Земјотрес со јачина од 2,3 степени според Рихтеровата скала вчера бил почувствуван во Ресен и околината.

Потресот бил почувствуван во 18 часот и 45 минути, со епицентар два километри јужно од Ресен.

„Рихтеровата магнитуда изнесуваше 2.3 степени, а беше почувствуван од населението во Ресен и околината со интензитет од III степени, според Европската макросеизмичка скала“, соопшти Сеизмолошка опсерваторија при Природно-математичкиот факултет во Скопје.

Претседателот на Европскиот совет, Шарл Мишел, денеска ќе допатува во посета на Македонија.

Мишел ќе оствари средби со високи претставници на земјава, на кои се очекува да стане збор за новата методологија за почеток на преговорите со Европската Унија.

Методологијата се очекува да се објави во првата недела од февруари, а првично Европската комисија планираше таа да се објави на крајот од месецов.

Претходно минатата недела во посета на земјата престојуваше еврокомесарот за проширување Оливер Вархеи, кој повтори дека проширувањето на ЕУ за новата комисија е приоритет и оцени дека Македонија и Албанија се подготвени за преговори.

Криминално рекетарската влада на СДСМ и Зоран Заев ја довлечка државата на дното на Европа и Светот според индексот на корупција, велат од ВМРО-ДПМНЕ преку соопштение.

„На листата на Транспаренси Интернешнал, Македонија се најде на 106 место во друштво на Монголија и Брегот на Слоновата Коска, податок кој говори дека власта предводена од аболицираниот Заев и неговиот наследни Оливер Спасовски штити криминал и тоне во корупција на највисоко ниво“, наведува опозициската партија.

Според ВМРО-ДПМНЕ, тоа што Македонија бележи пад за 13 места според Индексот, дополнително го потврдува фактот дека проблемот со криминалот, корупцијата, рекетирањето ескалира, а институциите не реагираат под притисок на власта.