Македонија
Парадата на гордоста ќе се одржи на 25. јуни, најавена е и забава на стадионот на АРМ

Националната мрежа против хомофобија и трансфобија денеска одржа прес-конференција посветена на овогодишното издание на Скопје Прајд, кое ќе се одржи на 25 јуни под мотото „Излези за љубов! Достоинство. Еднаквост. Правда“.
За разлика од претходните две паради на гордоста, годинава времето на одржување се поместува во попладневните часови. Почетната точка, како и досега, ќе биде во паркот „Жена-борец“, каде во 17 часот ќе започне собирањето на учесниците, а во 19 часот по кратките поздравни говори ќе започне протестниот марш по скопските улици и ќе заврши со културно-забавна програма на стадионот на АРМ во Градскиот парк.
„Зошто повикуваме да се излезе за љубов? Затоа што во време на криза, војна и сиромаштија, лесно се заборава на љубовта, а омразата уште полесно ги окупира мислите и срцата на луѓето. Затоа што само со љубов можеме да се спротивставиме на насилството на кое различните се подложени и тогаш кога за сите други владее мирот. Затоа што никој не смее да биде лишен од правото да љуби или, пак, да биде прогонуван поради тоа што нивната љубов не е признаена со норми и закони. Затоа што љубовта мора да победи“, изјави Катерина Иванова за темата на годинешниот Скопје Прајд.
Стефан Петровски се осврна на барањата за достоинство, еднаквост и правда: „Во нашата држава и натаму се гази по достоинството на ЛГБТ+ луѓето – постојано се мета на омаловажување, дехуманизирање и говор на омраза во јавниот и политичкиот дискурс. Имаат отежнат пристап до остварувањето на човековите права, нивните гласови и потреби често се занемарени во креирањето на политиките, а конзервативно скроената национална легислатива ги доведува во нееднаква подредена позиција наспроти нивните хетеросексуални цисродови сограѓани. Предметите за документираните злосторства од омраза кон нив се заглавени во умствените и правните лавиринти на обвинителството, а трендот на неказнивост на сторителите на насилство го нормализира и охрабрува таквото однесување“.
Потребата од одржување паради на гордоста ја образложи Кочо Андоновски:
„Многу нешта, во многу земји, се променија од првиот Прајд одржан 1970 година во Њујорк. Но, напредокот на полето на правата на ЛГБТ+ луѓето не е изедначен, ниту пак е доволен, а постојано е соочен со напади од сили кои се противат на универзалните човекови права. Скопје Прајд, како и другите паради на гордоста, е празник на љубовта, ден на видливоста на маргинализираните и, секако, повод за славење на жилавоста на нашата борба за еднаквост“.
Скопје Прајд 2022, според организаторите, ќе понуди богата културно-забавна програма, со музички настапи во живо, настапи на дрег кралици од земјата и регионот и ДЈ-сетови. И годинава, традиционално, програмата ќе ја отвори македонската претставничка на Евровизија, Андреа, а ќе настапи и нашата поп-дива и оперска пејачка Наде Талевска – Спасовска.
„На Скопје Прајд ги славиме сексуалниот и родовиот диверзитет и ја промовираме квир културата. Па така, и овој Прајд сигурно ќе биде уникатно искуство, за што, меѓу другите, ќе се погрижат фантастичното трио дрег кралици од соседна Србија, Alex Elektra, Dita Von Bill и Lana Vee, од преку океанот, од Њујорк (САД) ни доаѓа уште една дива, Ronda Vu, додека од нашата земја ги имаме нејзиното дрег височество Divon Jane и другарката Linda Socialista која е решена да го уништи патријархатот со нежно треперење на нејзините лажни трепки“, додаде Иванова осврнувајќи се на програмата во која се вбројуваат и ДЈ-сетови на Андреј Мицајков, Јана Тодоровска, Мартина Пенева и Џинџер.
Програмата на стадионот на АРМ ќе започне во 20:30 и ќе трае до 1 часот по полноќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) Муцунски: Вардар и Комити добиваат нов спортски терен во Аеродром, поддршката за клубот продолжува и во иднина

