Покренато обвинение против ексградоначалникот на Прилеп, Марјан Ристески

Основното јавно обвинителство Прилеп поднесе обвинение против поранешниот градоначалник на Прилеп, Марјан Ристески, за несовесно работење во службата во врска со поставувањето на директорка на Домот за стари лица „Киро Крстески Платник“.

Според обвинителниот предлог, Ристески по објавената одлука од страна на Управниот одбор на ЈОУ Дом за стари лица „Киро Крстески Платник“ од Прилеп и распишаниот јавен конкурс во кој како посебен услов било предвидено работно искуство од 4 години по дипломирањето, донел решение со кое за директор избрал кандидатка која во времето на изборот имала работно искуство од 2 години и 6 месеци по дипломирањето и не го исполнувала посебниот услов предвиден во конкурсот.

Во истиот предмет, за избраната кандидатка е отфрлена кривичната пријава за кривично дело „злоупотреба на службена положба и овластување“. „Имено, во конкретниот случај не произлезе дека осомничената на некаков начин ја искористила својата службена положба или овластување, дека ги пречекорила границите на своето службено овластување, па со тоа за себе или за друг да предизвикала некаква корист или на друг да му предизвикала некаква штета, ниту, пак, ова кривично дело е сторено при вршење јавни набавки или  на штета на буџетот на РМ“, соопшти Обвинителството.

Од таму додаваат дека надлежниот јавен обвинител утврдил дека незаконските дејствија со изборот на осомничената за директорка, иако таа не го исполнувала посебниот услов наведен во јавниот конкурс, ги сторил оној кој го извршил изборот.