Македонија
Пандемијата на Ковид-19 ги зголеми сајбер-измамите на граѓаните и компаниите

„Бројот на лажни веб-страници за онлајн-шопинг и на измамнички трговци преку интернет се зголеми за време на пандемијата на Ковид-19. Од копии на веб-страници на популарни брендови до лажни продавници што никогаш не ја испорачуваат стоката, ситуацијата од коронавирусот откри слабости во моделот на доверба што се користи при купување преку интернет. Пандемијата поттикна насочени напади врз домови, бизниси, влади и критична инфраструктура, што главно се должи на слабеењето на постојните мерки за сајбер-безбедност поради промени во работните и инфраструктурните обрасци предизвикани од пандемијата“. Ова е наведено во извештајот „Пејзаж на закани 2020“, кој неодамна го објави Агенцијата за сајбер-безбедност на ЕУ (ENISA).
Агенцијата наведува дека за време на пандемијата сајбер-криминалците ги унапредиле своите можности, бргу се адаптирале и поефикасно се насочиле кон релевантни групи на жртви. Овој глобален феномен доведе до наплив на персонализирани сајбер-напади на сајбер-криминалци, кои користат понапредни методи и техники, а употребата на мобилната технологија и претплатата на дигитални платформи ги прави помладите генерации поранливи на овие видови закани. Остварувањето финансиска корист и натаму им е најголем мотив на компјутерските криминалци.
„Бројот на жртви на малвер и на фишинг во ЕУ продолжува да расте со користење на темата Ковид-19 како мамка. Овие напади вклучуваат пораки што носат додатоци на малициозни датотеки и пораки што содржат малициозни врски што ги пренасочуваат корисниците кон страници за фишинг или за преземање малициозен софтвер. Ваквите компјутерски измами резултираа со загуба на милиони евра за граѓаните и компаниите во ЕУ“, се вели во извештајот.
Агенцијата за сајбер-безбедност на ЕУ објави и листа на 15 најголеми сајбер-закани. Малверот, односно малициозниот софтвер, стои цврсто како број 1 сајбер-закана, а веднаш по него се фишингот и кражбата на идентитет. На списокот се и веб-базирани напади, напади на веб-апликации, СПАМ, DdoS, прекршување на податоците, инсајдерска закана, ботнети, физичка манипулација, штета, кражба и загуба, истекување информации, Ransomware, сајбер-шпионажа и Cryptojacking.
Граѓаните во земјата имаат можност сомнителните пораки испратени по е-пошта да ги пријават онлајн во Националниот центар за одговор на компјутерски инциденти (MKD-CIRT), кој е дел од Агенцијата за електронски комуникации (АЕК) на [email protected]
„Секоја порака добиена по е-пошта за која постои сомнение за веродостојност може да се препрати на MKD-CIRT. Сомнителната порака може да е од компанија или адреса од која вообичаено не се добиваат пораки или од непознато лице. Ако пораката изгледа сомнително, најдобро е да се пријави. Тоа ќе помогне да реагираме побргу и на тој начин да се заштитат повеќе корисници од штетното влијание на пораката“, вели Александар Ацев, раководител во MKD-CIRT.
Националниот центар ќе ги анализира сомнителната порака, нејзината содржина, адресата на испраќачот, додатоците и веб-страниците кон кои водат линковите од содржината на пораката. Доколку се открие активност за која се верува дека е штетна, ќе се побара блокирање на адресата од која е испратена пораката со цел да не може повеќе да се праќаат фишинг-пораки преку неа, како и бришење на линковите што водат до малициозните веб-страници.
Оваа услуга инаку не се користи за пријава на сајбер-криминал. Секој што смета дека е жртва на онлајн-измама или сајбер-криминал, тоа треба да го пријавите во Министерството за внатрешни работи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Градоначалникот Герасимовски го потпиша зголемувањето на платите во Општина Центар

