кај село Калишта при изведба на градежни работи во близина на кампот „Рино“ покрај Охридското Езеро оваа работна недела во реон на општина Струга.

Пронајдената артилериска граната во калибар од 105 мм била од Првата светска војна, што практично била во двор меѓу изградени куќи. Безбедно е подигната и транспортирана до место за нејзино складирање, а потоа и за уништување, од страна на пиротехничарот од Дирекцијата за заштита и спасување (ДЗС), Ѓорги Стефанов.

ДЗС информира дека е корисно да се следат препораките и информациите од медиумите за превенција, а и за реагирање при вакви случаи кога ќе се најдат опасни неексплодирани убојни и други средства.

Конкретно, ДЗС апелира дека при прошетки во природата, во случај кога граѓаните ќе пронајдат неексплодирани убојни средства, да не ги допираат и поместуваат, туку едноставно да се јават на единствениот повикувачки број за итни случаи 112 во ЦУК.

По пријавата, надлежните институции и служби од Системот за управување со кризи, самостојно или комбинирано со стручни лица, ќе се погрижат безбедно да бидат отстранети или неутрализирани, односно да бидат уништени опасните пронајдени работи во согласност со конкретните просторни услови, ситуации, а и карактеристики на опасните нуспојави.