Вицепремиерот задолжен за европски прашања, Бујар Османи, во улога на главен координатор на кризните штабови за одбрана од Ковид-19, оствари посета на Штип, во рамките на која се сретна со претставници на локалниот кризен штаб на чело со градоначалникот Благој Бочварски.

„Денеска имавме одличен и продуктивен состанок – оформена е директна комуникација меѓу локалната самоуправа, здравствените власти, претставниците на бизнисот и претставниците на вработените. Се донесе заклучок за поставување на т.н. ковид-координатори во компаниите, но и во државните институции, кои ќе имаат директни овластувања да го следат спроведувањето на мерките и препораките во рамките на организациите и институциите, како и да овозможат нивна полесна меѓусебна комуникација“, посочи Османи.

Тој нагласи дека кај сите постои и сериозност и волја за надминување на проблемот, поради што верува дека набргу ќе создадат услови за безбедно одвивање на работните процеси.

Според вицепремиерот, благодарение на брзата реакција на локалната самоуправа и на централните институции, патеката на вирусот во Штип е оформена и предвидлива.

„Токму брзиот раст во овој втор бран на епидемијата покажува дека нема игра со коронавирусот и ако навистина сакаме да обезбедиме услови за работа и на фабриките, но и на останатите економски субјекти, едноставно треба сите да сфатат дека мора да се почитуваат мерките и препораките за физичко растојание, за самозаштита, за носење маски и секако одржување на личната хигиена и навремена дезинфекција“, истакна Османи, предупредувајќи на лажните вести и пропагандата кои, како што рече, имаат за цел да ја манипулираат јавноста преку сомнежи за постоењето на вирусот.

Општина Штип заедно со бугарската општина Белица во наредните две години ќе искористат над 400.000 евра за културен туризам, но и за рехабилитација на народното читалиште „Георги Тодоров 1885“ и реставрација и конзервација на црквата „Свети Власиј“ на тврдината Исар.

Од овие средства 221.034 евра се наменети за општина Белица, а 185.187 евра за Центарот за развој на Источен Плански Регион.

„Ова е значајна инвестиција која ќе обезбеди реконструкција и реставрација на црквата ‘Свети Власие’, која се наоѓа на тврдината Исар, а датира од поодамна и е во дотраена состојба“, изјави градоначалникот Бочварски.

Вториот дел од проектот претставува изградба на пристапна патека кон црквата од западната страна, а третиот дел опфаќа осветлување на пристапната патека и на црквата „Свети Власие“ со украсни канделабри.

Во последните 24 часа се направени 974 тестирања, а регистрирани се 101 нови случаи на Ковид-19, информираат од Минитерството за здравство.

Најмногу од новозаразените се од Скопје – 59. Останатите се од Куманово – 12, Штип – 7, Прилеп – 1, Тетово – 5, Струга – 6, Велес – 1, Охрид – 1, Кавадарци – 1, Гостивар – 3, Кочани – 3, Пробиштип – 2.

Во изминато деноноќие регистрирани се и четири смртни случаи.

На Клиниката за инфективни болести починал 84-годишен пациент од Прилеп, хоспитализиран на 17 мај. Во болницата „8 Септември“, пак, починале пациент од Тетово (75) примен на 24 мај, пациент од Куманово (71) примен на 26 мај и пациент од Скопје (58) примен на 30 мај.

Институтот за јавно здравје денеска регистрирал 10 оздравени пациенти од кои 8 во Тетово и двајца во Велес.

Вкупната бројка на дијагностицирани во нашата земја од почетокот на епидемијата изнесува 2.492, бројката на оздравени пациенти е 1.605, на починати е 145. Во моментов бројот на активни случаи изнесува 742.

Досега во земјата се направени вкупно 32.161 тестирања на Ковид-19.

Од вкупниот број направени тестови во изминатото деноноќие, 132 теста се во рамките на скринингот во градинки преку Центрите за јавно здравје, а потврдени се и 2 позитивни случаи во градинки во Штип.

Согласно со новообјавените податоци, статистиката за бројот на заразени по градови е следна:

• Скопје 987, активни 396
• Куманово 481, активни 66
• Дебар 51, активни 0
• Штип 111, активни 76
• Прилеп 213, активни 30
• Тетово 236, активни 82
• Струга 90, активни 18
• Велес 133, активни 28
• Битола 28, активни 3
• Охрид 24, активни 7
• Кавадарци 6, активни 1
• Гостивар 32, активни 11
• Гевгелија 4, активни 0
• Струмица 4, активни 2
• Крива Паланка 6, активни 0
• Радовиш 4, активни 0
• Крушево 3, активни 0
• Кочани 41, активни 10
• Пробиштип 5, активни 3
• Демир Хисар 1, активни 0
• Македонски Брод 2, активни 0
• Пехчево 3, активни 0
• Берово 1, активни 0
• Валандово 2, активни 1
• Виница 3, активни 1
• Делчево 1, активни 0
• Кратово 3, активни 1
• Свети Николе 2, активни 2
• Кичево 3, активни 1
• Неготино 12, активни 3 (*7 лица од ПЕ Неготино се жители на Демир Капија)