Македонија
По пет месеци препораки: укинат ковид-тестот пред операции за кој пациентите најчесто плаќаа од свој џеб
„Мој термин“ ги укина пунктовите за тестирање за Ковид-19 во Скопје и матичните лекари ги извести дека од понеделник ПЦР тест ќе се прави само во просториите на Центар за јавно здравје. За тестирањето е неопходен упат од матичен лекар, а право на бесплатен тест имаат само пациенти сомнителни на Ковид – 19. Досега матичните лекари издаваа упати и за лица кои не се сомнителни за Ковид – 19, но потребен им е негативен резултат од ковид – тест поради операции или различни интервенции. Од понеделник такви пациенти нема да добиваат упати, а од Комисијата за заразни болести велат дека во никој случај пациентите не треба да издвојат пари од свој џеб за да се тестираат.
„Веќе пет месеци препорачуваме да не се бара тестирање пред операции, а последната одлука на ’Мој термин’ во никој случај не значи дека пациентите отсега ќе треба сами да плаќаат за тестирањето. Напротив, ние како Комисија за заразни болести препорачавме дека таков тест не е неопходен и оставивме можност оние кои сепак ќе инсистираат на тестирање, тоа да го направат со брзи тестови, во самата институција во која се прави интервенцијата. На сите им беа поделени по 500 брзи тестови за да се скрати постапката пред интервенциите и да им се олесни на пациентите. Оваа одлука на ’Мој термин’ се повикува на истата препорака од пред пет месеци, нова не сме донеле“, вели Злате Мехмедовиќ, портпарол на Комисијата за заразни болести за „Макфакс“.
Пациентите со закажани операции, досега најчесто плаќаа за тестирањето за Ковид – 19, и покрај тоа што матичните лекари можеа да им издадат упати и тестот да го направат на државен трошок. За да го избегнат тешкото усогласување на термините за тестирање со терминот за операција, најчесто одлучуваа да платат за ПРЦ-тестот оти тестирањето во приватните лаборатории не се закажува и резултат го добиваа истиот ден.
Според последната објава на Институтот за јавно здравје, бројот на тестирани лица за Ковид – 19 за периодот од 13 до 19 февруари, бележи мал пораст во споредба со претходната недела. Од 13 до 19 февруари тестирани биле 2511 лица од кои 119 биле позитивни на коронавирусот. Во истиот период пријавени се две починати лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
В недела посебен сообраќаен режим во Скопје
Министерството за внатрешни работи известува дека на 31.3.2024 (недела), со почеток во 9 часот, поради одржување атлетска трка на 10 км, со траса на движење од долниот паркинг на Средно Водно по регионалниот пат (Р2138) до паркингот на манастирот „Св. Пантелејмон“ и обратно, Единицата за безбедност на патниот сообраќај при СВР Скопје ќе преземе мерки за посебен режим на сообраќај, при што сообраќајот ќе се пренасочува по околните сообраќајници.
Министерството за внатрешни работи апелира до граѓаните да ги почитуваат наредбите што ги издаваат полициските службеници на сообраќајниците на кои ќе се одвива настанот.
Македонија
Левицата: Решението за градба кај болничкиот комплекс Воена болница да се поништи веднаш
„Го повикуваме градоначалникот Стевчо Јакимовски да ги почитува законите и да го поништи Решението за градба на 17-катницата кај Болничкиот комплекс „Воена болница“, истакнуваат од Левица.
Потсетуваат дека политичката партија Левица повеќепати укажа на штетноста од градбата на повеќекатницата на истата локација, паралелно организираше протест на којшто граѓаните јавно го искажаа незадоволството од своеволието на градоначалникот и инвеститорите за противзаконската одлука на истите да почнат со градба на зграда за којашто немаат законска дозвола.
„Од пред неколку дена е правосилно Решението со кое се поништува незаконски позитивното конзерваторско мислење, кое се обидоа да го издејствуваат инвеститорите, а истото, по наши сознанија, е пристигнато во Општината на 21.3.2024 година, по што градоначалникот треба веднаш во законски рок да постапи по истато. За жал, Решението за градба уште не е поништено.
Од општинската администрација не даваат одговори по однос на прашањето по Решението со кое се одбива жалбата на инвеститорите, но успеавме да го добиеме, бидејќи е информација од јавен карактер“, дообјаснуваат од оваа партија.
Го повикуваат градоначалникот Стевчо Јакимовски во пресрет на изборната претседателска кампања да се одважи, како што велат, да ги испочитува законите и да го поништи Решението за градба веднаш, како би докажал пред граѓаните дека, навистина, ги застапува нивните интереси“.
Македонија
Инспектори затекнале диви менувачници на Бит-пазар, но наместо да ги запечатат, им дозволиле да работат
Полицијата поднесе кривична пријава против шест инспектори, вработени во Државниот пазарен инспекторат, и тоа: С. Б. (32), Ј. Р. (54), В. М. (47), Б. С. (46), С. С. (61) и Р. Б. (37), сите од Скопје, поради злоупотреба на службената положба и овластувањето.
Во текот на март и април 2023 година, вршејќи контрола кај три менувачници, лоцирани во близина на Бит-пазар, а за кои било утврдено дека не биле регистрирани како фирми и не поседувале лиценци издадени од НБРМ за вршење менувачко работење, но подолг временски период работеле како менувачници, инспекторите на затекнатите лица во дивите менувачници биле должни да им изречат решение за забрана за вршење дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1.000 до 20.000 евра во денарска противвредност.
Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници ниту им издале решение за забрана за вршење нерегистрирана дејност, ниту им ги запечатиле просториите во кои ја вршеле противзаконската активност, ниту им ги одзеле средствата, предметите и опремата со кои е направен прекршокот ниту, пак, им изрекле глоба во износ од 1.000 до 20.000 евра.
Напротив, во сите три извршени вонредни надзори на сите три менувачници на секој од сопствениците им изрекле еднократна глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување вршење нерегистрирана дејност и со неизвршување на својата службена должност го сториле кривичното дело злоупотреба на службената положба и овластувањето.