Вардар е емоција, македонски спортски бренд со кој сите се гордееме, а ние со задоволство го поддржуваме. Ова на својата фејсбук страна го напиша градоначалникот на Општина Аеродром, Тимчо Муцунски кој објави видео од новиот спортски терен наменет за фудбалскиот клуб Вардар.
Станува збор спортско игралиште лоцирано во непосредна близина на СЦ „Јане Сандански“ кое Општина Аеродром го обнови со поддршка на општествено одговорни компании. Обновата опфаќа целосна реконструкција на соблекувалните, нова трева и нов систем за наводнување на тревата.
Поддршката на фудбалскиот клуб Вардар и навивачката група Комити доаѓа на иницијатива на претседателот на советот на Општина Аеродром, Дејан Митески и градоначалникот Тимчо Муцунски кој во својата објава истакна дека таа поддршка продолжува и во иднина.
„Поддршката за Комити и Вардар доаѓа на наша иницијатива и таа соработка ќе продолжи и понатаму, затоа што силен Вардар значи многу за македонскиот спорт и за младите фудбалски таленти кои ќе се градат и создаваат во иднина“, истакна Муцунски во својата фејсбук објава.
Македонија
Левицата: СДС и ДПМНЕ распродаваат плодна почва за фотоволтаични централи

„Деновиве октроираниот премиер Димитар Ковачевски, заедно со градоначалникот од ДПМНЕ, Стевче Стевановски, ја отвори фотоволтаична централа лоцирана во село Новаци, Битола“, велат од Левицата.
„Како инвеститор во оваа централа фигурира контроверзната компанија „АТС Груп“, чиј сопственик Шефкет Демировски во минатото беше осомничен за кражба на индустриска сопственост. За да може да се градат вакви централи на плодно земјиште, процедурата мора да помине и преку општинските комисии, кои во случајот се раководени од ДПМНЕ.
Оваа појава на уништување на плодното земјоделското земјиште почна во локалните самоуправи, контролирани од ДПМНЕ, со пренамена и дозвола за градба на почва која е со намена производство на земјоделски производи. Притоа, при ваквите постапки воопшто не се води внимание за бонитетот на почвата!
Очигледна е тенденцијата на СДС и ДПМНЕ за девастирање на плодната почва, во интерес на крупниот капитал, а за сметка на постепеното згаснување на домашното земјоделско производство.
Додека Мицкоски не пропушта да се пожали дека проектите на неговите градоначалници се саботирани од централната власт, токму во општина Новаци неговиот градоначалник заедно со СДС ја отуѓува плодната земја за профитот на компанија со контроверзно минато“, соопштуваат од Левицата.
Македонија
Бежоска: Новата алатка за споредба на надоместоците на банките ќе придонесе за зголемена конкурентност и поповолни цени за платежните услуги

Новата алатка на Народната банка за споредба на надоместоците помеѓу давателите на платежните услуги придонесува кон поголема транспарентност на банките и значително ја подобрува информираноста на јавноста за надоместоците што ги наплатуваат банките за најрепрезентативните услуги поврзани со платежната сметка.
„Преку поголемата транспарентност и олеснетата споредливост на надоместоците ќе се зголеми конкурентноста помеѓу банките што може да придонесе за поповолни цени на платежните услуги за граѓаните“, посочи гувернерката Анита Ангеловска-Бежоска.
„Заради заштитата на потрошувачите, како една од најзначајните цели на новиот закон, првпат се воведе обврската за банките да ги уредат правата и обврските на корисниците со рамковен договор во стандардизирана форма, проследен со информативен документ за надоместоците пред неговото прифаќање, што обезбедува нивна поголема информираност и сигурност при носењето на одлуките. За најчесто користените услуги, Народната банка врз основа на податоците од банките подготви листа од 11 т.н. најрепрезентативни услуги за чии надоместоци почна да прибира податоци и почнувајќи од крајот на минатиот месец овозможи нивна достапност и споредливост по банки, со користење на алатката. На овој начин граѓаните ќе може на едно место, преку веб-страницата на Народната банка, да добијат брза и лесно достапна информација за надоместоците кај секоја од банките и да направат споредба кога одлучуваат кај која банка да користат платежни услуги“, посочи гувернерката.
Таа истакна дека новиот Закон за платежните услуги и платни системи, како и дваесет и шесте подзаконски акти донесени од Народната банка, претставуваат значајно усогласување со европските стандарди и регулативи.