Градоначалникот на општина Центар, Горан Герасимовски, и претседателот на Синдикатот на УПОЗ, Трпе Деаноски, го потпишаа анексот на Колективниот договор, со кој на вработените службеници во Општина Центар им се зголемуваат платите за 2.806 денари.
„Со ова покачување сакаме дополнително да ги мотивираме вработените, особено во ова време кога се наоѓаме во светска економска криза, која секако не ја одминува ни нашата општина. По преговорите со синдикатот во општината, обезбедивме средства и веќе од следниот месец вработените ќе земаат поголема плата, што ќе им донесе поголема финансиска сигурност на нашите во време кога цените на сите производи од ден во ден растат“, изјави градоначалникот Герасимовски.
Анексот на Колективниот договор предвидува линеарно зголемување на платата на сите вработени во општинската администрација, освен на лицата чии плати беа претходно зголемени со самото донесување на Законот за минимална плата.
Македонија
Вилма Русковска е суспендирана, дисциплинска за уште две обвинителки

Шефицата на Обвинителството за организиран криминал и корупција Вилма Русковска добила решение за суспензија. Според информации на „Макфакс“, одлуката е донесена откако против Русковска, но и Ивана Трајчева, како и Елизабета Јосифовска е покрената дисциплинска постапка, поради претресот во финансиската полиција.
Постапката ја поведе републичкиот обвинител Љубомир Јовески, а по претресот во финансиската полиција за кој беше утврдено дека е незаконски направен. Дисциплинската комисија ќе треба да утврди кои повреди се направени.
Од Обвинителството попладнево потврдија дека за обвинителите постои сомнение дека намерно и неоправдано направиле крупна професионална грешка со што сториле тешка дисциплинска повреда од член 91 алинеа 6 од Законот за јавното обвинителство.
„Во исто време, врз основа на член 81 од Законот за јавното обвинителство, Јавниот обвинител на Република Северна Македонија донесе Решение за оддалечување од функцијата за еден јавен обвинител додека трае кривичната постапка поведена по поднесена кривична пријава против наведениот обвинител“, додаваат од Обвинителството.
Македонија
МНР ги поздрави препораките на историската комисија

Министерството за надворешни работи соопшти дека во целост ја поддржува работата на Комисијата за историски и образовни прашања со Република Бугарија и ја поздравува вечерашната објава на препораките кои се дел од Протоколот потпишан меѓу двете земји во 2019 година.
Оттука велат дека работата на Комисијата, содржината на којашто таа работа, е целосно автономна, суштински експертска и професионална, заштитена од какви било политички влијанија. Овој предуслов е содржан и во принципите на Протоколот потпишан меѓу двете министерства за надворешни работи и претставува еден од клучните принципи кои обезбедуваат стручност и автентична експертиза во работата на Комисијата.
Понатаму, како што велат од МНР, претставените резултати од работата на Комисијата го задржуваат принципот на реципроцитет за двете земји, што претставува еден од суштинските елементи за градење на меѓусебната доверба и меѓусебна почит, принцип кој исто така е нотиран во содржината на Протоколот потпишан меѓу двете земји.
Трето, со објавените резултати Комисијата покажа дека со храбар, но стручен и искрен пристап, историчарите можат да се изнајдат пристојни и автентични решенија, базирани на историските вистини кои почиваат на факти, а кои нудат можност за заедничко чествување на одредени историски настани, надминување на разликите и создавање основа за изградба на стабилна заедничка иднина меѓу двете земји, смета МНР.
Министерството додава дека Комисијата за историски и образовни прашања со Бугарија и натаму ќе ја има нивната целосна поддршка, особено во насока на поддршка за автономијата во нивната работа.
„Сакаме и да ја охрабриме Комисијата да продолжи и понатаму со својата работа, ослободени од политичките притисоци кои се создаваат во јавноста, потпирајќи се на својата стручност, совесност и експертиза“, се додава во соопштението на МНР.