Ни треба јасна визија и креатива да се справиме со економската криза, во Македонија имаме проблем со големата корупција и невладеењето на правото, рекол лидерот на ВМРО-ДПМНЕ, Христијан Мицкоски, на состанокот со словенечкиот премиер, Јанез Јанша, кој е и претседател на Словенечката Демократска Странка, најголемата партија и сестринска партија на ВМРО-ДПМНЕ во рамките на Европската Народна Партија.

Мицкоски информира дека на состанокот било разговарано за актуелните случувања во Македонија со главен фокус на големата корупција и невладеењето на правото во Македонија.

„Зборувавме и за начин со кој што овде во Словенија се справуваат со најголемиот предизвик можеби на човештвото во овој момент, а тоа е КОВИД пандемијата, но и резултатите и би рекол нерезултатите коишто ги спроведува нашата влада во рамките на справувањето со пандемијата во Македонија. Зборувавме за рецесијата за тешката економска ситуација во Македонија. Морам да признаат дека и овде во Словенија се чувствуваат економските последици предизвикани од КОВИД пандемијата, но далеку не се такви какви што тие се девастирачки во нашата земја во Македонија, поради неспособноста и немањето јасна визија и креатива како се справиме со таа економска криза“, рече Мицкоски.

Скопското обвинителство поднесе обвинение за двајцата насилници кои во автобус на ЈСП се закануваа дека ќе стават патници во киселина.

Тие се обвинети дека на 5 ноември 2020 година, околу 17:30 часот, во автобус на ЈСП Скопје кој сообраќал на линијата бр. 7, грубо ги навредиле и ја загрозиле сигурноста на возачот и на патниците во автобусот.

Обвинетите влегле во автобусот кај автобуската станица Рекорд без да носат заштитни маски, на што реагирале патниците предупредувајќи ги да носат заштита опрема. Тогаш обвинетите започнале грубо да ги навредуваат патниците и да ја загрозуваат нивната сигурност, велејќи им дека ќе ги убијат и ќе ги стават во киселина.

Потоа му се обратиле и на возачот на автобусот со барање да запре и да ја отвори вратата за да излезат пред да стаса на следната автобуска постојка. Возачот не ја отворил вратата, по што обвинетите продолжиле со грубо навредување и загрозување на неговата сигурност, му се обраќале со висок тон и удирале по внатрешноста на возилото.

Со тие дејствија, велат од обвинителството, обвинетите предизвикале чувство на несигурност, загрозување и страв кај  возачот и патниците на автобусот.

Обвинетите се жители на скопски села, двајцата на возраст од 31 година, и се обвинети за кривично дело – насилство.

Министерката за образование и наука, Мила Царовска, денес по повод стартот на второто полугодие го посети средното уметничко училиште ДСУЛУД „Лазар Личеноски“ во Скопје. Наставата во ова училиште се одвива со физичко присуство и е прилагодена на практичната настава на учениците.

Царовска на состанокот со директорот на училиштето Филип Фидановски истакна дека МОН според препораките на Комисијата за заразни болести ги обезбеди сите услови за непречена реализација на наставата во време на пандемија.

„Веќе воспоставениот хибриден модел од првото полугодие се покажа како успешен и наставата продолжува по истиот модел. На овој начин се обезбедува континуитет на наставата во второто полугодие по веќе воспоставениот успешен модел од првото полугодие што е во интерес и на учениците и на наставниците и на јавното здравје“, рече Царовска.

Директорот Фидановски рече дека дава целосна поддршка на реформските процеси во основното образование, бидејќи, како што кажа, со нив образовниот систем се прилагодува на оние во најразвиените земји од светот и од Европа.

Посетата беше искористена за да се видат условите за настава во училиштето и да се поразговара за можни инвестиции.