Сеизмолошката опсерваторија при Природно-математичкиот факултет во Скопје рано утринава регистрира серија од земјотреси чии епицентри се наоѓаат на 50 километри југозападно од Скопје и потекнуваат од епицентралното подрачје Гостивар – Тетово.

Од оваа серија почувствувани беа пет земјотреси и тоа: во 1:36 часот со локална Рихтерова магнитуда 3.5 и интензитет од IV степени според Европската макросеизмичка скала, во 2:29 часот со локална Рихтерова магнитуда 3.2 и интензитет од III-IV степени според Европската макросеизмичка скала, во 2:48 часот со локална Рихтерова магнитуда 3.1 и интензитет од III-IV степени според Европската макросеизмичка скала, во 3:39 часот со локална Рихтерова магнитуда 2.6 и интензитет од III степени според Европската макросеизмичка скала и во 07.44 часот со локална Рихтерова магнитуда 3.7 и интензитет IV степени според Европската макросеизмичка скала, соопшти Сеизмолошка опсерваторија при Природно-математичкиот факултет во Скопје.

Времето денеска ќе биде променливо облачно и студено со умерен до засилен, а по должина на Повардарието повремено силен ветер претежно од северозападен правец. На места ќе провејува слаб снег. До крајот на денот облачноста во најголем дел од земјава ќе се намали. Максималната температура ќе биде во интервал од -1 до 6 степени.

Во  Скопје ќе биде променливо облачно со сончеви периоди и со засилен северен ветер. Максималната температура ќе достигне до 3 степени.

Сообраќајот на државните патишта се одвива по влажни коловози. Снег со слаб интензитет провејува во Прилеп и на планинскиот премин Стража. Од 12:00 часот поради интензивни врнежи од снег се воведува забрана за движење на тешки моторни возила на патниот правец Тетово – Попова Шапка и се препорачува задолжителна употреба на зимска опрема за лесни моторни возила и автобуси на истиот патен правец.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има појава на утринска магла и можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.