Македонија
ОТА почна со работа, УБК нема да има повеќе пристап до опремата за прислушување

Оперативно-техничката агенција (ОТА) почна со работа, надлежните најавуваат дека ќе се овозможи повеќестепена контрола над следените комуникации.
,,Денеска сум среќен што заедно со директорот на Оперативно-техничката агенција, Зоран Ангеловски, можеме да ви соопштиме дека новиот Закон за следење на комуникациите и Законот за ОТА започнуваат со својата примена”, рече министерот за внатрешни работи и вицепремиер, Оливер Спасовски, на прес-конференцијата по повод почнувањето со работа на Оперативно-техничката агенција.
„Заедно со Законот за кривична постапка, тие се дел од законскиот пакет за реформа на системот на следење на комуникациите. Во минатото се зборуваше многу, добивме и негативни извештаи за слабостите кои беа детектирани во претходниот систем, а кои доведоа до сериозни злоупотреби и предизвикаа сериозна политичка криза во нашата земја. Со поддршка на јавноста, пратениците од опозицијата, научните работници, претставниците на граѓанските организации, но и експерти од Европската комисија беа подготвени закони кои имаа за цел да го претстават новиот модел на поставеност на системот за следење на комуникациите. Клучните забелешки од експертската мисија на Прибе се отстранети. Министерството за внатрешни работи, односно Управата за безбедност и контраразузнавање немаат директен пристап до опремата за следење на комуникациите“, потенцира Спасовски.
Министерството, односно УБК не знаат и немаат податоци за примената на посебните истражни мерки кои се на барање на другите овластени органи за следење на комуникациите. УБК нема никаков пристап до содржината на следената комуникација, освен за оние мерки кои се на барање на Управата и за кои постои одобрување од судот.
„Во минатото постоеја заштитни механизми за оневозможување на контролата над системот за следење. Денес ја демолиравме тврдината и овозможуваме повеќестепена контрола над следените комуникации. Ќе контролира собраниската комисија, граѓанските организации, но и експертите. Пред нешто повеќе од една година ветивме дека клучната слабост за системска злоупотреба на следените комуникации ќе биде отстранета. Денес тоа го овозможивме“, рече Спасовски.
Директорот на Оперативно-техничката агенција, Зоран Ангеловски, потенцира дека Агенцијата ќе работи во согласност со позитивните законски регулативи.
„Ве уверувам дека не постои ниту теоретска ниту практична можност за злоупотреби на механизмите за ПИ-мерките. Одговорно тврдам дека нема да ни се повторат ‘бомбите’. Моделот што е избран за функционирање на Оперативно-техничката агенција е соодветен на условите и е оптимално решение за Република Македонија”, рече Ангеловски.
Со почетокот на работата на ОТА заокружена е реформата во безбедносните служби во согласност со препораките на Рајнхард Прибе и групата експерти кои произлегоа од политичката криза пред три години.
„Оперативно-техничката агенција е создадена и ќе функционира како целосно независно тело. ОТА е основана со јасна поддршка на сите политички чинители во Република Македонија, односно со 2/3 мнозинство, вклучително и Бадинтеровиот принцип. Ова е показател и укажува на зрелоста на државните институции и почитување на принципот владеење на правото. ОТА целосно ќе го штити безбедносниот интерес на граѓаните на Република Македонија, на етички и транспарентен начин“, потенцира Ангеловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бежоска: Новата алатка за споредба на надоместоците на банките ќе придонесе за зголемена конкурентност и поповолни цени за платежните услуги

