Премиерот, Зоран Заев, во Њујорк присуствуваше на вечерата што за шефовите на држави и влади на земјите од Западен Балкан ја приреди високата претставничка за надворешни работи и безбедносни политики и заменик претседател на Европската Комисија, Федерика Могерини.

Заев истакнал дека само неколку недели остануваат до октомврискиот самит на Европскиот Совет, кога за Северна Македонија, како што рекол, се очекува позитивна одлука за започнување на преговори со ЕУ.

„Во разговорот за време на вечерата, премиерот Заев истакна дека ова е клучен период за нашата земја и дека сите напори се фокусирани на тоа да се задржи позитивниот дух кај сите земји членки на ЕУ за поддршката за Северна Македонија да ги отвори преговорите со ЕУ“, соопштија од Владата.

„По добивањето на кандидатскиот статус за членство во ЕУ во 2005 година, низата на последователни позитивни препораки од Европската Комисија и афирмативните заклучоци на Европскиот Совет во 2018 и 2019 година, како и заради остварените и признаени резултати, Северна Македонија е подготвена да ги започне преговорите со ЕУ без натамошно одлагање“, рекол Заев.

Стартот на преговорите, рекол премиерот, ќе биде успех и на Северна Македонија и на ЕУ, како резултат на заедничките остварувања за време на предпристапниот процес.

Премиерот Заев и владина делегација во Њујорк учествуваат на 74. Генерално собрание на ОН, кое официјално започнува денеска со учеството во работата на самитите посветени на климатските промени и на универзална здравствена заштита.

Времето денеска ќе биде променливо облачно време со сончеви периоди. Попладне и кон крајот на денот ќе има повремени локални врнежи од дожд, кои наместа ќе бидат проследени со ретки грмежи. Минималната температура ќе се движи од 5 до 13 степени, а максималната од 22 до 29 Целзиусови степени.

Во Скопје ќе биде променливо облачно со повремен локален дожд попладне. Утринската температура ќе се спушти до 11, а дневната ќе достигне до 25 степени.

Во текот на неделава времето ќе биде променливо облачно со повремени локални врнежи од дожд. Повеќе врнежи ќе има денеска кон крајот на денот и во вторник, кога на места ќе биде и нестабилно со пороен дожд, грмежи и засилен ветер.

ЈП„Паркинзи на општина Центар“ и Општина Центар во соработка со Сообраќајната полиција – Скопје за една недела санкционираа 337 возачи за непрописно паркирање.

Во периодот од 16 до 22 септември, со помош на специјалните возила „пајак“ на ЈП ПОЦ отстранети се 198 непрописно паркирани возила, од кои седум несовесно паркирани на паркинг-места наменети за лица со посебни потреби, а со поставување механичко средство „блокатор“ санкционирани се 139 возила кои биле затекнати во резидентни зони, а не биле корисници резиденти на секторот во којшто биле паркирани.