Новата алатка на Народната банка за споредба на надоместоците помеѓу давателите на платежните услуги придонесува кон поголема транспарентност на банките и значително ја подобрува информираноста на јавноста за надоместоците што ги наплатуваат банките за најрепрезентативните услуги поврзани со платежната сметка.
„Преку поголемата транспарентност и олеснетата споредливост на надоместоците ќе се зголеми конкурентноста помеѓу банките што може да придонесе за поповолни цени на платежните услуги за граѓаните“, посочи гувернерката Анита Ангеловска-Бежоска.
„Заради заштитата на потрошувачите, како една од најзначајните цели на новиот закон, првпат се воведе обврската за банките да ги уредат правата и обврските на корисниците со рамковен договор во стандардизирана форма, проследен со информативен документ за надоместоците пред неговото прифаќање, што обезбедува нивна поголема информираност и сигурност при носењето на одлуките. За најчесто користените услуги, Народната банка врз основа на податоците од банките подготви листа од 11 т.н. најрепрезентативни услуги за чии надоместоци почна да прибира податоци и почнувајќи од крајот на минатиот месец овозможи нивна достапност и споредливост по банки, со користење на алатката. На овој начин граѓаните ќе може на едно место, преку веб-страницата на Народната банка, да добијат брза и лесно достапна информација за надоместоците кај секоја од банките и да направат споредба кога одлучуваат кај која банка да користат платежни услуги“, посочи гувернерката.
Таа истакна дека новиот Закон за платежните услуги и платни системи, како и дваесет и шесте подзаконски акти донесени од Народната банка, претставуваат значајно усогласување со европските стандарди и регулативи.
Скопје
Герасимовски: Наставниците и стручните служби ги завршија обуките против меѓуврсничкото насилство

Општина Центар им додели сертификати на наставниците и на стручните соработници од сите училишта во општината, кои ги посетија обуките за рано препознавање, решавање и превенција на врсничко насилство – булинг. Обуките беа одржани во соработка со здружението „Европски соѕвездија“ во КСП „Центар – Јадро“ од страна на еминентни универзитетски професори.
Градоначалникот на општина Центар, Горан Герасимовски, денеска при доделувањето на благодарниците порача дека булингот не е наивен проблем, туку крајно сериозен и како таков треба да се сфати. Тој им порача на наставниците и на стручните лица од училиштата да го применуваат стекнатото знаење од обуките и сериозно да пристапат кон решавање на проблемите со меѓуврсничкото насилство.
„Врсничкото насилство не смее да се игнорира. Тоа може да предизвика сериозни последици врз здравјето на учениците и семејството затоа ние како локални самоуправи имаме одговорност да ги преземеме сите мерки и активности за поголема безбедност во образовните установи. Нашите наставнички и стручниот кадар ги завршија обуките за рано препознавање и решавање на булингот меѓу учениците и искрено верувам дека новите знаења што ги добија од професори стручни во областа ќе ги применат во пракса и ќе преземат соодветни мерки кога ќе препознаат меѓуврсничко насилство меѓу учениците. Во оваа пригода ги повикувам и родителите да се вклучат во целиот процес. За искоренување на оваа појава, сите три алки се исклучително важни: наставници, стручна служба и родители. Воспитувањето доаѓа од дома затоа да разговараме за проблемите, да укажеме на примерното однесување и да зборуваме за последиците од исмевањето“, рече Герасимовски пред присутните.
Општина Центар се грижи за здравјето и иднината на учениците затоа вложува во континуирана едукација на образовниот кадар, во подобро утре за децата и следните генерации.
Македонија
Поведена постапка за делови од Законот за средното образование кои се однесуваат на користење бесплатен јавен превоз

Судот, постапувајќи по иницијативата на Лука Павиќевиќ од Скопје, одлучи да се поведе постапка за оценување на уставноста на членот 41-а став 1 во делот „јавно” од Законот за средното образование, информираат од Уставниот суд.
„Исто така, по сопствена иницијатива, Судот одлучи да се поведе постапка и за оценување на уставноста на став 3 во делот „јавното“ од истиот член.
Причината за постоење основано сомнение во уставноста на овие делови од одредбите од Законот за средното образование, е што според Судот, со истите се повредува уставниот принцип на еднаквост, на начин што се воспоставува различен третман за учениците во јавните, во однос на учениците во приватните средни училишта при користењето на бесплатен превоз до училиштето, односно се предвидува ова право да го користат само редовните ученици во јавните средни училишта.
Судот одлучи да не поведе постапка за оценување на уставноста на член 41-а став 2 од Законот за средното образование“, се додава во соопштението на Уставниот суд.